სახალხო დამცველი: სააკაშვილი მოატყუეს, რომ სამოქალაქო კლინიკაში გადაჰყავდათ

სახალხო დამცველის, ნინო ლომჯარიას განცხადებით, რომელმაც მოახერხა გლდანის ციხეში გადაყვანილი ექს-პრეზიდენტის მონახულება, სააკაშვილი მოატყუეს, რომ სამოქალაქო კლინიკაში გადაჰყავდათ.

“სააკაშვილმა იცოდა, რომ გადაყავდათ სამოქალაქო კლინიკაში, დაემშვიდობა იქაურ ექიმებს, რასაც ექიმები ადასტურებენ. ოფიციალური დოკუმენტი, რომლითაც პატიმარ საკაშვილს გააცნეს, სად გადაყავდათ, არ არსებობს. რაც მნიშვნელოვანია, მას სურდა კონსილიუმთან შეხვედრა, ელოდებოდა კონსილიუმთან შეხვედრას 3 საათზე. უარი უთხრეს ამაზე“, – განაცხადა ნინო ლომჯარიამ გლდანის ციხის დატოვების შემდეგ.

მისივე განცხადებით, მას შემდეგ რაც მიხეილ სააკაშვილი გლდანის ციხეში მიიყვანეს, მან უარი განაცხადა სასწრაფო დახმარების ავტომობილიდან გადმოსვლაზე. იგი ციხეში ძალის გამოყენებით შეიყვანეს.

მიხეილ სააკაშვილის გლდანის ციხეში გადაყვანის შემდეგ გავრცელდა ინფორმაცია, რომ მას ფიზიკური დაზიანებები აქვს.

ჟურნალისტის კითხვაზე, შენიშნა თუ არა ყოფილ პრეზიდენტს რაიმე დაზიანებები, სახალხო დამცველმა განაცხადა, რაც მას ასეთი დაზიანებები არ შეუნიშნავს, ექიმის გასინჯვაზე კი ექს-პრეზიდენტი უარს აცხადებს.

• უკრაინული მიშა
  
• “სანამ სტრასბურგი სააკაშვილის საქმეს განიხილავს, ის უნდა გათავისუფლდეს” – ევროპარლამენტარების წერილი

გლდანის ციხის ჰოსპიტალში “კატე”-ს აპარატი, რომელიც პაციენტის გამოკვლევებისთვის არის საჭირო, გლდანის ციხეში მხოლოდ სააკაშვილის გადაყვანის შემდეგ მიიტანეს.

ნინო ლომჯარიას განცხადებით, ეს აპარატი ჯერ ისევ დერეფანში დგას. სახალხო დამცველმა თქვა, რომ ციხის კლინიკაში კვლავ არ არსებობს მაგნიტურ-რეზონანსული ტომოგრაფიის აპარატიც.

სახალხო დამცველმა გლდანის ციხეში არსებული სამკურნალო დაწესებულება რამდენჯერმე შეისწავლა. ომბუდსმენი ანგარიშებში წერდა, რომ კლინიკაში პაციენტის მკურნალობისთვის შეუსაბამო პირობებია.

ეს ერთ-ერთი არგუმენტი იყო მიხეილ სააკაშვილის მკურნალი ექიმებისა და ადვოკატებისთვის, რის გამოც ისინი კატეგორიულად ეწინააღმდეგებოდნენ მიხეილ სააკაშვილის გლდანის ციხეში გადაყვანას. ამას არც თავად ყოფილი პრეზიდენტი თანხმდებოდა.

ექიმთა კონსილიუმი, სამოქალაქო სექტორი, ოპოზიცია, ქართველი ხელოვანები და სხვა, არაერთი ადამიანი, ხელისუფლებას ყოფილი პეზიდენტის სამოქალაქო, მრავალპროფილურ კლინიკაში გადაყვანას სთხოვდა.

ამ მოთხოვნით პოლიტიკური პარტია “დროას” ლიდერმა ელენე ხოშტარიამ პარლამენტში შიმშილობაც დაიწყო. ხელისუფლება კი ჯიუტად იმეორებდა, რომ საჭიროების შემთხვევაში პატიმარს მხოლოდ გლდანის ციხის სამკურნალო დაწესებულებაში გადაიყვანდა.

მიხეილ სააკაშვილი გლდანის ციხეში 8 ნოემბერს, საღამოს გადაიყვანეს.

სააკაშვილის გადაყვანის შესახებ უწყებას წინასწარ ინფორმაცია არ გაუვრცელებია. ამის შესახებ წინასწარ ინფორმაცია არც პრეზიდენტის ოჯახს ჰქონდა.

სად და როგორ გადაიყვანეს პატიმარი ექს-პრეზიდენტი, რომელსაც 40-დღიანი შიმშილობის შემდეგ მძიმე ჯანმრთელობის მდგომარეობა აქვს, რამდენიმე საათის განმავლობაში იყო უცნობი.

ამ პროცესების პარალელურად, 8 ნოემბრიდან ოპოზიციამ მიხეილ სააკაშვილის გათავისუფლებისა და რიგგარეშე არჩევნების დანიშვნის მოთხოვნით, ფართომასშტაბიანი, უწყვეტი საპროტესტო აქციები დაიწყო.

“ერთიანი ნაციონალური მოძრაობის” ლიდერმა ნიკა მელიამ განაცხადა, რომ „პროტესტი იქნება მტკიცე, ხალხმრავალი, უწყვეტი და მშვიდობიანი“ და ის გაგრძელდება იქამდე, ვიდრე ოპოზიცია საბოლოო გამარჯვებას არ მიაღწევს.