საპარლამენტო უმრავლესობამ განაცხადა, რომ უცხოელი აგენტების შესახებ რუსულ კანონს გაიწვევს

საქართველოს ხელისუფლებამ უცხოელი აგენტების შესახებ რუსული კანონის გაწვევის გადაწყვეტილება მიიღო. ქართული ოცნების პოლიტიკური საბჭოს, ხალხის ძალის და საპარლამენტო უმრავლესობის ერთობლივი განცხადება სამთავრობო მედია იმედმა გაავრცელა.

“ვხედავთ, რომ მიღებულმა კანონპროექტმა საზოგადოებაში აზრთა სხვადასხვაობა გამოიწვია. სიცრუის მანქანამ შეძლო კანონპროექტის უარყოფითად წარმოჩენა და საზოგადოების გარკვეული ნაწილი შეცდომაში შეიყვანა. კანონპროექტს მიაკერეს “რუსული კანონის“ ყალბი იარლიყი, ხოლო მისი პირველი მოსმენით მიღება საზოგადოების ნაწილის თვალში ევროპული კურსიდან გადახვევად წარმოაჩინეს.

გარდა ამისა, რადიკალურმა ძალებმა შეძლეს ახალგაზრდების ნაწილი კანონსაწინააღმდეგო ქმედებებში ჩაეთრიათ. მადლობა გმირ სამართალდამცავებს, რომლებმაც ძალადობას მოთმინებითა და უმაღლესი სტანდარტით უპასუხეს.

ჩვენ ყველაზე მეტად უნდა გავუფრთხილდეთ მშვიდობას, სიმშვიდესა და ეკონომიკურ განვითარებას ჩვენს ქვეყანაში, ისევე, როგორც საქართველოს წინსვლას ევროპული ინტეგრაციის გზაზე. შესაბამისად, აუცილებელია, თითოეული ჩვენი თანამოქალაქის ენერგია არა დაპირისპირებაზე, არამედ ქვეყნის სწორი მიმართულებით განვითარებაზე დაიხარჯოს.

• გაზი, წყლის ჭავლი, დაკავებები – მასშტაბური აქცია თბილისში რუსული კანონის წინააღმდეგ. ქრონოლოგია და ბევრი ფოტო
• უცხოელი გავლენის აგენტების კანონპროექტი პირველი მოსმენით მიღებულია, სპეცრაზმმა აქციაზე წყლის ჭავლი და წიწაკის სპრეი გამოიყენა
• “ეს კანონი არავის სჭირდებოდა, არსაიდან არ მოდის, თუ არა მოსკოვის კარნახით” – სალომე ზურაბიშვილი

ყოველივე ზემოაღნიშნულის გათვალისწინებით, როგორც საზოგადოების თითოეული წევრის წინაშე პასუხისმგებელმა მმართველმა ძალამ, მივიღეთ გადაწყვეტილება, უპირობოდ, ყოველგვარი დათქმის გარეშე გავიწვიოთ ჩვენს მიერ მხარდაჭერილი კანონპროექტი.

ემოციური ფონის ჩაცხრომასთან ერთად, საზოგადოებას უკეთ განვუმარტავთ, თუ რას ემსახურებოდა კანონპროექტი და რატომ იყო მნიშვნელოვანი უცხოური გავლენის გამჭვირვალობის უზრუნველყოფა ჩვენს ქვეყანაში. ამისათვის, დავიწყებთ შეხვედრებს მოსახლეობასთან და ფართო საზოგადოებას გავაგებინებთ სიმართლეს საკითხის თითოეულ დეტალთან დაკავშირებით.

ჩვენ ვმოქმედებთ იმ განსაკუთრებული პასუხისმგებლობით, რომელიც, როგორც მმართველ ძალას, საზოგადოების თითოეული წევრის წინაშე გვაკისრია.

საქართველო შეინარჩუნებს მშვიდობასა და სტაბილურობას და განაგრძობს სვლას ღირსებით ევროპისკენ, რაც ქართული საზოგადოების პრინციპული არჩევანია“, – ნათქვამია განცხადებაში.

რუსული კანონპროექტი უცხოელი აგენტების შესახებ საპარლამენტო უმრავლესობამ 7 მარტს პირველი მოსმენით მიიღო. მათ 9 მარტს დაგეგმილი განხილვა დაჩქარებულად და მოტყუებით 2 დღით ადრე ჩანიშნეს. კანონპროექტს აპროტესტებდნენ საზოგადოებრივი ჯგუფები მისი ინიცირების დღიდან. აკრიტიკებდნენ – საქართველოს დასავლელი პარტნიორებიც და ამბობდნენ, რომ ეს კანონპროექტი არის ხელშემშლელი ფაქტორი საქართველოს ევროინტეგრაციის გზაზე.

საპროტესტო ტალღა გაძლიერდა 7 მარტს კანონპროექტის პირველი მოსმენით მიღების შემდეგ და მოქალაქეები მშვიდობიანი დემონსტრაციების ფარგლებში გამოხატავდნენ მათ პროტესტს. ხელისუფლება კი სპეცრაზმის საშუალებით აქციის დაშლას ცდილობდა ხან – წყლის ჭავლით, ხან – წიწაკის სპრეით და ხანაც – ცრემლსადენი გაზით. თუმცა მომიტინგეებს პროტესტი არ შეუწყვეტიათ. ბოლო ორი დღუს განმავლობაში დააკავეს 100-ზე მეტი მომიტინგეც საზოგადოებრივი წესრიგის დარღვევისა და პოლიციისთვის წინააღმდეგობის გაწევის გამო.