კოალიცია ერთიანობა და კოალიცია ცვლილებისთვის ცესკოს საპარლამენტო სიების გაუქმებისთვის მიმართავს
საპარლამენტო სიების გაუქმება
კოალიცია “ერთიანობა-ნაციონალური მოძრაობა” და კოალიცია “ცვლილებისთვის” ცენტრალურ საარჩევნო კომისიას საპარლამენტო სიების გასაუქმებლად მიმართავს და მე-11 მოწვევის პარლამენტში შესვლაზე უარს ამბობს.
საპარლამენტო სიის გაუქმებაზე განცხადებით, ცესკოს კოალიციის 82 წევრი განცხადებით მიმართავს.
კოალიცია “ცვლილებისთვის” ერთ-ერთი ლიდერის, ნიკა გვარამიას თქმით, 26 ოქტომბრის არჩევნების შედეგებიდან გამომდინარე, პარლამენტი არალეგიტიმურია, ხოლო კოალიციისთვის “ამ პარლამენტში მონაწილეობა, არალეგიტიმურ ქმედებების თანამონაწილეობად” ითვლება.
“ყველა, ვინც ვართ ამ სიაში უარს ვაცხადებთ ნებისმიერი ფორმით თანამშრომლობაზე რეჟიმთან, რომელიც იპარავს არჩევნებს და გამოხატავს რუსეთის ფედერაციის ინტერესებს ჩვენს სამშობლოში.
ამ ქვეყანაში, ამ სამყაროში ჩვენი ერთადერთი მტრის, რუსეთის.
ჩვენ გვესმის, რომ ეს სამართლებრივად სრულიად გამართული განცხადებაა, მაგრამ გვესმის, რომ ცესკო-მ და საქართველოს პარლამენტმა შეიძლება დაიწყოს უკანონო გადაწყვეტილებების მიღება – რამდენჯერაც იქნება საჭირო, ოთხმოცდაორივე წევრი ამ სიისა მოაწერს ხელს უარს.
ამ ეტაპზე, სამართლებრივი თვალსაზრისით, სრულიად გამართულად ვაწერთ ყველანი ხელს ამ განაცხადს, რითაც ვადასტურებთ კვლავ იმას, რომ პარლამენტი არის არალეგიტიმური და ჩვენი თანამონაწილეობა ამ პარლამენტში გამორიცხულია – ჩვენ ვერ შევძენთ მას ლეგიტიმაციას ჩვენი იქ ყოფნით.” – თქვა ნიკა გვარამიამ.
“ერთიანობა-ნაციონალური მოძრაობის” ერთ-ერთი ლიდერის, თინა ბოკუჩავას თქმით, კოალიცია არ ცნობს არჩევნების ლეგიტიმურობას და უარს აცხადებს საპარლამენტო მანდატებზე.
საქართველოს კონსტიტუციის 25-ე პუნქტის ნორმატიული შინაარსიდან გამომდინარე, პარტიული სიის წევრს, მათ შორის პარლამენტში არჩეულ პირს უფლება აქვს, უარი თქვას საჯარო თანამდებობის დაკავებაზე – სახელმწიფო თანამდებობას პირი იკავებს მხოლოდ და მხოლოდ ნებაყოფლობით.
კონსტიტუციის მითითებული ნორმა გამორიცხავს საჯარო თანამდებობის დაკავებისთვის რაიმე ფორმის იძულებას – პირი უფლებამოსილია უარი თქვას დეპუტატის მანდატის მოპოვებაზე და ამას ვაკეთებთ ჩვენ დღეს სწორედ აქ, მათ შორის ოფიციალურად დადასტურებული წერილით თითოეული ჩვენგანისგან, რომელიც გადაეგზავნება ცენტრალურ საარჩევნო კომისიას”. – განაცხადა ბოკუჩავამ.
