საქართველოში საცურაო აუზები, სპორტდარბაზები და ღია ატრაქციონები იხსნება

6 ივლისიდან საქართველოში კორონავირუსის გამო დაწესებული შეზღუდვების ნაწილი იხსნება. 

6 ივლისის მონაცემებით, საქართველოში კორონავირუსით ინფიცირების 953 შემთხვევაა დადასტურებული. კარანტინის რეჟიმშია 3828 ადამიანი, ხოლო სტაციონარში მეთვალყურეობის ქვეშ – 192 პირი. კორონავირუსით ინფიცირებულთაგან 830 გამოჯანმრთელდა და 15 გარდაიცვალა.

კერძოდ: 

დახურულ სივრცეში ტრენინგებისა და კონფერენციების ჩატარება, რაც 24 მარტიდან აკრძალული იყო, დღეიდან, 6 ივლისიდან უკვე ნებადართულია. 

გაიხსნა ის პროფესიული საგანმანათლებლო დაწესებულებებიც, რომლებმაც ჯანდაცვის სამინისტროს შრომის ინსპექციის შემოწმება გაიარეს და დადგენილი სტანდარტები დააკმაყოფილეს. 

ნებადართულია ღია სივრცეში არსებული ატრაქციონების მუშაობაც. 

იხსნება ის საცურაო აუზები და სპორტდარბაზები, რომლებიც შრომის ინსპექციის შემოწმებას გაივლიან.  შრომის პირობების ინსპექტირების დეპარტამენტი მათ შემოწმებას 7 ივლისიდან დაიწყებს. აუზებისა და სპორტდარბაზებისთვის დადგენილი რეგულაციები კი დღეს, 6 ივლისს, გამოქვეყნდება.  

• ანტიკრიზისული სოფლის მეურნეობა: ორი ამბავი აფხაზეთიდან
• თუ რუსეთის საზღვარი არ გაიხსნა, შიმშილი გველის – პანდემია ჯავახეთში. ვიდეო

ნებადართული ხდება ღია სივრცეებში კულტურული ღონისძიებების ჩატარებაც – ღონისძიების ჩატარების წესებს და რეკომენდაციებს ჯანდაცვის სამინისტრო დაადგენს.

როგორც საქართველოს მთავრობაში აცხადებენ, უწყებათშორისი საკოორდინაციო საბჭო განაგრძობს არსებულ ეპიდემიოლოგიურ მდგომარეობაზე დაკვირვებას და გადაწყვეტილებებს სხვა საქმიანობების გახსნაზე ეტაპობრივად მიიღებს.

კორონავირუსით ინფიცირების პირველი შემთხვევა საქართველოში 2020 წლის 26 თებერვალს დადასტურდა. კორონავირუსის პანდემიის შესაჩერებლად 21 მარტიდან 23 მაისამდე საქართველოში საგანგებო მდგომარეობა იყო გამოცხადებული. 

კორონავირუსის პანდემიის გამო დაწესებული შეზღუდვების მოხსნის პირველი ეტაპი საქართველოში 27 აპრილიდან ამოქმედდა. 15 ივნისიდან შიდა ტურიზმი განახლდა, საზღვრების გახსნა და უცხოელი ტურისტების მიღება კი დაანონსებული 1 ივლისის ნაცვლად აგვისტოდან იგეგმება.