თამაზ გინტურის მკვლელობა: რა მოხდა კირბალში და რა ვერსია აქვს ცხინვალს

თამაზ გინტურის მკვლელობა

რუსეთის საოკუპაციო ძალების მიერ მოკლული 58 წლის თამაზ გინტურის ცხედარი სოფელ კირბალში, საკუთარ სახლში მიასვენეს.

კონკრეტულად რა მოხდა 6 ნოებერს, სოფელ კირბალაში, ლომისის ეკლესიასთან, უცნობია. შესაბამის უწყებები ამ საკითხზე განმარტებას ჯერჯერობით არ აკეთებენ.

სურათის აღდგენა მხოლოდ დაღუპულის ნათესავების მონაყოლით შეიძლება.

თამაზ გინტურის ნათესავმა, გიორგი დოლუაშვილმა ჟურნალისტებს უთხრა, რომ მოკლულს სამი ტყვია აქვს ზურგში მოხვედრილი და ის თავისსავე ავტომობილში დაიღუპა.

„მოკლეს ალალ-მართალი კაცი, თავის მამის საფლავზე იყო… არ შეიძლება აქო და ესროლეს. მოკლეს. მანქანა ახლაც იქ გდია, სამგან აქვს ტყვია [ზურგში] მოხვედრილი, მანქანის სავარძელზე იყო მკვდარი, შიგ მანქანაში მოკლეს. უკნიდან არის ნასროლი, სულ დაცხრილულია მანქანა… იბრძოდა 2008 წლის აგვისტოს ომში, მაგარი მებრძოლი იყო“, -მოჰყავს გიორგი დოლუაშვილის ციტატა “რადიო თავისუფლებას”.

ერთ-ერთი ვერსიით, თამაზ გინტური და ლევან დოთიაშვილი კირბალის სასაფლაოზე მივიდნენ, შემდეგ კი სანთლის დასანთებად იქვე, ლომისის ტაძრისკენ გადაინაცვლეს. ლომისის ტაძარს ამჟამად რუსეთის საოკუპაციო ზალების წარმომადგენლები აკონტროლებენ.

ცნობილია, რომ გინტური და დოთიაშვილი მანქანით იყვნენ. ერთ-ერთი ვერსიით, თავდაპირველად რუსმა სამხედროებმა დოთიაშვილის დაკავება სცადეს და გინტური მას გამოესარჩლა, რა დროსაც საოკუპაციო ძალებმა ცეცხლი გახსნეს.

ქართულმა მხარემ მომხდარის შესახებ ლევან დოთიაშვილის ზარით გაიგო. საოკუპაციო ძალების წარმომადგენლებმა დოთიაშვილის თამაზ გინტურის ტელეფონი მისცეს და სასწრაფოში დარეკვა დაავალეს.

● “წინა ხელისუფლების მოღალატეობრივი პოლიტიკის მემკვიდრეობა” – როგორ ეხმაურება მმართველი პარტია და პრეზიდენტი კირბალში მომხდარს
● “შემაშფოთებელია განცხადება ოჩამჩირეში რუსული ბაზების მოწყობაზე” – გამოხმაურება თბილისში
● “იარე ლიზა”- რას ჰყვება ახალი ქართული კინო აფხაზეთის ომზე და რატომ მოჰყვა მას ასეთი მძაფრი რეაქცია

გატაცებული ლევან დოთიაშვილის მამა, იური დოთიაშვილი ჰყვება:

„თვითონ დაარეკვინეს ჩემს ბიჭს მიცვალებულის ტელეფონით 112-ში. მე კარგად ვარო, მიხედეთ დაჭრილია თამაზიო და წაიყვანეს, წითელი ქურთუკი ეცვა“, – ჰყვება იური დოთიაშვილი.

იური დოთიაშვილის თქმით, თამაზ გინტურის ტელეფონზე ახლაც გადის ზარი მაგრამ არავინ პასუხებს.

იური დოთიაშვილი ამბობს, რომ მისი ვაჟი და თამაზ გინტური ლომისას წმინდა გიორგის ეკლესიაში მიდიოდნენ სანთლის დასანთებად:

“მაღაზიაში სანთელი იყიდეს და წავიდნენ ეტყობა უნდა ელოცათ…,” – ჰყვება ის ჟურნალისტებთან.

