ნოსტალგია, კომფორტი და კარგი კვება - რას ჰყვებიან საირმეში დასვენებაზე ცნობილი ადამიანები

საირმეში დასვენება

საბჭოთა დროს საირმე ერთ-ერთი ყველაზე პოპულარული დასასვენებელი ადგილი იყო საქართველოში – აქ ისვენებდნენ როგორც საბჭოთა ელიტის წარმომადგენლები, ისე რიგითი საბჭოთა მოქალაქეები, რომლებიც სპეციალურ საგზურებით ყოველ წელს ჩამოდიოდნენ ოჯახებით.

შემდეგ, 90-იანებში, ისევე როგორც ბევრი რამ, აქაური ინფრასტრუქტურაც მოიშალა, გაიძარცვა. აქაურობა დავიწყებას მიეცა და იქცა მოგონებად, რომელიც საოჯახო ალბომებში შემორჩენილ ფოტოებზე ცოცხლდებოდა.

რამდენიმე წლის წინ საირმეში დიდი ცვლილებები დაიწყო. კომპლექსი თავიდან ბოლომდე განახლდა და ახალი სიცოცხლე შეიძინა. ამჟამად ეს თანამედროვე კურორტია, რომლის ტერიტორიაზე ფუნქციონირებს ოთხვარსკვლავიანი სტანდარტის ორი სასტუმრო (“საირმე” და “ახალი საირმე”) თავისი სპა-ცენტრით, აუზებით და სარეკრეაციო-გასართობი ინფრასტრუქტურით. კურორტის მთავარი ღირსება კვლავინდებურად მისი უნიკალური თერმული წყლებია, რომლებიც მიწის სიღრმიდან მოედინება და რომელთა სამკურნალო თვისებები უკვე თანამედროვე ევროპული ლაბორატორიების კვლევებით დასტურდება.

განახლებული საირმე საქართველოში ხელახლა აღმოაჩინეს და იგი უკვე გახდა ბევრი ცნობილი ადამიანისთვის საყვარელი დასასვენებელი ადგილი. ჩვენ ვესაუბრეთ “საირმის” რამდენიმე სტუმარს და ვკითხეთ, თუ რამ მოახდინა მათზე განსაკუთრებული შთაბეჭდილება.

ვატო კახიძე, კომპოზიტორი, დირიჟორი და პიანისტი:

საოცარი გარემო და ბუნებაა, საოცარი სილამაზე, ჰაერი და წყალი. სასტუმრო არაჩვეულებრივად კომფორტულია. განსაკუთრებით მინდა გამოვყო კვება. გასაგებია, რომ იმერეთია, სადაც ისედაც უგემრიელესი საჭმელები აქვთ, მაგრამ ამ სასტუმროში მართლა უგემრიელესი კვებაა.

აღსანიშნავია, თავად ექიმების მომსახურება. იცით, რომ საირმეს წყალს სამკურნალო დანიშნულებით იყენებენ და იქვე არიან ექიმები, რომლებიც გაკვალიანებენ, რომელი წყალი რა რაოდენობით უნდა მიიღო შენი ჯანმრთელობის მდგომარეობიდან გამომდინარე. იქ დასვენების დროს კულტურული პროგრამებიც იყო, რაც ასევე მომეწონა.

თბილისიდან საირმემდე პატარა გზა არ არის, მაგრამ იქ რომ ჩადიხარ, ისეთი კომფორტია, რომ ეს გზა გავიწყდება. ჩემი დასვენების დღეები მხოლოდ კარგად მახსენდება და საირმეზე მხოლოდ აღმატებულად შემიძლია საუბარი.

ეკა მამალაძე, მომღერალი:

დედაჩემს წლებია ვეხვეწებოდი, წამოსულიყო “საირმეში”. ხან რა უშლიდა ხელს და ხან რა და როგორც იქნა, შევძელით ერთად წამოსვლა. იმდენად მოვიხიბლეთ აქაურობით, ნანიმ თქვა, ყოველ წელს აქ ვივლიო. ახლა ზამთარს ველოდებით, რომ ისევ წავიდეთ.

