საქართველოს ახალი სახალხო დამცველი ლევან იოსელიანია
საქართველოს პარლამენტმა პარტია “მოქალაქეების” წევრი ლევან იოსელიანი სახალხო დამცველად აირჩია. 96 მომხრე, 0 წინააღმდეგი – ასეთია ხმების რაოდენობა. კენჭისყრისთვის რეგისტრაცია 99-მა დეპუტატმა გაიარა. სახალხო დამცველს პარლამენტი 6 წლის ვადით ირჩევს.
ოპოზიციონერი თამარ კორძაია ლევან იოსელიანის სახალხო დამცველად არჩევის წინ ლევან იოსელიანი მხარდაჭერის რამდენიმე არგუმენტს ასახელებდა:
“პირველი, შემოდგომას ქართულ ოცნებას ექნება შესაძლებლობა, საერთოდ ოპოზიციის გარეშე მიიღოს გადაწყვეტილება და არ მინდა, რომ ეს მოხდეს.
მეორე, აბსოლუტურად ვიზიარებ, ხათუნა სამნიძემ რაც თქვა, რომ პოლიტიკური კომპრომისი უნდა გავწიოთ.
გამოვხატავ რა წუხილს იმასთან დაკავშირებით, რომ დღეს ხდება ეს კენჭისყრა, ამ არეულ ვითარებაში, როდესაც ჩვენ ცალკე, ერთის მხრივ, ომი გვაქვს გამოცხადებული ამ პროექტთან დაკავშირებით, რომელსაც ვიხილავთ და გვპირდებით, რომ ვენეციის კომისიაში აგზავნით და, მეორეს მხრივ, ლევან იოსელიანის კენჭისყრა ხდება. თუმცა, ჩვენი პოზიცია ადასტურებს იმას, რომ ჩვენ შეგვიძლია თემატურად ყველასთან საუბარი, და ჩემი მხარდაჭერა ზუსტად იმაში ვლინდება, რომ ლევან იოსელიანმა ჩემს ყველა კრიტიკულ შეკითხვას გასცა პასუხი.”
ოპოზიციონერმა ხათუნა სამნიძემ კი განაცხადა, რომ იოსელიანი კონსენსუსური ფიგურაა, კომპრომისი “მოვძებნე და ვთქვი, რომ მხარს ვუჭერ.” მისივე თქმით, წინა პროცესი ჩაიშალა და ძალიან კვალიფიციური კანდიდატები, რომლებიც იღებდნენ მონაწილეობას, ვერ შეძლო ოპოზიციამ და ვერ დაარწმუნა უმრავლესობა, ხმა მიეცათ ამ კანდიდატებისთვის.
“ახლა არის სხვა პროცესი და იმის გათვალისწინებით, რა პოლიტიკური კონტექსტიც არის ქვეყანაში, რამდენად მნიშვნელოვანია კონსენსუსი, რამდენად მნიშვნელოვანია კომპრომისი, აუცილებელია, რომ ეს ორი პროცესი ერთმანეთისგან გავმიჯნოთ, პირველი პროცესი, რომელიც ჩააგდო ქართულმა ოცნებამ და ახლა, როცა შესაძლებელია, რომ კონსენსუსი მიღწეულ იქნას, რადგან ჩანს, რომ ლევან იოსელიანი არის კონსენსუსური ფიგურა და კომპრომისია მოსაძებნი, მე პირადად ეს კომპრომისი მოვძებნე და ამიტომ, გავაცხადე კიდეც წინასწარ, რომ მხარს ვუჭერ.” – ამბობს სამნიძე.
ლევან იოსელიანის კანდიდატურას მხარი არ დაუჭირა პარტია “ლელოს” წევრმა სალომე სამადაშვილმა. როგორც სამადაშვილი ამბობს, იოსელიანის არჩევა ევროკავშირის მოთხოვნის შესრულება არ იქნება და ამიტომაც მისი პარტია მხარს არ დაუჭერს.
