საქართველო შესაძლოა მძიმე მეოთხე ტალღაში შევიდეს. იზრდება ინფიცირებული ბავშვების რაოდენობაც
საქართველო შესაძლოა კორონავირუსის პანდემიის მძიმე მეოთხე ტალღაში შევიდეს. ასევე, ქვეყანაში იზრდება ინფიცირებული ბავშვების რაოდენობა – თბილისში მობილიზებული 200-მდე პედიატრიული საწოლი, რომელიც ეპიდემიის მეორე და მესამე ტალღის დროს პრაქტიკულად დაუტვირთავი იყო, უკვე გადატვირთულია – ამის შესახებ საკოორდინაციო საბჭოს დასრულების შემდეგ ჯანდაცვის მინისტრის მოადგილემ თამარ გაბუნიამ და დაავადებათა კონტროლის ეროვნული ცენტრის დირექტორმა, ამირან გამყრელიძემ ისაუბრეს.
“ეპიდსიტუაცია ქვეყანაში უარესდება. კორონავირუსმა არ იცის ის და ეს, არც პოზიცია, არც ოპოზიცია, ერთიანად აზიანებს ყველას და მიაქვს ძალიან ბევრი სიცოცხლე. ამიტომ, მოგიწოდებთ ყველას, მეტი სოლიდარობისკენ და მეტი ყურადღებისკენ, რომ როგორმე ერთად ყოფნით შევაკავოთ ინფექცია და სამშვიდობოზე გავიდეთ“, – განაცხადა ამირან გამყრელიძემ.
თამარ გაბუნიას თქმით, გასული 2-3 დღის განმავლობაში ჯანდაცვის სამინისტროს მოუხდა პედიატრიული საწოლების დამატებით მობილიზება, რაც მიუთითებს ბავშვებში ინფექციის გავრცელების მაღალ მაჩვენებელზე:
“ეს ნიშნავს, რომ ინფექციის გავრცელების კუთხით რისკები იზრდება და ამ შემთხვევაში მთავარი გადაწყვეტა არის ისევ და ისევ ვაქცინაციის პროგრამა. ყველას ინტერესია, რომ ვაქცინაციის პროგრამა განხორციელდეს შეფერხების გარეშე.”
მინისტრის მოადგილემ აღნიშნა ისიც, რომ საქართველოში სრულად ვაქცინირებულ ადამიანებში კორონავირუსით ინფიცირების მაჩვენებელი 0.3%-ია.
“ორჯერ ვაქცინირებული პირებიდან ინფექცია განვითარდა 0.3%-ში, რაც საკმაოდ დაბალი მაჩვენებელია. არცერთი გარდაცვალების შემთხვევა არ დაფიქსირებულა. ბოლო პერიოდში ისმის შეკითხვები იმასთან დაკავშირებით, თუ რა აზრი აქვს აცრას, თუკი მაინც ინფიცირდება ადამიანი. ყველამ კარგად ვიცით, რომ ინფექციისგან 100%-ით არცერთი ვაქცინა არ გვიცავს. ინფიცირება დადგება იშვიათ შემთხვევაში, მაგალითად ფაიზერის დროს ეს არის 10%-ზე ნაკლები, სხვა შემთხვევაში შეიძლება იყოს 15-დან 20%-მდე. თუმცა, შემთხვევები იქნება მსუბუქი და არ დადგება ლეტალობა”, – განაცხადა გაბუნიამ.
მისივე თქმით, ფაიზერის ვაქცინა საქართველოში უახლოეს დღეებში შემოვა.
“დღეს არსებული ყველა ვაქცინა, რომელიც გვაქვს – “სინოფარმი”, “სინოვაკი”, “ასტრაზენეკა” არის დადასტურებული ეფექტურობის და თითოეული დღის დაკარგვა ნამდვილად კრიტიკულია, შემთხვევების რაოდენობა იმატებს. ამდენად, მინდა, მოვუწოდო მოსახლეობას ვაქცინაციის პროცესში აქტიური ჩართულობისკენ”, – განმარტა თამარ გაბუნიამ.
____________________________________________________________
● ევროკავშირმა სომხეთი და აზერბაიჯანი Covid-უსაფრთხო ქვეყნების სიაში შეიყვანა, საქართველო – არა
● საქართველოში ინფიცირების სწრაფი მატება, შესაძლოა კავშირში იყოს „დელტა“ შტამის გავრცელებასთან
● პირბადის ტარება ქუჩაში და კომენდანტის საათი – რა შეზღუდვები მოიხსნა და რა რჩება? მოკლედ
_____________________________________________________________
საქართველოში ვაქცინაციის პროცესი 15 მარტიდან დაიწყო და ძალიან ნელი ტემპით მიმდინარეობს. ამ დროისთვის საქართველოში 310 332 ადამიანია აცრილი. მათგან 120 479-მა ვაქცინის ორივე დოზა გაიკეთა.
ბოლო 24 საათში ქვეყანაში კორონავირუსის 1 862 ახალი შემთხვევა გამოვლინდა და გარდაიცვალა 11 პაციენტი. ბოლო თვეების განმავლობაში ეს ინფიცირების ყველაზე მაღალი მაჩვენებელია.