ბუნება, კომფორტი, კარგი მომსახურება, სითბო, სიყვარული. მართლაც შთაბეჭდილების ქვეშ ვართ. გასახარია, რომ საქართველოში გვაქვს ასეთი ადგილები. მხოლოდ საირმის წყალი რამხელა სიმდიდრეა და ძალიან ბედნიერი ვარ, ასე კარგად რომ უვლიან.

გასართობი ატრაქციონებია გასაგიჟებელი, ზიპლაინზეც დავჯექი და წარმოუდგენელი ემოცია იყო. აღარაფერს ვამბობ ჩემს საყვარელ სპა-ცენტრზე, სადაც ასევე საოცარი მომსახურებაა.

საირმიდან  ჩვენ ზალცბურგში მოგვიწია წასვლა და ყველგან იმას ვყვებოდით, რომ არაფერი გასაკვირი არ არის, არც შვეიცარია, არც ავსტრია, რადგან აქვე, საქართველოში გვაქვს ასეთი სიმდიდრე.

ბედნიერებაა, რომ საირმეს, ამ საოცარ ადგილს და ბუნებას კარგად პატრონობენ, უვლიან. უცხოელებიც ჩამოდიან და აღფრთოვანებულები მიდიან აქედან, რაც მე განსაკუთრებით მეამაყება. ქართველებს ჩვენი არაფერი არ მოგვწონს და გვგონია, რომ სადღაც უკეთესია.

ირინა ონაშვილი, ტელეწამყვანი

ვიკა ბუკია, ჟურნალისტი: 

ირინა: არაჩვეულებრივად დავისვენეთ საირმეში. მე და ჩემი მეგობარი ვიკა ვიყავით. მძიმე სამუშაო გრაფიკის გამო ორივეს ძალიან გვჭირდებოდა განტვირთვა და საირმეში ეს იდეალურად მოვახერხეთ. მე განსაკუთრებით სპა მომეწონა, თერმულ წყალი ძალიან ატენიანებს კანს. ისეთი სუფთა და კრიალა ჰაერია, ეგრევე გადუნებს და გამშვიდებს. ძალიან თბილი გარემოა, არაჩვეულებრივი ინფრასტრუქტურა. 

ვიკა: ზიპლაინი იყო ჩემი განსაკუთრებული შთაბეჭდილება, საოცარი ადრენალინია. მე აქტიური დასვენება მიყვარს და იქ ბევრი გასართობი ვიპოვე.

ასევე ბევრი ვისეირნე ფეხით. პერსონალი ძალიან კეთილგანწყობილი, კვება – არაჩვეულებრივი. განსაკუთრებით გამოვარჩევდი იტალიურ სამზარეულოს, კერძოდ კი, ზღვის პროდუქტების უგლუტენო პასტას, რომელიც იქ გავსინჯე.

კიდევ დავაკვირდი იმას, რომ მიუხედავად იმისა, რომ პირველად ვიყავი საირმეში, რაღაც თბილი, ნოსტალგიური განწყობა შემექმნა. თითქოს, ნაცნობ ადგილას ვიყავი – საოჯახო ალბომში სულ მხვდებოდა საირმეში გადაღებული დედაჩემის და მამაჩემის ბავშვობის ფოტოები. რომ ვსეირნობდი, სულ იმაზე ვფიქრობდი, რამდენი ადამიანი, რამდენი თაობა დადიოდა ამ ბილიკებზე ჩემამდე. 

საირმეში გატარებული დღეები დააგვირგვინა “Off-Road” ტურმა. საირმეში შანსი მოგვეცა გამოგვეცადა ეს აქტივობა!
ამ მოგზაურობას განსაკუთრებული ხიბლი შესძინა ბუნების სილამაზემ. ბოლოს ჩანჩერთან მივედით, რომელმაც საოცარი ენერგეტიკით აგვავსო.

მერაბ სეფაშვილი, მომღერალი

სულ რამდენიმე დღე გავატარე ამ სასტუმროში და ისეთი ნოსტალგია, სითბო და სიყვარული ვიგრძენი, დღემდე მომყვება. განსაკუთრებული ჰაერი რომ არის, ამაზე აღარაფერს ვიტყვი. ისეთი გარემოა, მოგანდომებს აქ ხშირად ჩამოსვლას – არაჩვეულებრივი სასტუმრო, არაჩვეულებრივი ხალხი.

