სალომე ზურაბიშვილი დონალდ ტრამპ უმცროსის მიწვევით წინასაინაგურაციო წვეულებას დაესწრო. ფოტო
სალომე ზურაბიშვილი რესპუბლიკელების ყრილობაზე
საქართველოს მეხუთე პრეზიდენტი, სალომე ზურაბიშვილი დონალდ ტრამპ უმცროსის მიწვევით აშშ-ის რესპუბლიკური პარტიის წინასაინაუგურაციო შეხვედრაზე იმყოფებოდა, სადაც ტრამპის მომავალი კაბინეტის წევრებს, მათ შორის, სახელმწიფო მდივნობის კანდიდატ მარკო რუბიოსა და თავდაცვის მინისტრობის კანდიდატ პიტ ჰეგსეთს შეხვდა.
ამასთან, ზურაბიშვილის გარდა, დონალდ ტრამპ უმცროსის მიწვევით რესპუბლიკელების წინასაინაუგურაციო წვეულებაზე იმყოფებოდნენ პარტია “ფედერალისტების” ლიდერები, გიგა ბოკერია და თამარ ჩერგოლეიშვილი.
სალომე ზურაბიშვილის განცხადებით, პარტნიორები მზად არიან საქართველოს ახალი არჩევნების ჩატარებაში დაეხმარონ.
“მზად არიან, რომ დაგვეხმარონ ახალი არჩევნების მოწყობაში, რაც იქნება საჭირო იმისთვის, რომ პირობები შეიქმნას, ისეთი, რომელიც გარანტიას მოგვცემს რომ სამართლიანი იქნება შემდეგი არჩევნები. ამაზე ვიმუშავებთ, მაქვს მათი მზადყოფნა, რომ ყველანაირად დაგვეხმარონ და ჩვენ უნდა წარვუდგინოთ ის მოთხოვნები, რომელიც საზოგადოებისთვის იქნება მისაღები, ახლი ძალებისთვის, პოლიტიკური პარტიებისთვის, არასამთავრობო ორგანიზაციებისთვის. უნდა ძალიან სწრაფად ვიმუშაოთ, ესაა მოკლევადიანი გეგმა, რომ ერთად მოვამზადოთ ახალი არჩევნები. არამხოლოდ ვისაუბროთ ახალ არჩევნებზე და მის აუცილებლობაზე, არამედ მოვამზადოთ ეს არჩევნები. ამით მე ვარ ძალიან გამაგრებული, რომ ეს მხარდაჭერა არსებობს.
ის რომ რესპუბლიკური ინსტიტუტი ასე მზადაა, ჩვენ ვნახეთ მათ ანგარიში, რომელიც იყო მკაფიო არჩევნების გაყალბების შესახებ. მათ აქვთ ძალიან სერიოზული რეკომენდაციები და ამითაც შეიძლება ჩვენ ვიხელმძღვანელოთ”. – ამბობს ზურაბიშვილი TV პირველთან.
მისივე თქმით, ივანიშვილის ხელისუფლება ლეგიტიმური არაა და ესაა მისი ერთ-ერთი მთავარი გზავნილი ვაშინგტონში.
“მე ვარ ძალიან ბედნიერი, რომ ჩემი სახით, საქართველო არის წარმოდგენილი ამ ინაუგურაციაზე. არ შეიძლება, რომ რეჟიმი იყოს დასანქცირებული, როგორიც არის უკვე მისი მთავარი წარმომადგენლები . არ შეიძლება სახელმწიფოს ყველა ინსტიტუტი იყოს მიკერძოებული და ერთი ადამიანის ხელში და ამ დროს ვინმე საუბრობდეს ლეგიტიმაციაზე, ეს მხოლოდ არჩევნების საკითხი აღარ არის. ესაა საკითხი, რომელიც ეხება რეჟიმს, რომელიც გამოვიდა კონსტიტუციიდან. რომელსაც აღარ აქვს არცერთი ნიშანი დემოკრატიისა და სახელმწიფოებრიობის. და ვერ ექნება ვერცერთი პრეტენზია რომ იყოს ლეგიტიმური წარმომადგენელი ჩვენი ხალხის, ესაა ჩემი მთავარი გზავნილი აქ.” – განაცხადა სალომე ზურაბიშვილმა.
“მადლობელი ვარ, რომ საქართველოს პრეზიდენტი, სალომე ზურაბიშვილი პრეზიდენტის შვილს, დონალდ ტრამპ უმცროსს წარვუდგინე. ორი საოცარი ადამიანი, რომლებიც მსოფლიოში უამრავი სიკეთის გასაკეთებლად მუშაობენ“, – აღნიშნა ამერიკელმა კონგრესმენმა ჯო უილსონმა.
