ევროპარლამენტარებმა ივანიშვილის, რუსულ კანონზე ხმის მიმცემი დეპუტატების და პოლიციის მაღალჩინოსნების სანქცირება მოითხოვეს. რეაქციები

სანქციები ბიძინა ივანიშვილს

22 აპრილს ევროპარლამენტში რუსულ კანონზე და თბილისში მშვიდობიანი დემონსტრაციის ძალადობრივად დაშლაზე იმსჯელეს. ევროპარლამენტარების სხვადასხვა ჯგუფმა რეზოლუციის პროექტები შეადგინეს, რომლითაც, რუსული კანონის მიღების შემთხვევაში, ბიძინა ივანიშვილის, კანონპროექტისთვის ხმის მიმცემი დეპუტატების, ასევე შინაგან საქმეთა სამინისტროს მაღალჩინოსნების – ვაჟა სირაძის და ზვიად ხარაზიშვილის (მეტსახელად ხარება) – სანქცირება მოითხოვეს.

ამავე სესიაზე ევროპარლამენტარების ნაწილმა – მათ შორის მირიამ ლექსმანმა, ანა ფოტიგამ და მაიკლ გალერმა – მოითხოვა ექსპრეზიდენტ მიხეილ სააკაშვილის პატიმრობიდან გათავისუფლებაც.

რეზოლუციების პროექტების კენჭისყრა 25 აპრილს გაიმართება.

ვაჟა სირაძე საპატრულო პოლიციის დეპარტამენტის უფროსია, ზვიად ხარაზიშვილი კი განსაკუთრებულ დავალებათა დეპარტამენტის დირექტორი. დაკავებული დემონსტრანტების ნაწილი, რომლებიც უფლებების დარღვევას უჩივის, მათ ადანაშაულებს ძალადობის ორგანიზებაში.

▇ მირიამ ლექსმანის, მაიკლ გალერის, რასა იუკნევიჩიენესა და მათი გუნდის პროექტი კანონის მხარდამჭერი ყველა დეპუტატისთვის სანქციების დაწესებას ითხოვს. 

▇ მარკეტა გრეგოროვას და ვიოლა ფონ კრამონის პროექტის მიხედვით, ევროკომისიამ უნდა ჩაატაროს შუალედური შეფასება იმ ნაბიჯების იმპლემენტირების, რომლითაც საქართველოს კანდიდატის სტატუსი მიენიჭა. 

რეაქციები

ევროკომისარმა კრიზისის მართვის საკითხებში, იანეზ ლენარჩიჩმა მოუწოდა საქართველოს მთავრობას, უკან წაიღოს კანონპროექტი უცხოური ძალის ინტერესების გავლენების შესახებ.

ევროპარლამენტარი მაიკლ გალერი ამბობს, რომ “თუკი უცხოეთის აგენტებზე ვსაუბრობთ”, ერთადერთი უცხოეთის აგენტები “მმართველ პარტიაში მყოფი” ის ხალხია, ვინც „აკოპირებს“ რუსულ კანონებს და ხელს უწყობს ისეთ მმართველობას, როგორიც რუსეთშია, – “შესაძლოა, მისი სახელითაც კი.”

გალერმა ახსენა პრემიერ-მინისტრი ირაკლი კობახიძის დაგეგმილი ვიზიტი უნგრეთში ულტრამემარჯვენე, „ანტიგლობალისტურ“ კონფერენციაზე პრემიერ-მინისტრი ვიკტორ ორბათან და თქვა: „მართლა მაინტერესებს, საით მიდის ეს ქვეყანა და მმართველი პარტია?“

“კიდევ ერთხელ მოვუწოდებთ ევროპულ საბჭოს სანქციები დაუწესოს ოლიგარქ ბიძინა ივანიშვილს.” – თქვა ევროკომისარმა მირიამ ლექსმანმა.

ევროპარლამენტარი სვენ მიკსერის თქმით, თუ საქართველოს პარლამენტი კანონს მიიღებს, არ უნდა იყოს მოლოდინი, რომ საქართველო ევროკავშირს შეუერთდება.

● “ქვეყანა ხდება პუტინის პირადი სალარო, ეს იცით რას ნიშნავს?” – ექსპერტები ოფშორების კანონზე და ოცნების ტაქტიკაზე
● “დირექტივა სუბიექტებს უცხოური დაფინანსების გამო სამიზნეში არ იღებს” – EU-ში განმარტავენ, რით განსხვავდება მათი დირექტივა რუსული კანონისგან
● თბილისში ФСБ-სთან დაკავშირებული ორგანიზაციის კონფერენცია გაიმართა. სამი დღით ადრე ისინი ცხინვალში იმყოფებოდნენ 

“ყოველთვის, როცა მგონია რომ “ქართულმა ოცნებამ” ფსკერს მიაღწია, ისინი მაინც ახერხებენ ჩემს გაოცებას უფრო ღრმა ფსკერზე ჩასვლით. 

ეს იმიტომ, რომ “ქართული ოცნება”, რეალურად რუსული ოცნებაა და როცა 83 დეპუტატი ღიად უჭერს მხარს რუსულ კანონს, ეს დემოკრატია აღარაა – ეს არის მარიონეტების შოუ და მათი პატრონი, რომელიც ამ 83 ღილაკს ხელს აჭერს, ბიძინა ივანიშვილია.

ოლიგარქი იღებს ინსტრუქციებს რუსი მესვეურებისგან – ინსტრუქციებს, რომელიც მიზნად ისახავს საქართველოს ევროპული მომავლის წართმევას და მახინჯ, რუსულ სამყაროში შეთრევას.

პუტინის საამებლად, მისი მარიონეტები ყველაფერს გააკეთებენ – დაარღვევენ კანონებს, სცემენ ხალხს – მაგრამ ქართველი ხალხი ამას არ მოითმენს, მათ ახალგაზრდობა ჰყავთ, რომელიც გზას კაფავს ევროპისკენ, რამეთუ ისინი დაიბადნენ თავისუფლებაში არ შეეგუებიან რუსულ ბორკილებს. 

მათი და ჩვენი ევროპული მომავლისთვის ბრძოლაში, ჩვენ ვდგავართ მამაცი ქართველების გვერდით!” – თქვა ევროპარლამენტარმა ვიოლა ფონ კრამონმა.

საქართველოს პარლამენტში რუსული კანონის რეინიცირებას ასევე გამოეხმაურა ევროპარლამენტარი მარკეტა გრეგოროვა და თქვა, რომ საქართველოს მოქალაქეები კვლავ რეპრესიების წინაშე არიან, ახლა უკვე  სპეცდანიშნულების რაზმის მეთაურის ზვიად ხარაზიშვილის მხრიდან. 

“მოვუწოდებ ევროკავშირის ინსტიტუტებს, მიიღოს სანქციები, ქართველი ინდივიდების წინააღმდეგ, რომლებიც ხელს უშლიან დემოკრატიულ პროცესებს და აორგანიზებენ მშვიდობიანი დემონსტრანტების დევნას, კერძოდ: ზვიად ხარებაშვილისა და ვაჟა სირაძის წინააღმდეგ.” – განაცხადა პეტრას აუსტრევიჩიუსმა.