სხვათა შორის, შეიძლება ვინმეს ჩემმა ნათქვამმა ღიმილი მოჰგვაროს, მაგრამ არ შემიძლია, არ ვთქვა, რომ უგემრიელესი საჭმელი აქვთ. ძალიან კარგი დრო გავატარეთ. თან მე როდესაც ვიყავი, იქ იყო ასევე ქალბატონი ნანი ბრეგვაძე, ვატო კახიძე. დადებითი ემოციებით დამუხტულები და ბევრი სასიამოვნო მოგონებით დავბრუნდით. 

ინგა გრიგოლია, ჟურნალისტი:

პირველად ვიყავი და მივხვდი, რომ თუ მართლა დასვენება, შენი თავის მიხედვა და სრული განტვირთვა გინდა, აქ უნდა წახვიდე. მე და ჩემი შვილი ვისვენებდით და უაღრესად კმაყოფილი დავრჩი. საქართველოში ასეთი გემრიელი დასვენება ბევრ ადგილას არ მახსენდება. ძალიან მაგარია თავისი სპა-პროცედურებით, რაც საირმის წყალს უკავშირდება. ჰაერი, გარემო ყველაფერი იმდენად შერწყმული და არაჩვეულებრივი იყო, მეგონა, ათი დღე კი არა, ხუთი თვე დავისვენე. შვილთან და ძაღლთან ერთად ვიყავი, სასტუმრო “ახალ საირმეში” ვცხოვრობდით. ჩემთვის მნიშვნელოვანია, რომ ძაღლების მიმართ აქ კეთილგანწყობილები არიან. რადგან, როგორც წესი, საქართველოში ძაღლის გამო პრობლემები მაქვს ხოლმე. ამიტომ, როდესაც რამე ადგილს ვარჩევ დასასვენებლად, ყოველთვის ისეთს ვეძებ, ძაღლთან ერთად რომ შევძლო დასვენება. კვება განსაკუთრებით უნდა აღვნიშნო – იდეალური იყო. საუკეთესო ადგილია, ყოველთვის ორივე ხელით გავუწევ რეკომენდაციას და აუცილებლად კიდევ ბევრჯერ წავალ.

ლადო აფხაზავა, მასწავლებელი:

საირმეს ახსენებთ თუ არა, უკვე ქაოსი იწყება ჩვენს სახლში – სამი ბიჭი მყავს და სამივეს ძალიან  უყვარს იქაურობა. სულ მაგას მეხვეწებიან, ისევ წავიდეთო.

ჩემი ოჯახისთვის საირმე თავისუფლების პატარა კუნძულად იქცა, სადაც ყველაზე გემრიელად დავისვენეთ. ყველაზე ალალი დასვენება სწორედ საირმეში გამოგვდის, რადგან აქ ყველაფერი მოგვწონს – ხალხი, მომსახურე პერსონალი, გარემო. ყოველთვის, როდესაც საირმეში ჩავდივართ, გვგონია, რომ ეს ჩვენი სახლია, რომელიც ასე ლამაზად გაარემონტეს. ისეთ ატმოსფეროს ქმნიან, თავი სახლში გვგონია;

ასევე, განსაკუთრებით უნდა აღვნიშნო კვება – საქართველოში ძალიან ბევრ ადგილას ვყოფილვარ და ასე გემრიელი საკვები მართლა არსად არ არის, ყველა კერძი დღემდე გვახსოვს. იმ დღეს სახლში რაღაც საჭმელი გავაკეთეთ და საირმეს საჭმლის გემოს მივამგვანეთ.

როდესაც ჩადიხარ, იმდენი სერვისი გხვდება ერთად, რომ გგონია, მარტო შენთვის გააკეთეს ყველაფერი.

ასევე, ძალიან მომწონს ის, რომ ქველმოქმედებას ეწევიან. ბევრჯერ საქველმოქმედო და საგანმანათლებლო პროექტები განხორციელებულა ამ სასტუმროში. მაგალითად, ვიცი, რომ ბევრ ობოლ და მზრუნველობამოკლებულ ბავშვს მასპინძლობენ. კარგი იქნება, თუ დამსვენებლებს ეცოდინებათ, რომ მათ მიერ გადახდილი თანხის ნაწილი სწორედ ქველმოქმედებას ხმარდება.

