შსს-მ ბანკზე თავდასხმაში ბრალდებულის ვინაობა დაასახელა. საქმეს ტერორიზმის მუხლით იძიებენ
შინაგან საქმეთა სამინისტრო ადასტურებს, რომ ზუგდიდში, „საქართველოს ბანკის“ ფილიალზე მომხდარი თავდასხმა ბადრი ესებუამ განახორციელა.
ამის შესახებ სპეციალურ ბრიფინგზე მინისტრის მოადგილემ, ვლადიმერ ბორცვაძემ განაცხადა.
როგორც ბორცვაძემ აღნიშნა, ესებუას იდენტიფიცირება თავდასხმის ღამესვე მოხდა.
მან ბრიფინგი მედიის შესახებ საუბრით დაიწყო და ისინი შსს-ს მუშაობაში ხელის შეშლაში დაადანაშაულა:
„შინაგან საქმეთა სამინისტროს მიერ მიმდინარე წლის 25 ოქტომბერს გავრცელებული განცხადების და მასში აღნიშნული მოწოდების მიუხედავად, გარკვეულმა მედიასაშუალებებმა ზუგდიდში, „საქართველოს ბანკის” ფილიალზე მომხდარ თავდასხმაში იდენტიფიცირებული პირის ფოტოების და ვინაობის შესახებ ინფორმაცია გაავრცელეს, იმაზე ადრე, ვიდრე ამას სამინისტრო დაადასტურებდა”.
მინისტრის მოადგილის განცხადებით, გამოძიება ტერორისტული აქტის, ადამიანების მძევლად ხელში ჩაგდების და ცეცხლსასროლი იარაღის უკანონოდ შეძენა შენახვა ტარების მუხლებით მიმდინარეობს, რაც, შესაბამისად, 236-ე, 323-ე და 329-ე მუხლებია.
“მისი ადგილსამყოფელის დადგენის მიზნით პოლიცია საგამოძიებო სამძებრო მოქმედებებს აქტიურად განაგრძობს“, – განაცხადა ბორცვაძემ.
მან ასევე აღნიშნა, რომ ინფორმაცია იმის შესახებ, თითქოს ბოროტმოქმედი დააკავეს და გაექცათ, ტყუილია.
„უტიფრად სიცრუის ტირაჟირება და გავრცელებაა ის, რომ თითქოს ბოროტმოქმედი დავაკავეთ და გაგვექცა, ტყუილია ეს ყველაფერი, არ შეესაბამება სიმართლეს. გპირდებით, დაუყოვნებლივ, მას შემდეგ, რაც ბოროტმოქმედის დაკავება მოხდება, ამის შესახებ ინფორმაციას პირველი ჩვენგან გაიგებთ“
„მთავარმა არხმა” 25 ოქტომბერს გაავრცელა ინფორმაცია, რომ ბანკზე თავდამსხმელი სავარაუდოდ სწორედ ბადრი ესებუა იყო.
● როგორ აფასებენ ზუგდიდის მოვლენებს პოლიტიკოსები და ექსპერტები
● რატომ გარბიან აფხაზი ყაჩაღები საქართველოში, ქართველები კი – აფხაზეთში
● გომელაურის თქმით, ზუგდიდის ბანკის მძარცველს ბანკის კუთვნილი თანხა მისცეს და არა ბიუჯეტის
21 ოქტომბერს, დაახლოებით 14 საათსა და 20 წუთზე შეიარაღებული პირი შეიჭრა ზუგდიდის ცენტრში, გამსახურდიას გამზირზე მდებარე “საქართველოს ბანკის” შენობაში და მძევლად აიყვანა 43 ადამიანი.
თავდამსხმელი ბანკის შენობაში 8 საათზე მეტხანს იმყოფებოდა. იგი ერთ-ერთი მძევლის დახმარებით დაუკავშირდა ტელეკომპანია “მთავარს” და თავისი მოთხოვნები გააცნო – ნახევარი მილიონი დოლარი, უიარაღო მომლაპარაკებელი და უსაფრთხოების გარანტიები.
საღამოს ათი საათისთვის, თავდამსხმელმა მიიღო მოთხოვნილი თანხა და ყველა მძევალი გაათავისუფლა სამის გარდა. სამ ადამიანთან ერთად, რომელთა შორის იყოს სამხარეო პოლიციის უფროსი ავთანდილ გალდავა, თავდამსხმელმა ბანკის შენობა დატოვა და ავტომობილით გაურკვეველი მიმართულებით წავიდა. მოგვიანებით მან ის სამი მძევალიც გაათავისუფლა, თავად კი, მიიმალა.
