საზოგადოების სხვადასხვა სფეროს წარმომადგენლებმა "შეურიგებლობის მანიფესტს" მოაწერეს ხელი

საზოგადოების სხვადასხვა სფეროში ცნობილმა ადამიანებმა (ჟურნალისტებმა, მუსიკოსებმა, მწერლებმა, ექიმებმა და სხვ.) “შეურიგებლობის მანიფესტი” გააფორმეს და საჯაროდ, ვილნიუსის სკვერში მოაწერეს ხელი.

მანიფესტში წერია, რომ მმართველმა პოლიტიკურმა გუნდმა მოსახლეობას ხელიდან გამოგლიჯა არჩევანის ფუნდამენტური, კონსტიტუციური უფლება.

“მმართველმა პოლიტიკურმა გუნდმა მოსახლეობას ხელიდან გამოგლიჯა არჩევანის ფუნდამენტური, კონსტიტუციური უფლება. ნათელია, რომ “ქართული ოცნება’’ ხელისუფლებაში დარჩენას განუსაზღვრელი ვადით აპირებს და ამისთვის უკან არაფერზე დაიხევს.”

მოქალაქეები მანიფესტში ხაზგასმით ამბობენ, რომ ისინი უკან დახევას არ აპირებენ და არ შეურიგდებიან იმ თავსმოხვეულ რეალობას, რომელიც დღეს არის.

• სახელმწიფო დეპარტამენტი: მოვუწოდებთ ოპოზიციას, შევიდნენ პარლამენტში
• „მე ხმა ქართულ ოცნებას მივეცი“ VS „მე ხმა ოპოზიციას მივეცი“. ქართველ ამომრჩეველთა მონოლოგები
• მიტინგი პარლამენტთან და აქციის დაშლა ცესკოსთან. ვიდეოისტორია

“გამოვიყენებთ კონსტიტუციით მონიჭებულ ყველა კანონიერ საშუალებას, რათა საზოგადოებრივი ზეწოლით ხელისუფლება ვაიძულოთ, ჩაატაროს ხელახალი, სამართლიანი და თავისუფალი არჩევნები” – წერია მანიფესტში.

ასევე, ისინი მოუწოდებენ ოპოზიციურ პარტიებს, შეინარჩუნონ მტკიცე ერთობა “და ყველა მშვიდობიანი და სამართლებრივი საშუალებით დაიცვან საქართველოს ამომრჩეველთა უმრავლესობის ნება.”

ერთ-ერთი ხელმომწერი, ეროვნული ბანკის ყოფილი პრეზიდენტი გიორგი ქადაგიძე ამბობს, რომ დემოკრატიული პროცესებისთვის და ქვეყნის განვითარებისთვის ბრძოლა თითოეული მოქალაქის ვალია და სწორედ ამას განასახიერებს “დაუმორჩილებლობის მანიფესტიც”. 

“ეს არ არის მხოლოდ პოლიტიკური პარტიების ბრძოლა, ეს არის ყველა იმ ადამიანის ბრძოლა, ვინც თვლის, რომ დემოკრატიული განვითარება არის ყველანაირი სიკეთის წინაპირობა, რომელიც ამ ქვეყანამ უნდა მიიღოს. დღეს სხვადასხვა პროფესიის ხალხი, ვინც პოლიტიკურ პროცესში უშუალოდ პოლიტიკურ პარტიებთან არ არის ჩართული, ხელს მოაწერს მანიფესტს, რომელიც არის განზრახვა იმასთან დაკავშირებით, რომ ამას არ შევეგუებით და ეს ბრძოლა გაგრძელდება ბოლომდე”, – აცხადებს ქადაგიძე. 

აქციაზე იმყოფებოდა ექიმი ვაჟა გაფრინდაშვილიც, რომელმაც ცნობილი გერმანელი პასტორის, მარტინ ნიმიოლერის სიტყვებით დაახასიათა ქვეყანაში არსებული მდგომარეობა:

„როცა ნაცისტები კომუნისტებს მიადგნენ, ხმა არ ამომიღია, რადგან კომუნისტი არ ვყოფილვარ. ებრაელებს მიადგნენ და ხმა არ ამომიღია, რადგან ებრაელი არ ვყოფილვარ. პროფკავშირებს მიადგნენ და ხმა არ ამომიღია, რადგან პროფკავშირის წევრი არ ვყოფილვარ. კათოლიკებზე გადავიდნენ და ხმა არ ამომიღია, რადგან კათოლიკე არ ვყოფილვარ. შემდეგ მე მომადგნენ… და აღარავინ იყო დარჩენილი, რომ ხმა ამოეღო…“

ხელმომწერები ასევე მიმართავენ საერთაშორისო ორგანიზაციებს და პარტნიორებს, რომ გამოხატონ მკაფიო და ერთმნიშვნელოვანი მხარდაჭერა საქართველოს დემოკრატიული განვითარების მიმართ.

