საქართველოს დედაქალაქში 63 უფასო სასადილოა, რომლითაც დღეში 42 ათასზე მეტი ადამიანი სარგებლობს
საქართველოს დედაქალაქში 63 უფასო სასადილოა
საქართველოს დედაქალაქ თბილისში 63 უფასო სასადილოა, რომლითაც დღეში 42 075 ბენეფიციარი სარგებლობს. ამის შესახებ „ინტერპრესნიუსის“ მიერ დედაქალაქის მერიიდან გამოთხოვილი საჯარო ინფორმაციიდან ვიგებთ. გამოცემის ცნობით, ერთ დღეში ერთი ბენეფიციარისთვის მომსახურების ფასი 1.7 ლარია.
ძირითად სიაში რეგისტრირებულ ბენეფიციართა გარდა, უფასო სასადილოებში რეგისტრირებულია დამატებითი 3603 ბენეფიციარი, რომელიც საკვებს მხოლოდ იმ შემთხვევაში იღებს, თუ სასადილოში ძირითად სიაში მყოფი ბენეფიციარი არ გამოცხადდება.
ყველაზე მეტი ბენეფიციარი ნაძალადევის რაიონში მდებარე უფასო სასადილოებს ჰყავს. ამ რაიონში სულ 10 სასადილოა, სადაც ძირითადი სიაში 8053 ადამიანია.
„ქალაქ თბილისის მუნიციპალიტეტის ბიუჯეტით გათვალისწინებული „უფასო სასადილოებით მომსახურების“ ქვეპროგრამის ფარგლებში ბენეფიციარები საკვებს უფასო სასადილოში იღებენ ყოველდღიურად, შეუზღუდავად, განკუთვნილი ულუფის ფარგლებში.
ბენეფიციარებზე საკვები გაიცემა არანაკლებ 6 საათის განმავლობაში – 14:00 საათამდე, ხოლო 14:00 საათიდან 16:00 საათამდე სადილს იღებენ დამატებითი სიით მოსარგებლე ბენეფიციარები.
ძირითადი სიის ბენეფიციარები კუთვნილ ულუფას იღებენ ყოველდღიურად, ბენეფიციარის არგამოცხადების შემთხვევაში, მათ ნაცვლად საკვებს იღებენ დამატებითი სიის ბენეფიციარები.
„უფასო“ სადილი წინასწარ შედგენილი მენიუს მიხედვით მზადდება – ცხელი წვნიანი, გარნირი, კომპოტი და პური. ბენეფიციარების უმეტესობა სასადილოში არ ჭამს – აქ ჩანთებში ჩაწყობილი ქილებით და ყუთებით მოდიან, ავსებენ და სახლში მიაქვთ, ოჯახის ყველა წევრისთვის.
ის, ვინც სასადილოშივე ჭამს, როგორც წესი, მარტოხელაა. არიან ისეთებიც, ვისაც სახლში შეიძლება არ ჰქონდეს გაზი, ელექტროენერგია, ქურა და თბილი სადილის იქვე ჭამა ურჩევნია – სითბოში.
