სექსუალური სკანდალის სამიზნეში "ახალი აზერბაიჯანის" ხელმძღვანელები აღმოჩნდნენ
აზერბაიჯანი სექსუალური სკანდალების ახალმა ტალღამ მოიცვა. წინა შემთხვევებისგან განსხვავებით, როდესაც გავრცელებული ინტიმური ვიდეოს მთავარი მიზანი ოპოზიციონერების კომპრომეტირება იყო, ამჯერად სამიზნეში ხელისუფლებაში მყოფი პარტიის, „ახალი აზერბაიჯანის“ ხელმძღვანელები აღმოჩნდნენ. ექსპერტები თაღლითების ვიდეოზარების შესახებ გაფრთხილებით გამოდიან.
- აზერბაიჯანში ოპოზიციონერს თავისი დის ინტიმური ვიდეოთი აშანტაჟებდნენ
- მოლდოვა: სექს-სკანდალები, როგორც პოლიტიკის მოქმედი ინსტრუმენტი
- „ის თამთა მენატრება, 30 სექტემბრამდე რომ იყო“
რა მოხდა?
8 სექტემბერს, აზერბაიჯანის პროსახელისუფლებო საინფორმაციო ვებგვერდებმა გაავრცელეს პარტია „ახალი აზერბაიჯანის“ ბინაგადის რაიონული ორგანიზაციის თავმჯდომარის, რამიზ გოიუშოვის ინტიმური ვიდეო. ქალაქ ბაქოს ერთ-ერთი უმსხვილესი რაიონის მმართველი პარტიის რაიონული ორგანიზაციის 67 წლის ხელმძღვანელს „ეჭვიც არ ჰქონდა, რომ ვიდეოზარი იწერებოდა და ვერ გააკონტროლა თავისი ვნება“, აღნიშნულია ინფორმაციაში.
თავად გოიუშოვმა კომენტარი გააკეთა გავრცელებულ ვიდეოზე და აღნიშნა, რომ ის შანტაჟის მიზნით არის გაყალბებული:
„დღეს, ვიდეოზარით დამიკავშირდა უცნობი გოგო. რამდენჯერმე გავუთიშე, მაგრამ ის რეკავდა და რეკავდა. ბოლოს და ბოლოს, ვუპასუხე. თავდაპირველად ვერ მივხვდი, რა ხდებოდა. გოგო ნახევრად შიშველი იყო. უკმაყოფილება გამოვხატე და ზარი გავთიშე. შემდეგ მან კვლავ დამირეკა. გავრცელებულ კადრებში ნათლად ჩანს, რომ არ მესმის რა ხდება, რადგან პირველად მქონდა შეხება მსგავს რამესთან. როდესაც გოგონას მიზანს მივხვდი, დავბლოკე. გარკვეული დროის შემდეგ, თურქული ნომრიდან ეს ვიდეო გამომიგზავნეს. მაშანტაჟებდნენ და მითხრეს, რომ თუკი მათთან კავშირს გავწყვეტდი, ამ ვიდეოს გაავრცელებდნენ. რა თქმა უნდა, უარი ვუთხარი. ახლა მათ ის გამოაქვეყნეს, რათა შური იძიონ ჩემზე“.
პარტიის რეაქცია
მმართველმა პარტიამ, რომლის თავმჯდომარეც ქვეყნის პრეზიდენტი ილჰამ ალიევია, იჩქარა იმის გამოცხადება, რომ „დაზარალებული“ ამ დროისთვის აღარ არის რაიონული ორგანიზაციის თავმჯდომარე.
უფრო მეტიც, 10 სექტემბერს პარტია „ახალი აზერბაიჯანის“ ხელმძღვანელობის შეკრება გაიმართა, რომლის დროსაც, რამიზ გოიუშოვი პოლიტიკური ორგანიზაციის რიგებიდან გარიცხეს.
ოპოზიციონერი საწინააღმდეგოს ამტკიცებს
მაგრამ პარტია „ახალი აზერბაიჯანის“ მიერ გამოქვეყნებული დოკუმენტების გაანალიზების შემდეგ, ოპოზიციური პარტიის, „რესპუბლიკური ალტერნატივის“ ერთ-ერთი ლიდერი ნატიკ ჯაფარლი ამტკიცებს, რომ ვიდეოს გავრცელების მომენტში რამიზ გოიუშოვი აზერბაიჯანის სახელისუფლებო პარტიის რაიონული ორგანიზაციის ხელმძღვანელის პოსტს იკავებდა:
„პარტია „ახალი აზერბაიჯანის“ ოფიციალურ განცხადებაში ნათქვამია, რომ 30 ივნისს, საანგარიშო კონფერენციის მიმდინარეობის დროს, რამიზ გოიუშოვმა რაიონული ორგანიზაციის თავმჯდომარის პოსტი დატოვა.
