სუს: საქართველოში ევრომაიდნის გამეორება და ხელისუფლების დამხობა იგეგმება. პროცესები უკრაინიდან იმართება

საქართველოში ევრომაიდნის მოწყობა იგეგმება

საქართველოს უსაფრთხოების სამსახური 18 სექტემბერს დილით აქვეყნებს განცხადებას, სადაც აღნიშნულია, რომ საქართველოში უკრაინული ევრომაიდნის სცენარის გამეორება და ხელისუფლების ძალადობრივად შეცვლა იგეგმება.

ამ გეგმის უკან, სუს-ის ინფორმაციით, “საქართველოს ტერიტორიასა და მის ფარგლებს გარეთ მოქმედი პირთა გარკვეული ჯგუფები” დგანან. კერძოდ კი, სუს-ი გადატრიალების გეგმის ავტორებად უკრაინის ხელისუფლებაში მომუშავე და უკრაინაში მყოფ ეთნიკურ ქართველებს ასახელებს. სუსის განცხადებაში დასახელებულია სამი კონკრეტული პიროვნება:

გეგმის ავტორად დასახელებულია უკრაინის სამხედრო დაზვერვის ხელმძღვანელის მოადგილე გიორგი ლორთქიფანიძე, რომელიც სააკაშვილის ხელისუფლების დროს შინაგან საქმეთა მინისტრის, ვანო მერაბიშვილის მოადგილე იყო;

ექს-პრეზიდენტ მიხეილ სააკაშვილის დაცვის ყოფილი წევრი მიხეილ ბატურინი;

სააკაშვილის ახლო გარემოცვის წევრი, უკრაინაში მოქმედი „ქართული ლეგიონის“ მეთაური მამუკა მამულაშვილი.

● აშშ-ს საელჩო მედიაში გავრცელებულ ინფორმაციას საქართველოში სამხედრო ბაზის შესახებ უარყოფს
● “ე.წ. მეორე ფრონტზე დეზინფორმაციის მიზანი საზოგადოების მოწამვლაა” – რა თქვა ბორელმა პრემიერთან შეხვედრაზე
● ზელენსკი სააკაშვილის უკრაინისთვის გადაცემას ითხოვს

სუს-ის მტკიცებით, პოლონეთის საზღვართან მიმდინარეობს იმ ახალგაზრდების გაწვრთნა, რომლებსაც არეულობის მოწყობაში ჩართავენ:

“დადასტურებული და გადამოწმებული ინფორმაციით”, გიორგი ლორთქიფანიძის მიერ შემუშავებული გეგმის შესასრულებლად გამოყენებული იქნება უკრაინაში მებრძოლი ქართული წარმოშობის საკმაოდ დიდი ჯგუფი, ასევე მათი ზეგავლენის ქვეშ მოქცეული ქართველი ახალგაზრდების ნაწილი, “რომელთა გადამზადება-წვრთნა მიმდინარეობს პოლონეთი-უკრაინის სახელმწიფო საზღვრის მიმდებარედ”.

ასევე სუს-ი ასახელებს რამდენიმე უკრაინულ ორგანიზაციას, რომლებიც უსაფრთხოების სამსახურის ინფორმაციით, ასევე ჩართულები არიან პროცესში:

“რევოლუციური სცენარისთვის გამოსაყენებელი ახალგაზრდული ჯგუფების მომზადების მიზნით გამოიყენება ორგანიზაცია „კანვასი“, რომლის ბირთვსაც შეადგენს ორგანიზაცია „ოტპორი,” – აღნიშნულია წერილში და ნათქვამია, რომ ამ ორგანიზაციებმა წარსულში უკვე მიიღეს გამოცდილება სამოქალაქო არეულობების მოწყობაში სერბეთში.

როგორც უსაფრთხოების სამსახური აცხადებს, სამოქალაქო არეულობის მოწყობას ეს პირები და მათთან დაახლოებული ადამიანები ოქტომბერ-დეკემბერში გეგმავენ. ამ პროცესის “საბოლოო მიზანია ხელისუფლების ძალადობრივი გზით შეცვლაა”, აღნიშნავს სუს-ი.

სუს-ს მტკიცებით, დესტრუქციული პროცესების დაწყების თარიღად ოქტომბერ-დეკემბერი შემთხვევით არ არის შერჩეული – ეს ის პერიოდია, როდესაც უნდა გამოქვეყნდეს ევროკომისიის შუალედური და ევროკავშირის საბოლოო დასკვნა.

