მედიის ადვოკატირების კოალიცია გმობს ტელეკომპანია ფორმულას თანადამფუძნებელსა და წამყვანზე, მიშა მშვილდაძეზე თავდასხმას და მოუწოდებს ხელისუფლებას, სასწრაფოდ გამოიძიოს ფაქტი. ასევე, სახალხო დამცველი ლევან იოსელიანი მოუწოდებს პროკურატურას, შსს-დან საქმე სპეციალურ საგამოძიებო სამსახურს გადასცეს, რათა დადგინდეს, ხომ არ ჰქონდა ადგილი აზრის გამოხატვის გამო დევნას.
ოპოზიციური ტელეკომპანიის, „ფორმულას“ ერთ-ერთ დამფუძნებელს და პოლიტიკური გადაცემების წამყვანს, მიშა მშვილდაძეს უცნობი პირი ქუჩაში თავს დაესხა და ფიზიკურად გაუსწორდა. გამოძიება სისხლის სამართლის კოდექსის 126-ე მუხლით მიმდინარეობს, რაც ძალადობას გულისხმობს.
ეს მინიმუმ მეოთხე შემთხვევაა, როდესაც ქუჩაში თავს ესხმიან ხელისუფლების ოპონენტებს. ბოლო ათი დღის განმავლობაში ანალოგიური თავდასხმის ობიექტები გახდნენ პარტია „გირჩი -მეტი თავისუფლების“ ლიდერი ზურა ჯაფარიძე, პუბლიცისტი და ლიტერატორი ლევან ბერძენიშვილი, „ნაციონალური მოძრაობის“ წევრი დავით ოსიყმაშვილი.
მედიაკოალიციის განცხადება
“ქვეყანაში მედიის წარმომადგენლებზე თავდასხმა კვლავ სერიოზულ გამოწვევად რჩება. ხელისუფლების მხრიდან მედიის მიმართ დანაშაულებზე უმოქმედობა, კრიტიკული აზრის მიმართ ანტაგონისტური რიტორიკა თუ მიზანმიმართული დისკრედიტაცია მსგავსი სახის დანაშაულებს კიდევ უფრო ახალისებს.
[…] ჟურნალისტები მნიშვნელოვან როლს თამაშობენ ნებისმიერ დემოკრატიულ ქვეყანაში როგორც ხელისუფლების და, საზოგადოდ, ძალაუფლების მქონეთა მაკონტროლებლები. ხელისუფლების მიმართ კრიტიკული მედიასაშუალების დამფუძნებელზე თავდასხმა აშკარა მცდელობაა, ჩაახშოს მედიის თავისუფლება და არ მისცეს ჟურნალისტებს საშუალება, თავიანთი პროფესიული მოვალეობა შეასრულონ.
მედიის ადვოკატირების კოალიცია მოუწოდებს ხელისუფლებას, სასწრაფოდ გამოიძიოს მიშა მშვილდაძეზე თავდასხმის ფაქტი. მნიშვნელოვანია, რომ დამნაშავე პირები კანონის მთელი სიმკაცრით დროულად დაისაჯონ”.
“საქართველოს სახალხო დამცველი ლევან იოსელიანი გმობს მიშა მშვილდაძის მიმართ დღეს განხორციელებული ფიზიკური თავდასხმის ფაქტს და მოუწოდებს საქართველოს პროკურატურას, საქმე შინაგან საქმეთა სამინისტროდან, შემდგომი გამოძიების მიზნით, გადასცეს სპეციალურ საგამოძიებო სამსახურს, რათა დადგინდეს, ხომ არ ჰქონდა ადგილი ფიზიკური ძალადობით განხორციელებულ დევნას, აზრის გამოხატვის გამო.
სახალხო დამცველი მოუწოდებს საგამოძიებო უწყებას, გადადგას შესაბამისი ნაბიჯები პასუხისმგებელი პირების იდენტიფიცირების მიზნით; სწრაფად და სრულფასოვნად ჩატარდეს ყველა საგამოძიებო და საპროცესო მოქმედება, მოპოვებულ იქნას ვიდეო ჩანაწერები, გამოიკითხონ მოწმეები, ჩატარდეს სამედიცინო ექსპერტიზა და სხვა”.
