სომხეთის საზღვართან აზერბაიჯანულ-თურქული ერთობლივი სამხედრო სწავლება იწყება
თურქულ ქალაქ ყარსში ჩავიდა აზერბაიჯანელი სამხედრო მოსამსახურეების ჯგუფი, თურქულ არმიასთან ერთობლივი სამხედრო წვრთნების ჩასატარებლად. ეს ბოლო დროის ყველაზე მასშტაბური სამხედრო სწავლება იქნება არა მხოლოდ აზერბაიჯანის, არამედ თურქეთის შეიარაღებული ძალებისთვის. ყარსის პროვინცია სომხეთს ესაზღვრება.
1-დან 12 თებერვლის ჩათვლით, ორი ქვეყნის ზამთრის ერთობლივ სწავლებაში მონაწილეობას მიიღებენ სატანკო დანაყოფები, საარტილერიო შენაერთები, სნაიპერები, სპეციალური დანიშნულების ჯარების მეთაურები, კომანდოსები და საბრძოლო ვერტმფრენები.
- ყარაბაღის დაუმთავრებელი ომი: ფსიქოლოგიური პრობლემების ეტაპი
- რუსეთი აზერბაიჯანში სამხედრო ბაზას ქმნის – კომენტარები ბაქოდან
აზერბაიჯანის ყოფილი საგარეო საქმეთა მინისტრის, ტოფიკ ზულფუგაროვის აზრით, ყარსში ზამთრის სამხედრო სწავლება გეგმურია და მიზნად ისახავს არმიების მომზადებას რთულ კლიმატურ პირობებში საბრძოლო მოქმედებების ჩატარებისთვის.
„ყარსის პროვინციაში ახლა თოვლია, იქ მთებია და აზერბაიჯანელი და თურქი მებრძოლებისთვის არცთუ ისე ჩვეულებრივი კლიმატური პირობები. შეიძლება, ამით არის განპირობებული მორიგი ერთობლივი სამხედრო წვრთნებისთვის ადგილის შერჩევა“, – განაცხადა მან JAMnews-თან ინტერვიუში.
სომხურ საზოგადოებაში გაჩენილი იმ პანიკური განწყობის კომენტირებისას, რომელიც მათი საზღვრის სიახლოვეს სამხედრო სწავლების დაწყების შესახებ ინფორმაციის გამოჩენამ გამოიწვია, ზულფუგაროვმა დასძინა:„ყარაბაღის მეორე ომის შედეგებზე შეთანხმების შემდეგ (2020 წლის 10 ნოემბრის სამმხრივი შეთანხმება, რომელსაც ხელი მოაწერეს რუსეთისა და აზერბაიჯანის საგარეო საქმეთა მინისტრებმა, ასევე, სომხეთის პრემიერ-მინისტრმა – JAMnews), აზერბაიჯანის არმიის ნებისმიერი გადაადგილება სომხური საზღვრის სიახლოვეს, მეზობელი ქვეყნის მოსახლეობას პანიკაში აგდებს. ეს მათი საზრუნავია, რომელიც ჩვენ არ უნდა გვაღელვებდეს“.
თურქეთის ეროვნული თავდაცვის სამინისტროს ინფორმაციის თანახმად, აზერბაიჯანელი სამხედრო მოსამსახურეები უკვე ჩავიდნენ ყარსში.
ზამთრის სამხედრო სწავლების ძირითად მიზნად დასახელებულია ორი ქვეყნის არმიების კოორდინაცია რეალურ საბრძოლო მოქმედებებთან მიახლოებულ პირობებში. ასევე, ყარსში გამოიყენებენ უახლეს შეიარაღებას, რომელიც ცოტა ხნის წინ შევიდა აზერბაიჯანისა და თურქეთის არმიების არსენალში, ნათქვამია თურქეთის თავდაცვის უწყების ოფიციალურ ინფორმაციაში.
თურქეთისა და აზერბაიჯანის არმიების ერთობლივი სამხედრო სწავლებები რეგულარულად ტარდება. ბოლო ასეთი სწავლება 2020 წლის ივლის-აგვისტოში, აზერბაიჯანის ტერიტორიაზე მოეწყო.