“ჩვენ გვქონდა შესაძლებლობა, რამდენიმე არჩევანი იყო, დამოუკიდებელი და ძალიან ძლიერი, მაღალი კვალიფიკაციის მქონე კანდიდატი აგვერჩია და შესრულებული გვექნებოდა უკვე ევროკავშირის მოთხოვნა, მაგრამ ფაქტობრივად ქართულმა ოცნებამ საბოტაჟი მოუწყო დამოუკიდებელი სახალხო დამცველის დანიშვნის პროცესს და ევროკავშირის ეს მოთხოვნა ვერ შესრულდა.
და დღეს უკონკურენტოდ ერთი ადამიანის დამტკიცება სახალხო დამცველის პოსტზე, განსაკუთრებით მაშინ, როცა ერთი არაერთ კვალიფიციურ კანდიდატს უარი ვუთხარით, რადგან ოდესღაც პოლიტიკური შინაარსის პოსტი ჰქონდა დაწერილი, და დღეს ამტკიცებთ ამ პოსტზე პოლიტიკური პარტიიდან მოსულ კანდიდატს, მსურს ვთქვა, რომ არ იქნება ეს ევროკავშირის მოთხოვნის შესრულება და ჩვენი მხარდაჭერა ამ კანდიდატს, ცხადია, არ ექნება.” – განაცხადა სალომე სამადაშვილმა.
2022 წლის 22 დეკემბერს, პარლამენტმა სახალხო დამცველის თანამდებობისთვის 19 კანდიდატიდან ვერცერთი ვერ აირჩია. ომბუდსმენის კანდიდატის არჩევას პარლამენტის 90 დეპუტატის ხმა სჭირდება, თუმცა გამომდინარე იქიდან, რომ 90 ადგილი პარლამენტში არც ერთ პარტიას არ უკავია, სახალხო დამცველის დამტკიცებას როგორც მმართველი პარტიის, ასევე ოპოზიციის ხმები სჭირდება.
ფრაქცია “ქართული ოცნების” თავმჯდომარე მამუკა მდინარაძემ 21 დეკემბერს აცხადებდა, რომ ომბუდსმენის არჩევას ამ სესიაზე ვერ შეძლებდნენ, რადგან, მისი თქმით, უმრავლესობის მიერ შეთავაზებული ომბუდსმენობის 5 კანდიდატიდან, ოპოზიცია არც ერთს არ უჭერს მხარს.
არასამთავრობო ორგანიზაციებმა პარლამენტს ანა აბაშიძის, ნაზი ჯანეზაშვილისა და გიორგი ბურჯანაძის კანდიდატურები შესთავაზეს და მათ მხარი დაუჭირა ოპოზიციის დიდმა ნაწილმაც.
ჯამში პარლამენტში ომბუდსმენობის 19 მსურველის განაცხადი შევიდა, ხოლო პარლამენტს რვა მათგანზე (ანა აბაშიძე, გიორგი ბურჯანაძე, ლელა გაფრინდაშვილი, თინათინ ერქვანია, ნუგზარ კოხრეიძე, გიორგი მარიამიძე, ქეთევან ჩაჩავა და იაგო ხვიჩია) უნდა ემსჯელა, თუმცა, “ქართულმა ოცნებამ” ოპოზიციას სახალხო დამცველის არჩევა მხოლოდ 5 კანდიდატიდან შესთავაზა, რომელთა შორის არც გიორგი ბურჯანაძე იყო და არც ანა აბაშიძე.
აღსანიშნავია, რომ ამ დრომდე ვერც ცესკოს თავმჯდომარეზე და ვერც ცესკოს პროფესიული წევრების არჩევაზე პარლამენტმა რაიმე სახის გადაწყვეტილება ვერ მიიღო. პრეზიდენტმა სალომე ზურაბიშვილმა პარლამენტს ცესკოს თავმჯდომარის თანამდებობაზე თამარ ალფაიძისა და რევაზ ეგაძის კანდიდატურები წარუდგინა. თუმცა ვერც ერთმა მათგანმა საჭირო 100 ხმა ვერ მიიღო.
