სომხეთი: ლინჩის წესით გასამართლება ასობით ადამიანის მონაწილეობით ქალაქ გავარში

სომხეთში, ქალაქ გავარში, რომელიც დედაქალაქიდან 90 კმ-ით არის დაშორებული, მოხდა ორმაგი მკვლელობა, რომელმაც მასობრივი არეულობისა და 500 ადამიანის მონაწილეობით ლინჩის წესით გასამართლების პროვოცირება გამოიწვია.

ინციდენტი 28 აპრილს მოხდა, მაგრამ აქამდე უცნობია, თუ კერძოდ რა გახდა ამ სისხლიანი მოვლენების მიზეზი.

რა მოხდა – დეტალები

სომხეთის მედიაში იმის შესახებ წერენ, რომ უკანასკნელი სისხლიანი მოვლენები არასრულწლოვან გავარელებს შორის ორი თვის წინათ დაწყებული გარჩევების გაგრძელებაა. ახალგაზრდებს შორის საქმის გარჩევაში უფროსებიც ჩაერივნენ და გავარის ერთ-ერთ ქუჩაზე ატყდა სროლა.

ქსელში გაჩნდა ვიდეო, რომელზეც ჩანს, თუ როგორ ჩერდება გზაზე მანქანები, იქიდან რამდენიმე მამაკაცი გადმოდის და სროლას იწყებს.

საბოლოოდ, მოკლეს ორი ადამიანი, რომელთაგან ერთ-ერთი სამხედრო პოლიციის გამომძიებელია. კიდევ ოთხი საავადმყოფოში ჭრილობებით გადაიყვანეს.

ორი თავდამსხმელი თავიანთი ავტომობილით გაიქცა, მაგრამ ავარია მოუვიდათ და ახლა ისინიც საავადმყოფოში იმყოფებიან.

ერევნიდან გავარში პოლიციის დამატებითი ძალები გაგზავნეს. შემთხვევის ადგილას თავად პოლიციის უფროსიც გაემგზავრა.

ვიდრე ძალოვანი სტრუქტურების წარმომადგენლები დანაშაულის ადგილას მუშაობდნენ, გავარის საავადმყოფოში, სადაც დაჭრილები მიიყვანეს, 500 ადამიანი შეიჭრა.

ასობით ადამიანმა პოლიციის კორდონი გაარღვია, მათ სამედიცინო ცენტრში ყველაფერი დალეწეს და ორმხრივი სროლის მონაწილე პაციენტების პალატაში შეაღწიეს. მედიაში წერდნენ, რომ ისინი მოკლულების მეგობრები და ნათესავები იყვნენ და მათ ლინჩის წესი აღასრულეს – დაჭრილებს ყელი გამოჭრეს.

თუმცა, საგამოძიებო კომიტეტის პრეს-სამსახურმა ეს ცნობა უარყო და ოფიციალურად განაცხადა, რომ გავარელმა „შურისმაძიებლებმა“ პოლიციის ჩარევის შემდეგ  „დანაშაულის ბოლომდე მიყვანა ვერ შეძლეს და მიიმალნენ“.

უკვე დაკავებულია თავდასხმის 50 მონაწილე. გავარის საავადმყოფო, დარბევის მიუხედავად, მუშაობას აგრძელებს. შესაძლო არეულობის შემთხვევისთვის, ის პოლიციის საგანგებო კონტროლის ქვეშაა.

                        რას წერენ სოციალურ ქსელებში

სოციალური ქსელების მომხმარებლები მოვლენების განვითარებას აკვირდებიან და აქტიურად წერენ კომენტარებს. აი, Facebookის მომხმარებელთა რამდენიმე ჩანაწერი:

 „სამარცხვინო სიტუაციაა! ჩვენთან ყველა მოცლილი კრიმინალური ავტორიტეტი ხდება. იმ 500 ადამიანიდან 300-ს ნამდვილად პურის ფულიც კი არ აქვს“;

 „კარგი. ახალგაზრდებს არ ესმით. სისხლი უდუღთ, უფროსებმა კი რა გააკეთეს? ურთიერთპატივისცემა არ არსებობს, ერთმანეთის პატიების უნარი არ აქვთ! თავი ყველას ყოვლისშემძლე ჰგონია! რა პოლიციის და სახელმწიფოს  ბრალია?“;

 „ახალგაზრდების მტრობა გვერდზე გადავდოთ. ამის გაგება კიდევ როგორღაც შეიძლება – ახალგაზრდები არიან. მაგრამ პოლიციამ როგორ დაუშვა, რომ 500 ადამიანი საავადმყოფოში შევარდა და იქაურობა დალეწა? თუ ისინი ერთი სოფლის მაცხოვრებლები არიან, მთელი სოფელი უნდა დაისაჯოს!“;

„პოლიცია თავის ადგილას უნდა იყოს, და უფრო – მკაცრი!“;

 „ხომ ამბობთ, საგანგებო მდგომარეობის რეჟიმიაო! სად იყვნენ პოლიციელები, რომლებიც სულ თვლ-ყურს გვადევნებენ და ანკეტებს გვიმოწმებენ?“.