საქართველოს პრეზიდენტის, სალომე ზურაბიშვილის თქმით, ოცნების წევრები “ტყუილად აპელირებენ რაღაც ჰუმანიტარულ, ფსევდოპატრიოტულ გრძნობებზე”. მისი განმარტებით, ეს საკითხი არ დგას და არ იდგა, თუ არა კრემლის მანიპულაცია. ამ განცხადებით პრეზიდენტი “რუსეთში მყოფ მილიონ ქართველზე” მმართველი პარტიის პროპაგანდას პასუხობს.
ზურაბიშვილი ამბობს, რომ თუ ასე შესტკივა სახელმწიფოს უცხოეთში მყოფ ქართველების ბედზე გული, “რატომ ვერაფრით მიაღწია შედეგს იუსტიციის სამინისტროსთან ოთხწლიანი მოლაპარაკებებით, რომ გამარტივდეს მოქალაქეობის მინიჭება მათთვის”.
კიდევ რა თქვა სალომე ზურაბიშვილმა:
● რაც ეხება საქართველოში ჩამოსვლის ვითომცდა სირთულეებს, გაგახსენებთ, რომ რუსეთიდან უპრობლემოდ ჩამოდიან მინსკის, ერევნის, ბაქოს და თურქეთის გავლით, ან კიდევ ლარსის სახმელეთო საზღვრის გადაკვეთით. ვიზის პრობლემა ხომ არ ჰქონიათ!
● 700 000 -ზე მეტი შემოსული რუსეთის მოქალაქე (მათ შორის, ქართული წარმოშობის) და 600 000 გასული ჩვენი ქვეყნიდან, იმას მაინც ადასტურებს, რომ გადაადგილება მარტივია.
საინტერესოა რატომ?
● ვინც ამ თემით აპელირებს და სტკივა რუსეთში მყოფი ჩვენი მოქალაქეების ბედი, იმავდროულად, ნუთუ არ ადარდებს ასევე ამერიკაში, ან ევროპაში მცხოვრებ ჩვენს მოქალაქეების ბედი, რომლებიც პირდაპირი რეისებით ვერ სარგებლობენ და მათაც უჭირთ სამშობლოში ჩამოსვლა.
● იმაზეც ხომ არ უნდა ვფიქრობდეთ, რომ უკვე სამი წელია, არ შეუძლიათ ჩვენს თანამემამულეებს ჰერეთიდან ჩამოსვლა, რადგანაც კოვიდის შემდეგ ჩაკეტილი ლაგოდეხ – ბელაქანის საზღვარი აღარც გახსნილა. (ადამიანებმა გრძელი გზა უნდა გაიარონ ბაქომდე და იქიდან გადმოფრინდნენ, რაც პრაქტიკულად მათი უმრავლესობის შესაძლებლობებს აღემატება).
● უნდა ვიზრუნოთ უცხოეთში მყოფ ჩვენს მოქალაქეებსა, თუ ყოფილ მოქალაქეებზე, ეს უნდა იყოს ჩვენნაირი სახელმწიფოს ერთ-ერთი პრიორიტეტი და დიასპორის მიმართ კომპლექსური სტრატეგია და არა კრემლის მიერ შერჩეულ დროს და დაკვეთილ მუსიკაზე ცეკვა.
რუსეთის 2020 წლის მოსახლეობის აღწერის თანახმად, რუსეთის ტერიტორიაზე 113 687 ეთნიკურად ქართველი ცხოვრობს. როსტატის ვებგვერდზე ცალკე არიან გამოყოფილები ადამიანები ოკუპირებული რეგიონებიდან – 8 177 აფხაზი და 323 ოსი. თუმცა “ქართული ოცნება” ამტკიცებს, რომ “სასჯელი იყო დაწესებული მილიონამდე ადამიანისთვის”, რომელიც 10 მაისს, პუტინის განკარგულებით მოიხსნა.
როსტატის ვებგვერდზე ატვირთულ აღწერაში აღნიშნულია, რომ რუსეთში მხოლოდ 3 045 პირია საქართველოს მოქალაქე. ამ შემთხვევაშიც ცალკე არიან გამოყოფილები მოქალაქეები ოკუპირებული ტერიტორიებიდან: აფხაზეთი – 644, ცხინვალის რეგიონი – 333.
აღწერის თანახმად, საქართველოში დაბადებული და რუსეთში მცხოვრები (ეთნიკური კუთვნილების მიუხედავად) 196 610 ადამიანია.
10 მაისს რუსეთის პრეზიდენტმა ვლადიმერ პუტინმა ხელი მოაწერა საქართველოს მოქალაქეებისთვის სავიზო რეჟიმის გაუქმების შესახებ დოკუმენტს 2023 წლის 15 მაისიდან. მეორე განკარგულებით კი, პუტინმა გააუქმა რუსეთიდან საქართველოში საჰაერო მიმოსვლის აკრძალვა.
