"ქართული ოცნება - ავტორიტარული და პრორუსული ჯგუფი" - The Washington Post-ის სტატია საქართველოს არჩევნებზე
The Washington Post-ის სტატია ოცნებაზე
The Washington Post-ის მიერ გამოქვეყნებულ სარედაქციო სტატიაში, რომელშიც განხილულია საქართველოში გასამართი საპარლამენტო არჩევნები, მმართველი პარტია “ქართული ოცნება” მოხსენიებულია როგორც “ავტორიტარული და პრორუსული ჯგუფი”.
გამოცემის მიხედვით, მმართველი პარტიის მიერ ბოლო პერიოდში გაკეთებული განცხადებები აჩვენებს, რომ ოქტომბრის არჩევნებზე საქართველოს დემოკრატიის ბედი გადაწყდება.
სტატიაში ასევე ნახსენებია აშშ-სა და ევროკავშირის მიერ ივანიშვილის რეჟიმის რუსული კანონის საპასუხოდ მიღებული ზომები. სტატიის ავტორების თქმით, აშშ-ს ხელისუფლება კიდევ უფრო მეტად უნდა გააქტიურდეს არჩევნებამდე დარჩენილ პერიოდში, რათა საქართველოში უზრუნველყოფილი იყოს არჩევნების სამართლიან გარემოში ჩატარება.
“პოლიტიკურ ჯგუფებს შორის თავისუფალი კონკურენციის გარეშე დემოკრატია ვერ იარსებებს. სწორედ ამიტომ არის ბოლო დროის სიახლეები სამხრეთ კავკასიაში მდებარე საქართველოდან ასეთი ამაღელვებელი. მმართველი ქართული ოცნების პარტია – ავტორიტარული, პრორუსული ჯგუფი, იმუქრება ყველა ოპოზიციური პარტიის აკრძალვით, თუ ის 26 ოქტომბრის საპარლამენტო არჩევნებში უმრავლესობას მოიპოვეს. ეს შესაძლოა იყოს საქართველოს დემოკრატიის ბოლო გამოძახილი. აშშ-ს მეტის გაკეთება შეუძლია მის გადასარჩენად” – ვკითხულობთ სტატიაში.
რაც შეეხება აშშ-ს გააქტიურებას წინასაარჩევნო პერიოდში, სტატიის ავტორები ხაზს უსვამენ, რომ ეს უნდა იყოს “ჭკვიანური, გაზომილი სანქციები” მმართველი პარტიის ავტორიტარული ტენდენციების საპასუხოდ. მათი თქმით, აშშ-მ უნდა გამოიყენოს არჩევნებამდე დარჩენილი დრო და თავისუფალი, სამართლიანი არჩევნებისა და ხმების დათვლის და არჩევნების შედეგების პატივისცემაზე ხმამაღლა ისაუბროს:
პრეზიდენტმა ბაიდენმა და კონგრესმა საქართველოს მოქალაქეებს უნდა უთხრან, რომ არ დაუშვებენ საქართველოში ერთპარტიულობას. თუ აშშ მსუბუქად უგულებელყოფს ამ სიტუაციას, შესაძლოა კიდევ ერთ პოლიტიკურად იმედის მომცემ პოსტსაბჭოთა რეგიონში ვიხილოთ დემოკრატიის სიკვდილი
20 აგვისტო მმართველმა პარტია “ქართული ოცნების” პოლიტსაბჭომ განცხადება გაავრცელა და ამომრჩეველს მოუწოდა, 26 ოქტომბერს გამოვიდეს “ქუდზე კაცი” და შექმნან “მყარი ფუნდამენტი” საქართველოს ეროვნული იდენტობის დასაცავად.
მმართველი პარტია წერს, რომ მათ საკონსტიტუციო უმრავლესობა სჭირდებათ იმისთვის, რათა “ნაციონალური მოძრაობა” და ყველა მისი “სატელიტი თუ მემკვიდრე პარტია” არაკონსტიტუციურად გამოაცხადონ.
ასევე, ქართული ოცნება აღნიშნავს, რომ საკონსტიტუციო უმრავლესობის მოპოვება საშუალებას მისცემთ მათ “ოჯახური ღირებულებებისა და არასრულწლოვანთა დაცვა” უმაღლეს ხარისხში განამტკიცონ.
გარდა ამისა, “ქართული ოცნების” თქმით, “მშვიდობიანი გზით საქართველოს ტერიტორიული მთლიანობის აღდგენის შემთხვევაში, აუცილებელი გახდება საქართველოს კონსტიტუციის ცვლილება, რათა საქართველოს მმართველობის სისტემა და ტერიტორიული სახელმწიფოებრივი მოწყობა ახალ რეალობასთან მოვიდეს შესაბამისობაში”.
მმართველი პარტიის მტკიცებით, ოპოზიცია “გარე დავალებას შეასრულებს” და ტერიტორიული მთლიანობის აღდგენისთვის აუცილებელ საკონსტიტუციო ცვლილებებს აუცილებლად წინ აღუდგება.
