საქართველო კორონავირუსის მესამე ტალღისთვის ემზადება. უცნობია, როდის გაიხსნება სკოლები და ბაღები

ჯანდაცვის მინისტრის, ეკატერინე ტიკარაძის თქმით, დღევანდელი ეპიდსიტუაცია ჯერ კიდევ არ იძლევა საშუალებას, რომ სკოლების გახსნაზე ისაუბრონ. მისივე თქმით, საქართველოში კორონავირუსის მესამე ტალღა, სავარაუდოდ, თებერვლის მეორე ნახევრიდან დაიწყება.

საქართველო მესამე ტალღის მოლოდინში

ტიკარაძის თქმით, კორონავირუსის მესამე ტალღას ქვეყანა უფრო მეტად მომზადებული და ეფექტური უნდა შეხვდეს.

“მაშინ როდესაც მსოფლიო მესამე ტალღაზე საუბრობს, რა თქმა უნდა, საქართველო გამონაკლისი ვერ იქნება”, – განაცხადა მინისტრმა.

მესამე ტალღის შესახებ ისაუბრა დაავადებათა კონტროლის ცენტრის დირექტორის მოადგილემ, პაატა იმნაძემაც.

მან კიდევ ერთხელ ხაზი გაუსვა წესების დაცვის მნიშვნელობას.

„მარტო შეზღუდვებზე აღარ არის ლაპარაკი.შეზღუდვები რა არის?! ჩვენ რომ არ ვიქცევით [კარგად], მერე ვიღაცამ უნდა შეგვზღუდოს, რომ ჩვენ დავიცვათ წესები. თუ ჩვენ ყველა დავიცავთ წესებს, იმედი მაქვს, რომ მესამე ტალღა არ იქნება ჩვენთვის ძალიან დამანგრეველი”, – ამბობს იმნაძე.

როდის გაიხსნება სკოლები და ბაღები

ინფექციის გავრცელების მაჩვენებელი არ იძლევა საშუალებას, სკოლების გახსნაზე ვისაუბროთ, ამბობს ჯანდაცვის მინისტრი.

“როგორც კი ამის საშუალება იქნება, განათლების სამინისტრო  ყველა საჭირო პირობას უზრუნველყოფს, რომ ბავშვები მიიღონ სკოლებში“, – განაცხადა ტიკარაძემ.

მან ასევე აღნიშნა, რომ ამ კუთხით ინტენსიური მუშაობა მიმდინარეობს განათლების სამინისტროსთან, თუმცა მთავარი და ყველაზე მნიშვნელოვანია ბავშვების უსაფრთხოების შენარჩუნება და აქედან გამომდინარე, მთავრობა სიფრთხილით ეკიდება ამ საკითხს.

როდის გაიხსნება სავაჭრო ცენტრები, ბაზრები და როდის ამუშავდება საზოგადოებრივი ტრანსპორტი

პირველი თებერვლიდან სავაჭრო ცენტრები და ბაზრები გაიხსნება.

მაგრამ აღდგება თუ არა ტრანსპორტის მოძრაობა ან რომელი სფერო გაიხსნება სავაჭრო ცენტრების შემდეგ, აღნიშნულთან დაკავშირებით, საკოორდინაციო საბჭო იანვრის ბოლოს იმსჯელებს.

“კონკრეტულად გაიხსნება თუ არა ტრანსპორტი და რომელი შემდეგი სფერო იქნება გახსნილი, ამაზე ვიზრუნებთ და ვიმსჯელებთ იანვრის ბოლოს, როცა გვექნება უფრო მეტი სიცხადე”, – აცხადებს ტიკარაძე.

______________________________________________________________________________

● ჯანდაცვის მინისტრი: მოსახლეობის აცრა ფაიზერის ვაქცინით იქნება შესაძლებელი

● რა არის ცნობილი კორონავირუსის ვაქცინებზე, დაამარცხებენ თუ არა ისინი პანდემიას და როდის?

● სომეხი მედიკოსები კორონავირუსის მესამე ტალღას ელოდებიან

______________________________________________________________________________

საქართველოში ბოლო 24 საათში კორონავირუსით ინფიცირების 1618 ახალი შემთხვევა გამოვლინდა, გარდაიცვალა 26 პაციენტი.

● სულ საქართველოში დადასტურებულია 243 255 შემთხვევა
აქედან:
● გარდაცვლილი – 2 846
● გამოჯანმრთელებული – 227 611
● აქტიური შემთხვევა (ანუ ახლა არიან ავად) – 12 772