სამხრეთი ოსეთი რუსეთთან საერთო საბაჟოს ქმნის

საკონტროლო-გამშვები პუნქტ “ქვემო ზარამაგს” – ერთდაერთს, რომლის გავლითაც რუსეთსა და სამხრეთ ოსეთს შორის გადაადგილება ხდება, ამიერიდან რუსული და სამხრეთოსური საბჟო ერთობლივად გააკონტროლებს.

აქამდე ტვირთს საბაჟო შემოწმება ორჯერ უნდა გაევლო – ჯერ რუსული, შემდეგ კი ოსური. ახლა კი, ამ მიმდინარე წლის ბოლომდე პოსტი “Рук” როკის გვირაბის სამხრეთის მხრიდან მუშაობას შეწყვეტს, ხოლო ოსი მესაზღვრეები საზღვრის რუსულ მხარეს გადავლენ და კონტროლს რუსულ საბაჟო სამსახურთან ერთობლივად განახორციელებენ. ასეთი გადაწყვეტილება მიღებულია რუსეთსა და სამხრეთ ოსეთს შორის რუსული და სამხრეთ ოსური საბაჟო ორგანოების ინტეგრაციის შესახებ დადებული ხელშეკრულების შესაბამისად, რომელსაც ხელი 2016 წელს მოეწერა.

როგორც ჟურნალისტებს სამხრეთი ოსეთის საბაჟო კომიტეტის ხელმძღვანელმა მურატ ცხოვრებოვმა აცნობა, ეს ცვლილება მნიშვნელოვნად შეამცირებს ტვირთების მომსახურების დროს. კერძოდ, ყველა სახის გაფორმება ერთ ფანჯარაში მოხდება. “მაგალითად, თუკი რუსი მებაჟე საქონელს ექსპორტისთვის აფორმებს, იქვე სამხრეთელი ოსი თანამშრომელი იმავე საქონლის იმპორტს გააფორმებს”, – თქვა ცხოვრებოვმა.

საბაჟო სფეროში დადებული ხელშეკრულება ასევე ითვალისწინებს 2020 წლისთვის სამხრეთოსური საბაჟოს  ევრაზიული კავშირისა და რუსეთის კანონმდებლობაზე გადაყვანას.

სტატიაში გამოთქმული მოსაზრებები, ტერმინები და პოზიცია მთლიანად ავტორს ეკუთვნის და, შესაძლოა, რედაქციის აზრს არ ემთხვეოდეს.