"ზელენსკი ნეგატიურ კონტექსტში არასოდეს მიხსენებია" — კობახიძე უკრაინასთან ურთიერთობების აღდგენაზე საუბრობს
საქართველოს და უკრაინის ურთიერთობები
“ქართული ოცნების” პრემიერ-მინისტრმა ირაკლი კობახიძემ განაცხადა, რომ თბილისი მზად არის, “ყველაფერი გააკეთოს“ უკრაინასთან ურთიერთობების მაქსიმალურად აღსადგენად, მიუხედავად ორ ქვეყანას შორის დაგროვილი გამოწვევებისა.
პრემიერმინისტრმა აღნიშნა, რომ უკრაინის პრეზიდენტი ვოლოდიმირ ზელენსკი პირადად არასოდეს უხსენებია ნეგატიურ კონტექსტში, რაც უკავშირდება იმას, რომ უკრაინა ომში მყოფი მეგობარი ქვეყანაა.
“მე პირადად ზელენსკი ნეგატიურ კონტექსტში არასოდეს მიხსენებია და ამას ერთი მარტივი მიზეზი აქვს: ის იმ ქვეყნის პრეზიდენტია, რომელიც დღეს ომშია და ეს ქვეყანა ჩვენი მეგობარია. აქედან გამომდინარე, კონკრეტულად ზელენსკისთან დაკავშირებით მე ჩემს სიტყვებს ყოველთვის ვუფრთხილდებოდი”, – განაცხადა კობახიძემ.
მისი თქმით, საქართველოსა და უკრაინას შორის ურთიერთობებს ხანგრძლივი ისტორია აკავშირებს, რაც, კობახიძის შეფასებით, საფუძველს ქმნის თანამშრომლობის გაუმჯობესებისთვის. მან აღნიშნა, რომ ქართული მხარე მზად არის გადადგას “ყველა გონივრული ნაბიჯი“, რათა ურთიერთობები როგორც სახელმწიფოებს, ისე ხელისუფლებებს შორის აღდგეს.
კობახიძემ ასევე გამოხატა სოლიდარობა უკრაინელი ხალხის მიმართ, რომელიც, მისი თქმით, მძიმე მდგომარეობაში იმყოფება ომის, ეკონომიკური და სოციალური სირთულეების ფონზე. მისი განცხადებით, საქართველო სრულად უჭერს მხარს უკრაინას და დაინტერესებულია მეგობრული ურთიერთობების შენარჩუნებით.
კობახიძის თქმით, მისი და ზელენსკის ბოლო შეხვედრა მეგობრულ გარემოში გაიმართა და ძირითადად მომავალზე იყო ორიენტირებული, მიუხედავად იმისა, რომ ორ ქვეყანას შორის არსებული პრობლემები კვლავ გადაუჭრელია. მან ახსენა რამდენიმე სადავო საკითხი, მათ შორის ყოფილი ოფიციალური პირები და დიპლომატიური გადაწყვეტილებები, თუმცა აღნიშნა, რომ შეხვედრის დროს ამ თემებზე სიღრმისეული განხილვა არ მომხდარა.
საქართველოსა და უკრაინის ლიდერები ერთმანეთს 4 მაისს ერევანში, ევროპული პოლიტიკური საზოგადოების სამიტის ფარგლებში შეხვდნენ. საქართველოს მთავრობის ადმინისტრაციის ინფორმაციით, შეხვედრა უკრაინული მხარის ინიციატივით გაიმართა და ორ ქვეყანას შორის ურთიერთობებს შეეხო.
შეხვედრის შემდეგ კობახიძემ მას “მეგობრული და საინტერესო საუბარი“ უწოდა. მოგვიანებით ზელენსკიმ სოციალურ ქსელში დაწერა, რომ საქართველოსა და უკრაინას შორის კვლავ არსებობს გადაუჭრელი საკითხები, თუმცა აღნიშნა, რომ დიალოგი ყველა დონეზე მნიშვნელოვანია და თანამშრომლობა გაგრძელდება.
