აშშ-ს საელჩო მედიაში გავრცელებულ ინფორმაციას საქართველოში სამხედრო ბაზის შესახებ უარყოფს

აშშ-ს სამხედრო ბაზა საქართველოში

აშშ-ის საელჩო საქართველოში ამერიკული ბაზების შექმნასთან დაკავშირებით მედიაში გავრცელებულ ინფორმაციას ეხმაურება და აღნიშნავს, რომ სამხედრო ბაზების შექმნა აშშ-ს არ შემოუთავაზებია.

დღეს “მთავარმა არხმა” გაავრცელა ინფორმაცია, რომ რუსეთის უკრაინაში შეჭრამდე რამდენიმე თვით ადრე, საქართველოში ჩამოსულმა ამერიკის თავდაცვის მდივანმა ლოიდ ოსტინმა “ქართულ ოცნებას” ბაზის გახსნასთან დაკავშირებით მოლაპარაკებები შესთავაზა და უარი მიიღო.

ინფორმაციას გამოეხმაურა მმართველი პარტიის თავმჯდომარე, ირაკლი კობახიძე. “ბაზამ როგორ შეიძლება დაგიცვას? უსაფრთხოების ერთადერთი გარანტი არის NATO-ს ქოლგა.” – განაცხადა კობახიძემ.

 “არ გვინდა ეს ღია კარი. გვესმის წლებია, რომ კარი ღიაა და კარი ღიაა. არ გვინდა ეს ღია კარი. თუ გაქვთ რაიმეს თავი და ერთი ადგილი, მიიღეთ გადაწყვეტილება და ჩვენი ქვეყანა გახადეთ NATO-ს წევრი.” – თქვა დედაქალაქის მერმა კახა კალაძემ.

“აშშ-საქართველოს თავდაცვითი ურთიერთობა ეფუძნებოდა და კვლავაც ეფუძნება თავსებადობის გაძლიერებას და საქართველოს მხარდაჭერას შემდგომი აგრესიის შეკავებისა და მისი სუვერენული ტერიტორიის დასაცავად, რაც საქართველოს უკეთ ამზადებს ნატოში გაწევრიანებისთვის. მედიაში გავრცელებული ინფორმაციის განსამარტად, შეერთებულ შტატებს არ შეუთავაზებია ამერიკული სამხედრო ბაზის შექმნა საქართველოში”, – აღნიშნულია განცხადებაში.

მედიაში გავრცელებულ ინფორმაციას სიცრუეს უწოდებს საქართველოს თავდაცვის სამინისტროც.

“თავდაცვის სამინისტრო ეხმიანება მედიაში გასულ ინფორმაციას, რომელიც შეეხება აშშ-საქართველოს სამხედრო-პოლიტიკური ურთიერთობების თემას და შინაარსობრივად წარმოადგენს სრულ სიცრუეს.

აღნიშნული ინფორმაცია ვრცელდება პოლიტიკურად მიკერძოებული პირის მიერ, რომელიც შემდგომ ცალკეული მედია საშუალებებისა და პოლიტიკურად ანგაჟირებული პირების მიერ გამოყენებულია დეზინფორმაციული კამპანიის საწარმოებლად.

მოვუწოდებთ საზოგადოებას დაეყრდნონ გადამოწმებულ ინფორმაციას, განსაკუთრებით ასეთი მნიშვნელობის თემატიკის განხილვისას”, – აღნიშნულია უწყების განცხადებაში.

“მართალია თუ ტყუილი, ამერიკულ ბაზებზე ინფორმაციამ მოახდინა ხელისუფლების სრული ლუსტრირება… ეს არის მთავარი“, – წერს სოციალურ ქსელში ექსპერტი გია ხუხაშვილი.

● “ე.წ. მეორე ფრონტზე დეზინფორმაციის მიზანი საზოგადოების მოწამვლაა” – რა თქვა ბორელმა პრემიერთან შეხვედრაზე
● “ვიმედოვნებ, საქართველოს მთავრობას ეყოფა პრაგმატიზმი, აღიაროს ოსეთი და აფხაზეთი” – მედვედევის ინტერვიუ TASS-თან
● თენგიზ ფხალაძის კომენტარი: არ უნდა შევეგუოთ იმ რეალობას, რომ დღეს უკრაინასა და მოლდოვასთან შედარებით ერთი ნაბიჯით უკან ვართ