საქართველოს პრემიერმინისტრმა ირაკლი ღარიბაშვილმა მთავრობის სხდომაზე განაცხადა, რომ სწავლის საფასურის გადაუხდელობის გამო სტატუსშეჩერებულ სტუდენტებს ფინანსური დავალიანება გაუნულდებათ.
განათლებისა და მეცნიერების სამინისტროს ცნობით კი საქართველოს პრემიერმინისტრის გადაწყვეტილება კერძო უნივერსიტეტების სტუდენტებსაც შეეხებათ. სამინისტრო აღნიშნავს, რომ სწავლის საფასურის გადაუხდელობის გამო სტატუსშეჩერებულ სტუდენტებს არსებულ დავალიანებას სახელმწიფო გაუნულებს.
“მოვიკითხე ეს ინფორმაცია, დაახლოებით 30 000-მდე სტუდენტს ფინანსური დავალიანების გამო აქვს შეჩერებული სტატუსი. ამიტომ, ჩემი გადაწყვეტილებით, ყველა ამ სტუდენტს, ვისაც შეჩერებული აქვს სტატუსი ფინანსური დავალიანების გამო, გაუნულდებათ დავალიანება. მათ შეეძლებათ, რომ სურვილის შემთხვევაში აღადგინონ სტუდენტის სტატუსი და გააგრძელონ სწავლა თავიანთ უნივერსიტეტებში.” – თქვა პრემიერმა.
ირაკლი ღარიბაშვილის განმარტებით, ეს არის დაახლოებით 40 მილიონი ლარის დავალიანება. მან დაავალა განათლების და ფინანსთა მინისტრებს, “დღესვე დაიწყონ კომუნიკაცია” და “სასწრაფოდ მოაგვარონ” საკითხი.
“ძალიან მნიშვნელოვანია, ჩვენს ახალგაზრდებს, ჩვენს სტუდენტებს მიეცეთ საშუალება, ამ ფინანსური დავალიანების ჩამოწერის შემდეგ, კვლავაც შეძლონ, გააგრძელონ სწავლა.” – განაცხადა მან.
განათლებისა და მეცნიერების სამინისტროს განცხადება
“იმ უმაღლესი საგანმანათლებლო დაწესებულებებისთვის, რომლებიც სურვილს გამოთქვამენ და შეუერთდებიან სტუდენტებისთვის ამ უმნიშვნელოვანეს გადაწყვეტილებას, სამინისტროები შეიმუშავებენ საჭირო რეგულაციებს, რათა შეიქმნას შესაბამისი პირობები სტუდენტებისთვის დაგროვებული დავალიანების გასანულებლად.
მოგეხსენებათ, წლების განმავლობაში სტუდენტებისთვის სწავლის გადასახადის დაფარვა პრობლემას წარმოადგენდა – ხშირად ფინანსური დავალიანების გამო სტუდენტები იჩერებდნენ სტატუსს. დღეის მდგომარეობით, საჯარო და კერძო უნივერსიტეტებში ასეთი დაახლოებით 30 000-მდე საქართველოს მოქალაქე სტუდენტია, რომელთაც ახალი გადაწყვეტილების შედეგად, სურვილის შემთხვევაში, სტატუსის აღდგენისა და სწავლის გაგრძელების შესაძლებლობა მიეცემათ.” – აცხადებს სამინისტრო.