გამოქვეყნდა პეტიციაც, რომელსაც ნებისმიერ მოქალაქეს შეუძლია მოაწეროს ხელი: manifest.ge/main/item/3134

მანიფესტის სრული ტექსტი

სახელმწიფოებრიობის აღდგენიდან 30 წლის თავზე საქართველო უმძიმესი რეალობის წინაშე დგას:

• უმუშევრობა, ეკონომიკური სიდუხჭირე და უკიდურესი სიღარიბე;
• კორუფცია, ნეპოტიზმი, კლანურობა;
• დასუსტებული სახელმწიფო, გაძლიერებული კრიმინალი;
• საქართველოს გეოპოლიტიკური როლის დაკნინება;
• ხელისუფლებას დამორჩილებული სასამართლო სისტემა;
• პარტიული ინტერესების მომსახურე სამართალდამცავი უწყებები;
• ადამიანის ფუნდამენტური უფლებების შელახვის ფაქტები;
• რუსულ პროპაგანდასთან და დეზინფორმაციასთან მარცხი;

ამ გამოწვევების ფონზე, საზოგადოებას ჰქონდა მოლოდინი, რომ 2020 წლის 31 ოქტომბრის საპარლამენტო არჩევნები ამომრჩეველთა ნების თავისუფალი გამოხატვის ასპარეზი იქნებოდა, რომელიც საქართველოში არსებულ განწყობებს და პოლიტიკურ ძალთა გადანაწილებას ობიექტურად ასახავდა. ამით ჩვენ ერთპარტიული და ერთპიროვნული მმართველობის მანკიერ გამოცდილებას წარსულს ჩავაბარებდით, მრავალპარტიული პარლამენტი კი უზრუნველყოფდა, რომ თითოეული მოქალაქის ინტერესი პირწმინდად ყოფილიყო დაცული.

სამწუხაროდ, ეს ასე არ მოხდა და მმართველმა პოლიტიკურმა გუნდმა მოსახლეობას ხელიდან გამოგლიჯა არჩევანის ფუნდამენტური, კონსტიტუციური უფლება. ნათელია, რომ “ქართული ოცნება’’ ხელისუფლებაში დარჩენას განუსაზღვრელი ვადით აპირებს და ამისთვის უკან არაფერზე დაიხევს.

უკან დახევას არ ვაპირებთ არც ჩვენ, საქართველოს მოქალაქეები. ჩვენ არ შევურიგდებით თავსმოხვეულ რეალობას და გამოვიყენებთ კონსტიტუციით მონიჭებულ ყველა კანონიერ საშუალებას, რათა საზოგადოებრივი ზეწოლით ხელისუფლება ვაიძულოთ, ჩაატაროს ხელახალი, სამართლიანი და თავისუფალი არჩევნები. ძალას არ დავიშურებთ, რომ მივიდეთ თითოეულ მოქალაქესთან, რათა მივაწვდინოთ საპროტესტო ხმა და ამ პროცესის თანაზიარი გავხადოთ.

მოვუწოდებთ თითოეულ თანამოქალაქეს, შემოუერთდეს ჩვენს სამართლიან ბრძოლას და დადგეს ისტორიის სწორ მხარეს. ყველას უნდა გვახსოვდეს, რომ ხელისუფლების წყარო ვართ ჩვენ – ხალხი და სწორედ ჩვენ უნდა გადავწყვიტოთ, როგორ სახელმწიფოში გვსურს ცხოვრება.

მხარს ვუჭერთ ოპოზიციური პოლიტიკური პარტიების ძალისხმევას, მოვუწოდებთ მათ შეინარჩუნონ მტკიცე ერთობა და ყველა მშვიდობიანი და სამართლებრივი საშუალებით დაიცვან საქართველოს ამომრჩეველთა უმრავლესობის ნება.

მოვუწოდებთ საერთაშორისო ორგანიზაციებსა და საქართველოს პარტნიორებს, დაიკავონ მკაფიო, ერთმნიშვნელოვანი პოზიცია საქართველოს დემოკრატიული განვითარების დასაცავად.

მოვუწოდებთ საქართველოს ხელისუფლებას, გაიაზროს მათ მიერ შექმნილი კრიზისის კრიტიკულობა. გაიაზროს ის, რომ ჩამოშლილ სახელმწიფოს ჩვენ ვერ და არ შევეგუებით.