“სახელმწიფო ხელისუფლების დასამხობად მომზადების შეთქმულთა მოლოდინი გათვლილია იმ გარემოებაზე, რომ გამოქვეყნებული დასკვნა იქნება უარყოფითი, რაც მათ განკარგულებაში არსებული საინფორმაციო ქსელებით, მთავრობისთვის ხელოვნურად დამაგრებული “პრორუსულობის“ ლოზუნგით, შექმნის ნაყოფიერ ნიადაგს საზოგადოებრივი მღელვარებისა და შემდგომი არეულობებისათვის,” – წერია განცხადებაში.

რაც შეეხება სცენარს, სუს-ის ინფორმაციით, განიხილება მოვლენათა განვითარების რამდენიმე სცენარი – მათ შორის, ე.წ. „კარვების ქალაქის“ მოწყობა, ცენტრალურ გამზირებსა და სტრატეგიულ ობიექტებთან ბარიკადების აღმართვა, სამთავრობო შენობების დაკავება-ბარიკადირება.

“დადასტურებულად ცნობილია, რომ ორგანიზატორების მიერ განიხილება საქართველოში 2014 წელს უკრაინაში გამართული ,,ევრომაიდნის“ მსგავსი სცენარის განხორციელება,” – წერია სუსის განცხადებაში.

განცხადებაში ხაზგასმულია, რომ აღნიშნული გეგმის განხორციელება იგეგმება უცხო ქვეყნების კოორდინაციითა და ფინანსური მხარდაჭერით.

გამოხმაურება

ილიას სახელმწიფო უნივერსიტეტის ასოცირებული პროფესორი, გიორგი მელაძე ეხმაურება სუს-ის მიერ გავრცელებულ განცხადებას, რომ CANVAS-ი აღნიშნული მოვლენისთვის ახალგაზრდების გადამზადებით არის დაკავებული.

CANVAS-ის დირექტორის თქმით, ისინი არანაირ გადატრიალებას არ გეგმავენ და სუს-ის მიზანი ადამიანების დაშინებაა.

“სუს-ი ლაპარაკობს გადატრიალებებზე… რასაც ყოველთვის აკეთებს და ამჯერად ამ ყველაფერში ამატებს ორგანიზაცია კანვას-ს. კანვას საქართველო-ს დირექტორი ამჟამად ვარ მე და არანაირ გადატრიალებას არ ვგეგმავ. განცხადების ერთადერთი მიზანია აქტიური ადამიანების დაშინება!

პირადად ჩემს წინააღმდეგ განცხადება გავრცელდა გაზაფხულზე. განცხადების ავტორი იყო კობახიძე და მაშინაც “ექსტრემისტი” მეძახა. ბოლო 20 წელია უამრავ ჯგუფთან და აქტივისტთან მიმუშავია და ჩემთვის ძვირფასი საქმეა სამოქალაქო საზოგადოების აქტიურ ადამიანებთან ერთად ფიქრი და მოქმედება უკეთესი მმართველობის სისტემების შესაქმნელად. რასაც სუს-ი აკეთებს დღეს, ასეთი განცხადებები მომისმენია ავტორიტარული სახელმწიფოებისგან. მიუხედავად ყველაფრისა, მე გავაგრძელებ ჩემ საქმეს, არაძალადობრივი კამპანიების შესახებ ცოდნის გავრცელებას!” – ამბობს მელაძე.

________________________

● გასულ წელს ევროკავშირმა უკრაინასა და მოლდოვას ევროკავშირის წევრობის კანდიდატის სტატუსი მიანიჭა, საქართველოს კი კანდიდატის სტატუსის მისაღებად 12-პუნქტიანი წინაპირობა დაუწესა. სწორედ 2023 წლის ოქტომბერში გახდება ცნობილი, გასცემს თუ არა ევროკომისია რეკომენდაციას საქართველოსთვის ევროკავშირის წევრობის კანდიდატის სტატუსის მინიჭებაზე. ევროკომისიის დასკვნის შემდეგ კი, 2023 წლის ბოლომდე, ევროპული საბჭოს ლიდერები შეაფასებენ საქართველოსა და სხვა ქვეყნების პროგრესს.