როგორ ეხმაურება საერთაშორისო მედია The Killers-ის კონცერტს
საერთაშორისო მედია The Killers-ის კონცერტზე
15 აგვისტოს ამერიკული როკ ჯგუფის, The Killers-ის კონცერტი რუსი დრამერის სცენაზე აყვანის გამო მსმენელის ნაწილმა დატოვა, შემდეგ კი ჯგუფის წევრებს და კონცერტის ორგანიზატორებს მსმენელისთვის ბოდიშის მოხდა მოუწიათ.
Black Sea Arena-ზე მომხდარ ინციდენტს რამდენიმე ავტორიტეტული საერთაშორისო გამოცემა გამოეხმაურა.
The Guardian:
“The Killers-მა ბოდიში მოიხადა. მიზეზი საქართველოში მიმდინარე კონცერტზე სცენაზე რუსი თაყვანისმცემლის ამოყვანა გახდა. საქართველო ყოფილი საბჭოთა რესპუბლიკაა, რომელიც რუსეთი 2008 წელს შეიჭრა. სოლისტმა მსმენელს უთხრა, რომ რუსები და ქართველები ძმები და დები არიან.
შემთხვევა სამშაბათს საღამოს, ბათუმში მოხდა.
“ჩვენ არ ვიცით ამ ქვეყნის ეტიკეტი, მაგრამ ეს ბიჭი რუსია, წინააღმდეგები ხომ არ ხართ რომ ამოვიდეს”? – იკითხა ბენდის სოლისტმა ბრენდონ ფლაუერსმა. მის ნათქვამს მსმენელი ხმაურით შეხვდა.
სიმღერის დასრულების შემდეგ ფლაუერსმა სტვენას და მსმენელის ნაწილთა პროტესტს ასე უპასუხა:
“ვერ ხვდებით ვინმე შენი ძმაა თუ არა? ის თქვენი ძმა არ არის? ნუთუ ყველას ჩვენი ქვეყნის საზღვრები გვყოფს? მე არ ვარ თქვენ ძმა, რადგან ამერიკელი ვარ? მე ყველას ჩემს დებად და ძმებად მიგიჩნევთ”.
ამ განცხადების შემდეგ ბევრმა ადამიანმა კონცერტი დატოვა”.
Reuters:
“ამერიკულმა ალტერნატიულმა ბენდმა The Killers ბოდიში მოიხადა იმისთვის, რომ საქართველოში ჩატარებულ კონცერტზე სცენაზე რუსი დრამერი ამოიყვანა, ასევე იმისთვის, რომ თაყვანისმცემლებს “ძმები და დები” უწოდა.
საქართველოს თავის ჩრდილოეთ მეზობელთან დაძაბულობის ხანგრძლივი ისტორია აქვს. სიტუაცია გამწვავდა რუსეთის უკრაინაში შეჭრით და ასევე რუსი ემიგრანტების დიდი ნაკადის შემოდინების გამო.
The Killers-მა მოგვიანებით ბოდიში მოიხადა”.
Independent:
“The Killers-ს ბოდიშის მოხდა მოუწია, მას შემდეგ, რაც სოლისტმა ბრენდონ ფლაუერსმა ქართველ თაყვანისმცემლებს უთხრა, რომ კონცერტზე მყოფი რუსი მსმენელი მათი ძმაა.
ლას-ვეგასში დაფუძნებული ჯგუფის კონცერტი მსოფლიო ტურის ფარგლებში, ბათუმში, Black Sea Arena-ზე მიმდინარეობდა.
საქართველო საბჭოთა მმართველობისგან 1991 წელს გათავისუფლდა, 2008 წელს კი რუსეთი საქართველოში შეიჭრა.
დაძაბულობა მას შემდეგ გაიზარდა, რაც უკრაინაში რუსეთის შეჭრის შემდეგ საქართველოში ბევრი რუსი ჩამოვიდა. შედეგად ქართველი ხალხი უკრაინას უჭერს მხარს”.
BBC:
“The Killers-ს ბოდიშის მოხდა მოუწია მას შემდეგ, რაც ვოკალისტმა ბრენდონ ფლაუერსმა სცენაზე რუსი თაყვანისმცემელი ამოიყვანა და მას დასარტყამ ინსტრუმენტებზე დაკვრის უფლება მისცა.
მან ასევე მსმენელს უთხრა, რომ რუსი მათი “ძმაა”, რასაც მსმენელის მხრიდან სტვენა და ნეგატიური შეძახილები მოყვა.
