საქართველოს მესამე პრეზიდენტის, მიხეილ სააკაშვილის ბიძის, თემურ ალასანიას თქმით, საქართველოში დაბრუნებასთან დაკავშირებით სააკაშვილს “ვიღაცამ უმტყუნა”, თუმცა ამას დიდი სურათისთვის მნიშვნელობა არ აქვს, რადგან “ყველაფერი მის სინდისზეა.” ალასანიამ ამის შესახებ “TV პირველთან” ინტერვიუში ისაუბრა.
“ბევრი ადამიანი, ვინც მის გვერდით იყო, დღეს სხვა საქმიანობით დასაქმდა. შეიძლება, მათ პოლიტიკა აღარ აინტერესებთ, შეიძლება რაღაცას უფრო მნიშვნელოვანს აკეთებენ, მაგრამ დიდი ეჭვი მაქვს, რომ ეს არის კონიუქტურული მოსაზრებებით გამოწვეული. […] ხალხი წერს, ლუსტრაცია მოხდაო, კი მოხდა, რა საკვირველია, მაგრამ ეს ლუსტრაცია ჩვენ არაფერში არც გვრგებს და არც გვავნებს.” – ამბობს ექსპრეზიდენტის ბიძა.
მისივე განმარტებით, ის ხალხი უფრო საინტერესოა, “დროებითი ხალხი, მიტმასნილი, თანამგზავრები.” იმიტომ, რომ ისინი მრავალრიცხოვანია. ალასანიას თქმით, “ჩვენ ვეძებთ პატარა ნემს თივის ზვინში”, ის ერთი, ვინ უმტყუნა, რაც ძნელი საპოვნელია.
“რა მნიშვნელობა აქვს, ვინ უმტყუნა, ვინ უთხრა, ჩამოდიო […] რა ქნეს, როგორ ქნეს ეს, მაგათ სინდისზეა”. – თქვა ალასანიამ.
ექსპრეზიდენტის ბიძა ასევე ამბობს, რომ სააკაშვილის მოტყუებას ცდილობდნენ, თუმცა ის ქვეყანაში არა ვინმეს ტყუილის, არამედ საკუთარი სურვილის გამო დაბრუნდა.
“არავის არ მოუტყუებია, ცდილობდნენ, მოეტყუებინათ, მაგრამ მინდა, მათ მივმართო, ვინც ატყუებდა – დაწყნარდით, იცოდეთ, რომ თქვენ ვერავინ ვერ მოატყუეთ. თქვენი ტყუილები დარჩა თქვენთან. მიშამ გადაწყვეტილება მიიღო არა იმიტომ, რომ თქვენ დაგიჯერათ და თქვენ მოატყუეთ, არამედ იმიტომ, რომ თვითონ უნდოდა ასე”. – თქვა თემურ ალასანიამ.
აღსანიშნავია, რომ 7 დეკემბერს თითქმის ანალოგიური განცხადება გააკეთა პარტია “ლელოს” ლიდერმა მამუკა ხაზარაძემაც. მისი თქმით, “იმედია, დადგება დრო”, სააკაშვილი იტყვის, ვინ დაარწმუნა, რომ ამ დღეში არ ჩავარდებოდა. მისივე თქმით, “30 წელი ქართულ პოლიტიკას ვუყურებთ და იმედით ვიწყებთ ყველა არჩევნებს”, იმ იმედით, რომ აი, ახლა გვეშველება და ახლა დაიწყება ის, რაც ნორმალურ და ცივილიზებულ ქვეყნებში ხდება, თუმცა ეს არ გამოგვდის.
როგორც “ლელოს” ლიდერი განმარტავს, სააკაშვილის მიმართაც იგივე სცენარია დაწერილი, “როგორც აქ, ასევე რუსეთის სპეცსამსახურებში”, ზუსტად ისე, როგორც გამსახურდიას დროს. ხაზარაძის თქმით, მაშინაც და ახლაც ქართველების ხელით ხდება ერთ დროს უმრავლესობით არჩეული პრეზიდენტის მკვლელობა.
6 დეკემბერს სახალხო დამცველის მიერ შექმნილმა კონსილიუმმა მიხეილ სააკაშვილის ჯანმრთელობის შესახებ დასკვნა მოამზადა. ოთხმა ექიმმა ექსპრეზიდენტი 5 დეკემბერს მოინახულა და მის ჯანმრთელობის მდგომარეობას დეტალურად გაეცნო.
კარდიოლოგ გიორგი კაჭარავას თქმით, ექსპრეზიდენტმა ჯობია, გამოიცვალოს სამკურნალო ადგილი, ხოლო ნევროლოგ თენგიზ წულაძის თქმით, მიხეილ სააკაშვილის ჯანმრთელობის მდგომარეობა აპრილთან შედარებით, “მნიშვნელოვნად” არის გაუარესებული.
ასევე, ექიმების განმარტებით, მესამე პრეზიდენტს აქვს მეოთხე დონის კახექსია, რაც გულისხმობს, რომ სიცოცხლის ხანგრძლივობა რამდენიმე თვე შეიძლება იყოს დარჩენილი.
თავად სახალხო დამცველის, ნინო ლომჯარიას შეფასებით, მიხეილ სააკაშვილის ჯანმრთელობის მდგომარეობა სასჯელი გადავადების მოთხოვნას შეესაბამება.
ასევე, 2 დეკემბერს გამოქვეყნდა ამერიკაში ჩატარებულ ტოქსიკოლოგიურ ექსპერტიზა, რომელსაც პროფესორი დეივიდ სმიტი აწერს ხელს. დასკვნაში წერია, რომ მიხეილ სააკაშვილის ორგანიზმში აღმოჩენილია მძიმე მეტალებისა და სხვა აგენტების არსებობა, მათ შორისაა ვერცხლისწყალი და დარიშხანი. ამ ნივთიერებებს უკავშირებს სპეციალისტი სააკაშვილის პათოლოგიურ სიმპტომებს.
პირველ დეკემბერს ცენტრმა “ემპათია” მიხეილ სააკაშვილის ჯანმრთელობის მდგომარეობასთან დაკავშირებით სამედიცინო დასკვნა გამოაქვეყნა, რომლის მიხედვით, სააკაშვილს ოცზე მეტი დიაგნოზი თუ სიმპტომი აქვს – მათგან, დაახლოებით ათი პატიმრობასთან შეუთავსებელია.
“ემპათიაში” აცხადებენ, რომ ძირითადი დიაგნოზები არ საჯაროვდება. დასკვნაში ვკითხულობთ, რომ მიხეილ სააკაშვილის ამჟამინდელი ჯანმრთელობის მდგომარეობა ფასდება როგორც მძიმე და პატიმრობასთან შეუთავსებელი – ცალკეული დიაგნოზები ცალკეც და ერთობლიობაში გამოიწვევს ჯანმრთელობის მდგომარეობის შეუქცევად მოშლას, სიცოცხლის ხანგრძლივობის შემოკლებას და სიკვდილსაც, თუკი მას არ მიეცემა შესაძლებლობა მიიღოს ადეკვატური დიაგნოსტიკისა და მკურნალობის უფლება.
