თუშეთის გზაზე მეწყერში მოყოლილი მამაკაცის ცხედარი იპოვეს

თუშეთის გზაზე, მეწყერში მოყოლილი 62 წლის ზურაბ ოთიურიძის ცხედარი მაშველებმა 3-დღიანი ძებნის შემდეგ იპოვეს. 

შემთხვევის ადგილზე 5 სამაშველო ჯგუფი მუშაობდა. უამინდობის გამო საძიებო სამუშაოები გართულდა – ხეობაში  532 000 ტონა თოვლის და მიწის მასა ჩამოწვა. იყო მეწყერის განმეორებით ჩამოწოლის საფრთხე.

თუშეთის გზაზე მეწყერი 5 მაისს, დაახლოებით 17:00 საათზე ჩამოწვა და გზის გაწმენდით სამუშაოებზე დასაქმებული ორი ადამიანი მოიყოლა. ერთ-ერთის, ზაქრო ცისკარიშვილის ამოყვანა მალევე მოახერხეს. ის თავის ტრავმითა და ფეხის მოტეხილობით თელავის რეფერალურ საავადმყოფოში გადაიყვანეს. ამჟამად ის თავს კარგად გრძნობს. 

თუშეთთან დამაკავშირებელი საავტომობილო გზა თელავის რაიონის სოფელ ფშაველიდან იწყება. ფშაველიდან თუშეთის ადმინისტრაციულ ცენტრამდე, სოფელ ომალომდე 72 კილომეტრია და მანქანით მის გავლას დაახლოებით 4 საათი სჭირდება. აბანოს უღელტეხილზე, რომელიც ზღვის დონიდან 2950 მეტრზეა, დიდთოვლობის გამო გზა 6 თვის განმავლობაში, ოქტომბრიდან მაისამდე იკეტება. ამ პერიოდში თუშეთში მოხვედრა მხოლოდ ვერტმფრენით შეიძლება.

თუშეთის საავტომობილო გზა ერთ-ერთი ყველაზე რთული გზაა საქართველოში. BBC–მ 2013 წელს ეს გზა ევროპის ყველაზე ექსტრემალური გზების ჩამონათვალში შეიყვანა.