რუსუდან  სებისკვერაძე, კომპოზიტორი

საირმესთან შესანიშნავი მოგონებები მაკავშირებს. აქაურობა ყოველთვის მიყვარდა, მაგრამ განახლებული საირმე მართლა საოცრებაა. აქ ისე სრულფასოვნად ვისვენებ, როგორც არსად სხვაგან. ამის მიზეზი ისაა, რომ არაჩვეულებრივი მასპინძლები გვხვდებიან, რომლებიც თითოეულ ადამიანზე გამორჩეულად ზრუნავენ. ჩვენ ყველას გვიხარია საირმეში დასასვენებლად წასვლა. მადლობა მათ კომფორტული და პოზიტიური გარემოსთვის და შესანიშნავი მოგონებებისთვის.

ბლოგერი მარი წილოსანი (Marisunny)

განსაკუთრებით აღსანიშნავია სასტუმროს მდებარეობა – ხედები ფანტასტიკური. ამ გარემოში რომ ხვდები, უკვე ისვენებ. ამას დაუმატეთ ის სითბო და მომსახურება, რაც სასტუმრო “ახალ საირმეშია”. ეს ყველაფერი დასვენებას მართლა არაჩვეულებრივს ხდის. რაც მე იქ ვიყავი, სულ რაღაც აქტივობები იმართებოდა, რაც განსაკუთრებით მნიშვნელოვანია ჩემთვის და ალბათ, ყველასთვის, ვისაც აქტიური დასვენება უყვარს. ზიპლაინი, მიზანში სროლის ატრაქციონი, ჰყავთ ცხენები, ძალიან კარგი აუზები და ა.შ. ზიპლაინი ჩემთვის იყო ძალიან მიმზიდველი და ბევრჯერ ჩამოვსრიალდი, საოცარი ადრენალინია. ასევე, აუცილებლად უნდა ვთქვა მუსიკაზე – ცოცხალი მუსიკა აქვთ, რაც არის ძალიან კარგი და ნამდვილად დასამახსოვრებელს ხდის იქ ყოფნას. სასტუმროს დიზაინსა და კომფორტზე აღარაფერს ვამბობ, მართლა საოცრებაა. მე, როგორც გითხარით, განსაკუთრებით გასართობმა ატრაქციონებმა მომხიბლა, მაგრამ არანაკლებია გარემო, მომსახურება და საერთო ჯამში საუკეთესო ადგილია დასვენებისთვის. მგონია, რომ ზამთარშიც იდეალური იქნება აქ დასვენება.  

მომღერალი, მუსიკოსი სალომე ბაკურაძე

საირმეს განსაკუთრებულად ვგულშემატკივრობ, რადგან ჩემი მშობლიური იმერეთია. იქაურობა ჩემთვის ძალიან ნაცნობია და საყვარელი, ჩემს შვილსაც ხშირად ვუშვებ იქ დასასვენებლად და ძალიან მოსწონს. ბოლოს რომ ვიყავი, კიდევ უფრო განახლებული და გამართული დამხვდა – დამატებულია აუზები, რაც განსაკუთრებით მომეწონა. საოცარი რესტორანი და საჭმელი აქვთ. ის, რომ ჯანსაღ კვებას ექცევა განსაკუთრებული ყურადღება, ეს ცალკე აღნიშვნის ღირსია. სამკურნალოდ და დასასვენებლად რომ ჩადიხარ და ამას ჯანსაღი კვება და გართობაც რომ ემატება, ნამდვილად იდეალურია. ბოლოს ძალიან ცოტა ხნით მომიწია ყოფნა და იმდენად არ მეყო, რომ ვფიქრობ, ზაფხულში აუცილებლად  ვესტუმრები შვილთან ერთად. ყველასთვის ერთნაირად კარგი დასასვენებელია, ოჯახთან იქნები თუ მარტო. ისეთი გარემო და ისეთი გასართობი ატრაქციონებია, ინფრასტრუქტურულად ისეთი გამართულია, რომ ნებისმიერი სიტუაციისთვის ძალიან კარგია – კომფორტულია იმ შემთხვევაშიც, თუ მარტო ისვენებ და მაშინაც, ოჯახთან ერთად ხარ თუ მეგობრებთან ერთად.