მაგრამ მმართველი პარტიის ოფიციალური ვებგვერდი ვნახე. დიახ, 30 ივნისს, მართლაც ჩატარდა საანგარიშო კონფერენცია. მასში ორგანიზაციის მუშაობა შეფასებულია დამაკმაყოფილებლად, მაგრამ ხელმძღვანელის ცვლილების შესახებ არანაირი ინფორმაცია არ არის. იქ კონფერენციის ვიდეოჩანაწერიც დევს, სადაც ნათლად ჩანს, როგორ ხსნის და შემდეგ ხურავს ღონისძიებას სიტყვით რამიზ გოიუშოვი, როგორც თავმჯდომარე.
აზერბაიჯანის სახელმწიფო ორგანოებში, სახელმწიფო კომპანიებში არის წესი: როდესაც ვიღაცას სამუშაოდ იღებენ, ის მაშინვე ორ განცხადებას წერს – ერთს, სამსახურში მიღების შესახებ, მეორეს – დაკავებული თანამდებობის დატოვების. მეორე დოკუმენტს ხელს აწერენ, მაგრამ თარიღს არ უთითებენ. და როდესაც ეს ადამიანი უცებ „შეცდომას დაუშვებს“, იმ განცხადებაზე თარიღი ჩნდება – როგორც წესი, კონკრეტულ მოვლენამდე ორი-სამი თვით ადრინდელი. შემდეგ კი ამბობენ, რომ ადამიანმა პოსტი მომხდარამდე რამდენიმე კვირით ადრე დატოვა და საქმე იხურება.
როგორც ჩანს, ასეთივე პრაქტიკა მოქმედებს პარტია „ახალ აზერბაიჯანშიც“. ადამიანი თავმჯდომარის პოსტს იკავებს, მაგრამ ამბობენ, რომ ის 30 ივნისს გაათავისუფლეს. სისტემა კი არა, მულტიპლიკაციური ფილმია…“
კიდევ ერთი სკანდალი
10 სექტემბერს, აზერბაიჯანულ მედიაში, მმართველ პარტიაში კიდევ ერთი სექსსკანდალის შესახებ გავრცელდა ინფორმაცია. არსებული ინფორმაციის თანახმად, ამჯერად კამერების წინაშე არასახარბიელო ფორმაში აღმოჩნდა პარტია „ახალი აზერბაიჯანის“ სალიანის რაიონული ორგანიზაციის თავმჯდომარის მოადგილე, ვუსალ ჰასანლი.
მაგრამ პარტიის საზოგადოებასთან ურთიერთობის დეპარტამენტის ხელმძღვანელმა ელმედინ გულიევმა ამ ფაქტის კომენტირებისას აღნიშნა, რომ „ახალი აზერბაიჯანის“ რაიონულ ორგანიზაციაში ასეთი სახელისა და გვარის არათუ ხელმძღვანელი, არამედ რიგითი თანამშრომელიც კი არ ჰყოლიათ.
გაფრთხილება ექსპერტებისგან
ექსპერტი ფარიდ ფარდაშუნასი აცხადებს, რომ აზერბაიჯანი ამ დღეებში კიბერშანტაჟისტების სამიზნეა და ამ მასირებული შეტევით შეიძლება პოლიტიკური მოღვაწეებიც დაზარალდნენ.
„მეგობრებო, ყურადღებით იყავით. განსაკუთრებით ყურადღებით უფროსი ასაკის ადამიანები უნდა იყვნენ.
შეიძლება უცხო ადამიანებმა დაგირეკონ და საუბრის დროს შეიძლება თავისი სხეულის ინტიმური ადგილები გაჩვენონ. შემდეგ გთხოვენ, უჩვენოთ თქვენი „ხელოვნება“. და როდესაც ამაზე დაგიყოლიებენ, თქვენს საუბარს ჩაიწერენ. შემდეგ მოითხოვენ ფულს ჩანაწერის წასაშლელად და თუკი უარს ეტყვით, ვიდეოს ქსელში გაავრცელებენ.
მე პირადად უკვე მივიღე რამდენიმე ასეთი ზარი, მაგრამ ვიცოდი თაღლითების მუშაობის მეთოდები და პირველმა მე ჩავიწერე ისინი. ყურადღებით უნდა იყოთ, უარი თქვათ უცხო ადამიანებთან ვირტუალურ ინტიმურ ურთიერთობებზე“, – აღნიშნა ექსპერტმა.
