"საქართველო ალიანსის უახლოესი პარტნიორია" - სტოლტენბერგი ირაკლი ღარიბაშვილს შეხვდა

სტოლტენბერგი ირაკლი ღარიბაშვილს შეხვდა

NATO-ს გენერალური მდივანი იენს სტოლტენბერგი პრემიერმინისტრ ირაკლი ღარიბაშვილს ბრიუსელში, NATO-ს შტაბბინაში შეხვდა. შეხვედრის შემდეგ გამართულ ბრიფინგზე სტოლტენბერგმა აღნიშნა, რომ საქართველო ალიანსის უახლოესი პარტნიორია და ისინი მხარს უჭერენ საქართველოს ტერიტორიულ მთლიანობასა და სუვერენიტეტს.

NATO-ს გენერალური მდივნის თქმით, შეხვედრაზე განხილვის ერთ-ერთი თემა უკრაინაში მიმდინარე რუსული აგრესია იყო. მისი განმარტებით, რუსული აგრესია არის “ტოქსიკური აქტი”, რომელიც ერთხელ და სამუდამოდ უნდა შეწყდეს, რასაც, “საქართველო და ქართველი ხალხი კარგად იაზრებენ”.

“ჩვენ მუდმივად მოვუწოდებთ რუსეთს, აღიაროს საქართველოს ტერიტორიული მთლიანობა. დღევანდელ შეხვედრაზე ჩვენ ვისაუბრეთ საქართველო-NATO-ს პარტნიორობის შესახებ და იმაზე, როგორ შეგვიძლია უფრო გავაღრმაოთ აღნიშნული პარტნიორობა. ასევე, NATO-საქართველოს არსებით პაკეტზე.” – განაცხადა სტოლტენბერგმა.

მან ასევე აღნიშნა, რომ NATO სრულად უცხადებს საქართველოს პოლიტიკურ და პრაქტიკულ მხარდაჭერას და პირველ რიგში, “ვუცხადებთ” მხარდაჭერას საქართველოს შიდა რეფორმებს:

“სწორედ ამიტომ მოვუწოდეთ მთავრობას, უკან გაეხმო კანონი უცხოელი აგენტების შესახებ, რომელიც არ შეესაბამებოდა დემოკრატიულ პრინციპებს. ქართველმა ხალხმა არაერთხელ გაუსვა ხაზი მათ მისწრაფებას, რომ ჰქონდეთ დემოკრატიული ქვეყანა, რომელიც ინტეგრირებული იქნება ევროატლანტიკურ რეგიონში. NATO აგრძელებს თქვენთან პარტნიორობას, ამ მისწრაფებების კვალდაკვალ.“

საქართველოს პრემიერის, ირაკლი ღარიბაშვილის თქმით, ქვეყანა მიზნად ისახავს გააღრმაოს NATO-სთან პრაქტიკული თანამშრომლობა.

“აქტიურად ვმუშაობთ ამჟამადაც ე.წ. 12 პრიორიტეტის, 12 პუნქტის განხორციელებაზე, რომელიც საკმაოდ სწრაფად დაინერგება პრაქტიკაში და ჩვენ ვფიქრობთ, რომ საქართველო იმსახურებს კანდიდატის სტატუსს. მე, ასევე, მინდა აღვნიშნო, რომ მქონდა იმის პრივილეგია 2015 წელს მეხელმძღვანელა NATO-საქართველოს დაძმობილების პროექტისათვის და მის ფარგლებში გახსნილი ცენტრისთვის, რომელიც ოპერირებს 2015 წლიდან ძალიან პროდუქტიულად, შესაბამისად, ჩვენ მიზნად ვისახავთ, რომ გავაღრმაოთ NATO-სთან პრაქტიკული თანამშრომლობა ყველა მიმართულებით, ყველა განზომილებაში.” -განაცხადა ღარიბაშვილმა.

მისივე თქმით, საქართველოს აქვს საკმაოდ კარგი გამოცდილება ალიანსის მისიებში წვლილის შეტანის კუთხით. ღარიბაშვილის განმარტებით, საქართველოს წვლილი შეაქვს ევროატლანტიკურ მშვიდობასა და უსაფრთხოებაში, “რაც ყველასთვის” კარგად არის ცნობილი:

“საქართველოს ევროატლანტიკური მისწრაფება კვლავ რჩება ჩვენი საგარეო პოლიტიკის მთავარ პრიორიტეტად. ასევე, მსურს აღვნიშნო, რომ ჩვენ მივაღწიეთ მნიშვნელოვან წინსვლას. ბოლო ათი წლის განმავლობაში, ჩვენ მოვაწერეთ ხელი ევროკავშირთან ასოცირების ხელშეკრულებას, ასევე, თავისუფალი ვაჭრობის ხელშეკრულებას, მოვიპოვეთ ევროკავშირთან უვიზო მიმოსვლა. გასულ წელს უკვე მივიღეთ ევროპული პერსპექტივა, რაც ისტორიული გადაწყვეტილება იყო და ჩვენ აქტიურად განვაგრძობთ მუშაობას ე.წ. 12 პუნქტის განხორციელებაზე, რომელიც ძალიან მალე დასრულდება.”

● “დემოკრატიული ლპობის საფუძველი ბიძინა ივანიშვილია” – დებატები ევროპარლამენტში საქართველოზე 
● აშშ-მ ჩინჩალაძე, მურუსიძე და კიდევ ორი მოსამართლე დაასანქცირა
● აშშ-ის მოქალაქე საქართველოში არ შემოუშვეს. სუს-ის ამბობს, რომ ის დესტრუქციული ჯგუფების ტრენინგებთან იყო კავშირში

სტოლტენბერგთან შეხვედრამდე საქართველოს მთავრობის მეთაური ევროპული საბჭოს პრეზიდენტს, შარლ მიშელს შეხვდა. შეხვედრის შემდეგ ღარიბაშვილმა ტვიტერზე დაწერა:

“ნაყოფიერი შეხვედრა გავმართე ევროპული საბჭოს პრეზიდენტთან. ჩვენს შორის არსებული ურთიერთობები სულ უფრო ძლიერდება. საქართველო მზადაა დაასრულოს 12 რეკომენდაციის შესრულების პროცესი და იმსახურებს კანდიდატის სტატუსს. საქართველოსა და ევროკავშირის ერთობლივი ძალისხმევით, ჩვენ ხელს შევუწყობთ რეგიონში მშვიდობას, დემოკრატიასა და ეკონომიკურ ზრდას.”

Productive meeting w/ @eucopresident. We continue strengthening our relations. 🇬🇪 is committed to finalizing 12 recommendations and deserves candidate status this year. Together 🇬🇪🇪🇺 will promote peace, democracy & economic growth in the region. pic.twitter.com/RorLO67WG9

— Irakli Garibashvili (@GharibashviliGe) April 25, 2023

უკვე მეორე დღეა საქართველოს პრემიერ-მინისტრი ბრიუსელში იმყოფება და მაღალი დონის შეხვედრებს მართავს.