საქართველოს, რომელმაც რუსეთისგან თავისუფლება 1991 წელს მოიპოვა მეზობელთან დაძაბული ურთიერთობის მრავალწლიანი ისტორია აქვს.
2008 წელს რუსეთი საქართველოში შეიჭრა.
მოგვიანებით ბენდმა სოციალურ ქსელში ბოდიში მოიხადა.”
Newsweek:
“შოუს დროს – რასაც ჯგუფმა უწოდა დიდი ხნის სასცენო ტრადიცია – The Killers-მა სცენაზე მაყურებლებიდან აიყვანა რუსი დრამერი. ღონისძიების დროს ფრონტმენმა ბრენდონ ფლაუერსმა აუდიტორიას უთხრა, რომ რუსები და ქართველები “ძმები და დები” არიან, რამაც გამოიწვია მსმენელთა აღშფოთება და ეს გაგრძელდა მთელი შოუს დანარჩენ ნაწილში – ამ ორ ერს შორის დაძაბული ისტორიის და ურთიერთობის გამო.
ამ ყველაფერმა, როგორც ჩანს, ფაქტობრივად ჩაშალა დანარჩენი საღამო. თბილისში მცხოვრებმა ქართველმა ჟურნალისტმა მარიამ ნიკურაძემ განაცხადა, რომ ჯგუფის თაყვანისმცემლების ნაწილმა კონცერტი დასრულებამდე დატოვა, The Killers-ი კი მოგვიანებით სცენიდან დამშვიდობების გარეშე გავიდა.”
Stereogum:
“The Killers-მა ბათუმში, საქართველოში, Black Sea Arena-ზე, სადაც ისინი კონცერტს მართავდნენ, მსმენელების აჟიოტაჟი გამოიწვიეს. ეს ყველაფერი კი სცენაზე რუსი დრამერის მოწვევას მოჰყვა. ეს ჯგუფის ტრადიციაა – მათ დარბაზიდან დრამერი აჰყავთ ხოლმე.
ჯგუფის ფრონტმენმა, ბრენდონ ფლაუერსმა რუსებს და ქართველებს „ძმები და დები“ უწოდა, რამაც ხალხში პროტესტი გამოიწვია და ბევრმა ადამიანმა დატოვა შოუ. მოგვიანებით ჯგუფმა თავიანთი სეტი დამშვიდობების გარეშე დაასრულეს, შემდეგ კი სოციალურ ქსელში ბოდიში მოიხადეს. “კეთილო ქართველო ხალხო, ჩვენი განზრახვა არასდროს ყოფილა ვინმეს შეურაცხყოფა!“ – წერენ ისინი.”
Black Sea Arena-ზე მომხდარს ასევე გამოეხმაურნენ გამოცემები: Uproxx, NME, Insider
● “თქვენ ჩვენი რაღაც რესპუბლიკა იყავით” – რას ამბობენ რუსეთის მოქალაქეები, რომლებიც ბათუმში საკრუიზო ლაინერით შემოვიდნენ
● “ნაცისტები”, “აქტივისტები” – პოზნერის ვიზიტის შემდეგ აბაშიძემ რუსეთში დარეკა. აუდიოჩანაწერი
● რუსთაველის თეატრის მოსკოვში გამგზავრებას საქართველოში ხმაური მოჰყვა
აგვისტოში საქართველოში რამდენიმე ცნობილი ჯგუფი და მომღერალი მართავს კონცერტებს. ღონისძიებების ორგანიზებაში, საქართველოს მთავრობის დავალებით, “ბლექ სი არენაა” ჩართული, რომელიც ქვეყნის არაფორმალურმა მმართველმა, ბიძინა ივანიშვილმა კურორტ შეკვეთილში ააშენა და შემდეგ სახელმწიფოს გადასცა. საკონცერტო დარბაზი 10 000 ადამიანს იტევს.
“კამპანიის მთავარი მიზანი ქვეყნის პოპულარიზაცია, საქართველოს ტურისტული, ეკონომიკური და კულტურული პოტენციალის გაძლიერებაა”, – წერია მთავრობის პრესსამსახურის მიერ გავრცელებულ ინფორმაციაში.
The Killers-ის გარდა საქართველოში კონცერტებს გამართავენ All Day I Dream 18 აგვისტოს “სოციალური სივრცე” (The Social Space) და Imagine Dragons 31 აგვისტოს, მიხეილ მესხის სახელობის სტადიონზე.
