მილაძე საქართველოს წინააღმდეგ: TikTok-ის ვიდეოს გამო დაჯარიმებულმა მოქალაქემ საქმე სტრასბურგში გაასაჩივრა
TikTok-ის ვიდეოს გამო დაკავებული
საქართველოს ახალგაზრდა იურისტთა ასოციაცია სტრასბურგში ასაჩივრებს სასამართლოს გადაწყვეტილებას, რომლის თანახმად TikTok-ზე გამოქვეყნებული ვიდეოს შინაარსის გამო კურიერი დააჯარიმეს.
საქმე ეხება მოქალაქე ირაკლი მილაძეს, რომელიც თბილისში კურიერად მუშაობს და ხშირად გადაადგილდება მოპედით.
მილაძემ სოციალურ ქსელ Tik-Tok-ზე გამოაქვეყნა ვიდეო მინაწერით: „ვისაც გინების მოსმენა არ გსურთ, არ უყუროთ და არ უსმინოთ“.
მილაძე თავის ვიდეოში მძიმე საცობების გამო აკრიტიკებს თბილისში არსებულ სატრანსპორტო დაგეგმარების პოლიტიკას. ასევე უხეშად მოიხსენიებდა თბილისის მერს და იმ მაღალჩინოსნებს, რომლებიც საზოგადოებრივი ტრანსპორტისთვის გამოყოფილ ზოლში (ბასლაინში) სამსახურებრივი მანქანებით გადაადგილდებიან, მაშინ როდესაც მოქალაქეები საცობში დგანან.
ამ ვიდეოს გამოქვეყნების შემდეგ სამართალდამცველებმა მილაძე დააკავეს წინასწარი დაკავების იზოლატორში ორი დღით.
2023 წლის მარტში თბილისის საქალაქო სასამართლომ, ვიდეოს გამო ირაკლი მილაძე სცნო დამნაშავედ წვრილმან ხულიგნობაში იმ დასაბუთებით, რომ სოციალური ქსელები საზოგადოებრივი თავშეყრის ადგილია და სოციალურ ქსელებში გინება არღვევს საზოგადოებრივ წესრიგსა და სიმშვიდეს. ასევე მილაძეს სამართალდამცავებისთვის წინააღმდეგობის გაწევაც ედებოდა ბრალად. სასამართლომ მას ორი, 2000-2000- ლარიანი ჯარიმა დააკისრა.
ეს პირველი შემთხვევაა საქართველოში, როდესაც მოქალაქე Tik-Tok-ის ვიდეოს გამო დააჯარიმეს.
საქართველოს იურისტთა ასოციაცია, რომელმაც ევროპული სასამართლოსთვის სარჩელი მოამზადა, აღნიშნავს, რომ ინტერნეტში საზოგადოებრივი მნიშვნელობის საკითხებზე გამოთქმული აზრის შეზღუდვა საშიში პრეცედენტი და გამოხატვის თავისუფლებაში გაუმართლებელი ჩარევაა.
მილაძე ადამიანის უფლებათა ევროპული სასამართლოსათვის წარდგენილი საჩივრით ევროპული კონვენციის მე-10 (გამოხატვის თავისუფლება) მუხლის დარღვევის დადგენას ითხოვს, ნათქვამია საიას განცხადებაში.
თავად მილაძე აქვეყნებს პოსტს ფეისბუკზე, სადაც მხარდამჭერებს სიხარულით ამცნობს, რომ მის საქმეს ევროპული სასამართლო განიხილავს
რადიო თავისუფლებისთვის მიცემულ ინტერვიუში მილაძე ამბობს, რომ აღნიშნული ინცინდენტის შემდეგ კვლავინდებურად აკრიტიკებს ხელისუფლებას სოციალურ ქსელებში, თუმცა ოჯახის წევრების თხოვნა გაითვალსწინა და საკუთარ მოსაზრებებს უფრო კორექტული ფორმით გამოხატავს.