იური დოთიაშვილი ამბობს, რომ მიუხედავად იმისა, რომ ეკლესია ახლა რუსების კონტროლქვეშაა, ბევრი ადგილობრივი ამ წესს სხვადასხვა მიზეზის გამო ვერ იცავდა:

“გადასვლა რომ არ შეიძლება ყველამ ვიცით, მაგრამ ყველა ხომ ვერ ვემორჩილებით?! ნახირიც დაგვყავს, მეც შევყოლივარ ტყეში საქონელს და სად არის ჩასაფრებული და სად იმალება რაც გაიგებ. მანდ მავთულხლართები არ არის, ბოძებზე წითელი ლენტები შებმული,” – ამბობს გატაცებულის მამა.

სოფელში, ლომისის ეკლესიის მიმდებარედ, ახლაც დგას თამაზ გინტურის ავტომობილი, სამართალდამცველები საგამოძიებო მოქმედებებს ატარებენ.

კირბალაში 7 ნოემბერს პრეზიდენტი სალომე ზურაბიშვილი ჩავიდა. მან მოკლულის ოჯახს მიუსამძიმრა.

ერგნეთის შეხვედრა

მომხდართან დაკავშირებით 7 ნოემბერს ერგენეთში, საქართველოს ცენტრალური ხელისუფლების მოთხოვნით, აოკუპაციო ძალების წარმომადგენლებთან საგანგებო შეხვედრა გაიმართა. 

თბილისმა თამაზ გინტურის მკვლელობაში დამნაშავეთა დასჯა და ლევან დოთიაშვილის გადმოცემა მოითხოვა.

შეხვედრაზე, რუსული და ოსური მხარის წარმომადგენლებმა თქვეს, რომ მომხდარზე გამოძიებას თავად აწარმოებენ. მათი თქმით, დაკავებული დოთიაშვილი დაჭრილი არ არის და ამჟამად ცხინვალის ციხეში იმყოფება.

როგორია ლევან დოთიაშვილის ჯანმრთელობის მდგომარეობა რეალურად, საქართველოს უსაფრთხოების სამსახური  ინფორმაციას ჯერჯერობით ვერ აზუსტებს.

შინაგან საქმეთა სამინისტრომ მომხდარზე გამოძიება სისხლის სამართლის კოდექსის 109-ე და 143-ე მუხლებით დაიწყო, რაც განზრახ მკვლელობას და თავისუფლების უკანონო აღკვეთას გულისხმობს.

სამხრეთ ოსეთის დე-ფაქტო ხელისუფლების ვერსია

მომხდარზე საკუთარ ვერსიას ავრცელებს სამხრეთ ოსეთის დე-ფაქტო ხელისუფლების უშიშროების სამსახური. მათი ვერსია ასეთია – ორი მამაკაცი ნასვამ მდგომარეობაში მართავდა მანქანას და ცდილობდა სასაზღვრო საგუშაგოზე შევადნას. ერთ-ერთს ჰქონდა ნაჯახი.

არაღიარებული რესპუბლიკის კგბ-ს ვერსიით, სასაზღვრო სამსახურის წარმომადგენლებმა ჯერ ჰაერში გამაფრთხილებელი ცეცხლი გახსნეს, შემდეგ კი მანქანის ბორბლებს ესროლეს. „შედეგად, ერთ-ერთი დამრღვევი მძიმედ დაშავდა და გადაუდებელი სამედიცინო დახმარებისთვის საქართველოში გადაიყვანეს“, – წერია ოსური კგბ-ს განცხადებაში.

დე-ფაქტო ხელისუფლება ოფიციალურ განცხადებებში გინტურს და დოთიაშვილს “საქართველოს ყოფილი პრეზიდენტის, მიხეილ სააკაშვილის პარტიის რადიკალ წარმომადგენლებად” მოიხსენიებს, რომლებმაც “უკანონოდ გადაკვეთეს სამხრეთ ოსეთის სახელმწიფო საზღვარი მის ტერიტორიაზე ღრმად შეღწევის მიზნით მანქანით”.

„სამხრეთ ოსეთი მომავალშიც გააგრძელებს ყველა კანონიერი ზომის მიღებას მისი სუვერენული ტერიტორიისა და საჰაერო სივრცის საზღვრების დასაცავად. კიდევ ერთხელ მოვუწოდებთ თბილისს, მიიღოს ჩვენი წინადადება და დაიწყოს ერთობლივი მუშაობა სახელმწიფო საზღვრის დელიმიტაციისა და დემარკაციის შესახებ, რაც, სხვა საკითხებთან ერთად, გულისხმობს ცივილიზებული და გამჭვირვალე წესებით საზღვრის გადაკვეთის პროცედურის განსაზღვრას“, – ნათქვამია დე-ფაქტო საგარეო საქმეთა სამინისტროს განცხადებაში.