სინოდი ზიარების წესს არ ცვლის - ტაძრებში მსახურება გახმოვანდება

სინოდის სხდომის დასრულების შემდეგ ახალქალაქისა და კუმურდოს მიტროპოლიტმა ნიკოლოზმა განაცხადა, რომ კორონავირუსის პანდემიის შეჩერების თაობაზე ეკლესია გაითვალისწინებს ყველა რეკომენდაციას, მაგრამ ზიარების საიდუმლოს მადლმოსილებაში ეჭვს ვერ შეიტანს:

“ჩვენ ასე მიგვაჩნია და წმინდა სინოდში არავითარი აზრთა სხვადასხვაობა არ არის. ეჭვის შეტანა იმაში, რომ ზიარების საერთო კოვზით ვინმეს შეიძლება ინფექცია გადაედოს, ეს არის ყოვლად გამორცხული. შესაბამისად, ამას რაც შეეხება, არავითარი ცვლილება არ შეიძლება იყოს.

ჩვენ ყველა რეკომენდაციას გავითავლისწინებთ, ერთადერთი რასაც ვერ გავითვალისიწინებთ და არც არსებობს ასეთი რეკომენდაცია, რომ ეჭვი  შევიტანოთ საიდუმლოების მადლმოსილებაში და მისტიურ კავშირში ღმერთთან.”

მეუფე ნიკოლოზის თქმით, კორონავირუსის პრევენციისთვის “შეიმუშვეს რეკომენდაცია” და  შეძლებისდაგვარად, ყველა ტაძარში მსახურება გახმოვანდება.  

ასე ჩატარდება სააღდგომო ლიტურგიაც და მრევლი  თვითონ აირჩევს, ტაძარში იყოს თუ “სუფთა ჰაერზე” მოისმინოს წირვა.

“ცვლილება იქნება სასიკეთო ის, რომ ესეთი რეკომენდაცია გვექნება, რომ შეძლებისდაგვარად ყველა ტაძარმა მოახერხონ მსახურების გახმოვანება იმისთვის, რომ არ იყოს სიმჭიდროვე. ჩვენი რეკომენდაციებია, რომ ჯანდავის სამინისტროს რეკომენდაციები დაიცვან მორწმუნეებმა”, – განაცხადა მეუფე ნიკოლოზმა.

• სასულიერო პირებმა თბილისის ქუჩები აკურთხეს
• კორონავირუსი: არავითარი ხელის ჩამორთმევა. ერთმანეთს იდაყვებით, მუშტებით და ფეხებით ვესალმებით
• როგორ ვრცელდება საქართველოში ვირუსი და რა კავშირი აქვთ ერთმანეთთან ინფიცირებულებს

საქართველოში კორონავირუსის შემთხვევის ლაბორატორიულად დადასტურებისთანავე საჯარო თავშეყრის ადგილებში სადეზინფექციო სამუშაოები ჩატარდა. გარდა ამისა, სწავლა შეწყდა სკოლამდელ, საშუალო და ზოგადსაგანმანათლებლო დაწესებულებებში.

ეპიდემიოლოგები და საქართველოს დაავადებათა კონტროლის ეროვნული ცენტრი თვითიზოლაციის, ხელების ხშირი დაბანის და მხოლოდ საკუთარი ჭურჭლის გამოყენების ინსტრუქციებს გასცემს.

მიუხედავად ამისა, საქართველოს საპატრიარქომ მტკიცედ განაცხადა, რომ ზიარების წესის შეცვლას არ აპირებს და მრევლი, ათობით ადამიანი კვლავ ერთი კოვზით ეზიარება.

დაავადებათა კონტროლის ეროვნულ ცენტრის ერთადერთი რეკომენდაცია, რომელიც საპატრიარქომ საქართველოში კორონავირუსით ინფიცირებულთა რაოდენობის ზრდის ფონზე გაითვალისწინა, ეკლესიებში დეზინფექციის ჩატარებაა.

17 მარტს კი პატრიარქის ბრძანებით, მართლმადიდებელი ეკლესიის სასულიერო პირებმა კორონავირუსის პრევენციის მიზნით თბილისის ქუჩები აკურთხეს.

20 მარტის მდგომარეობით, საქართველოში კორონავირუსით ინფიცირების 44 შემთხვევაა დადასტურებული. კარანტინის რეჟიმშია 1925 ადამიანი, ხოლო სტაციონარში მეთვალყურეობის ქვეშ – 271.