სააკაშვილმა გონება დაკარგა. ამჟამად მისი მდგომარეობა სტაბილურია

საქართველოს მესამე პრეზიდენტმა მიხეილ სააკაშვილმა ადვოკატებთან შეხვედრისას გონება დაკარგა წაიქცა, ბადრაგმა ის საკაცით რეანიმაციულ განყოფილებაში აიყვანა. როგორც რეანიმატოლოგმა გულიკო ქილიფთარმა აღნიშნა, ამ ეტაპზე მესამე პრეზიდენტი კონტაქტურია, ადგილი ჰქონდა მცირეხნიან გონების დაკარგვას. 

“მცირე, რეანიმაციული ღონისძიებების შედეგად მისი მდგომარეობა დასტაბილურდა. პაციენტს უტარდება კიდევ კვლევები და მერე უფრო დეტალურად გეტყვით. მცირეხნიანი გონების კარგვა იყო. რეანიმაციაში წევს ახლა. კონტაქტურია. კონსულტაციისთვის ვიყავი მოსული – შემთხვევით მოვხვდი აქ. პაციენტთან მორიგეობს რეანიმაციული ბრიგადა”, – განაცხადა რეანიმატოლოგმა.

კომენტარი გააკეთა მიხეილ სააკაშვილის ადვოკატმა ნიკა გვარამიამაც, რომელიც ციხეში იმ დროს იმყოფებოდა, როდესაც ექსპრეზიდენტმა გონება დაკარგა.

“სააკაშვილი ახლა კარგად არის, მის სიცოცხლეს საფრთხე არ ემუქრება. მეც ვიყავი პალატაში და ვადასტურებ ამას. ასევე, უნდა ვთქვა, რომ ექიმებმა იყოჩაღეს”, – თქვა გვარამიამ.

გვარამიას თქმითვე, ერთადერთი გამოსავალია, სააკაშვილმა გლდანის ციხე დატოვოს და შეწყვიტოს შიმშილობა:

“გამოსავალი არის ერთადერთი რომ აქ არ იყოს მიხეილ სააკაშვილი და მერე შეწყვიტოს შიმშილობა. ჩემთვის მნიშვნელოვანია, ეს კაცი აქედან ცოცხალი გავიდეს”.

19 ნოემბერს რესპუბლიკის მოედანზე აქცია დაანონსდა

“ნაციონალური მოძრაობის” თავმჯდომარემ ნიკა მელიამ განაცხადა, რომ 19 ნოემბერს დაგეგმილი სამი აქცია გაუქმდა და მათ ნაცვლად ერთია აქცია ჩატარდება რესპუბლიკის მოედანზე. 

“ხელისუფლება უარს არ ამბობს საკუთარ მანიაკალურ სურვილზე, არც მეტი და არც ნაკლები დატყვევებული ადამიანი მოკლას, მოკლას არა საავადმყოფოში, არა ციხეში, არამედ იქ, სადაც მოისურვა ბიძინა ივანიშვილმა. ის არც ციხეა და არც საავადმყოფო, არის რაღაც შენობა, სადაც დატყვევებულია ადამიანი. ივანიშვილმა მათ შორის არ შეისმინა ყველაზე კომპეტენტური ექიმების რჩევები, დარიგებები, პროგნოზები არაფრად ჩააგდო და ქვეყნის ისტორიის ამ მნიშვნელოვან მომენტში როგორც არასოდეს ახლა საჭიროა სრული მობილიზაცია და ერთობა. 

ხვალისთვის დაგეგმილ მანიფესტაცია მსვლელობებს ვაუქმებთ და ხვალ ყველას, ყველას, ვისაც სჯერა, რომ შიმშილობა შიმშილობაა და არა დიეტა, ვისაც სჯერა, რომ ამ ყველაფერში თავიდან ბოლომდე ჩართულია რუსეთი სპეცსამსახურები, ვისაც სჯერა, რომ ქვეყნის თავისუფლება საფრთხის ქვეშაა, გელოდებით 15:00 საათზე რესპუბლიკის მოედანზე”, – თქვა ნიკა მელიამ.

● სააკაშვილის მდგომარეობა კრიტიკულია – რა წერია ექსპერტთა ჯგუფის დასკვნაში
● სააკაშვილის საქმეები. რისთვის ზის ციხეში ყოფილი პრეზიდენტი
● არის თუ არა სააკაშვილი პოლიტიკური პატიმარი? რას ამბობენ იურისტები და უფლებადამცველები

გუშინ, 17 ნოემბერს, გამოქვეყნდა საქართველოს სახალხო დამცველის, ნინო ლომჯარიას მიერ შექმნილი სპეციალისტთა/ექსპერტთა ჯგუფის დასკვნა მიხეილ სააკაშვილის სამედიცინო მდგომარეობის მონიტორინგის შედეგების შესახებ, სადაც ვკითხულობთ, რომ:

პაციენტის მდგომარეობის კრიტიკულობიდან გამომდინარე, მისი მკურნალობის გაგრძელება დაუყოვნებლივ რეკომენდებულია ფუნქციურად გამართულ და დიდი გამოცდილების მქონე პოლიპროფილურ ჰოსპიტალში, კერძოდ ინტენსიური თერაპიის განყოფილებაში, რის პირობებსაც მე-18 დაწესებულების კლინიკა არ აკმაყოფილებს.

ომბუდსმენმა მიხეილ სააკაშვილის სამედიცინო მომსახურების მონიტორინგის მიზნით მულტიპროფილურ ექსპერტთა ჯგუფი 16 ნოემბერს შექმნა, იმავე დღეს ექიმების ჯგუფი ექსპრეზიდენტ სააკაშვილთან ციხეში შევიდნენ.

10 ნოემბერს სტრასბურგის სასამართლომ გამოაქვეყნა გადაწყვეტილება იმ “დროებითი ზომების შესახებ”, რომელიც მიხეილ სააკაშვილის შიმშილობას, მის ჯანმრთელობასა და უსაფრთხოებას ეხება.

სტრასბურგში მოქმედმა სასამართლომ საქმეს პრიორიტეტი მიანიჭა და “დროებითი ზომები” მიიღო. “დროებითი ზომების” შინაარსიდან გამომდინარე, სტრასბურგის სასამართლოს ეს გადაწყვეტილება ნიშნავს იმას, ევროპის ადამიანის უფლებათა სასამართლომ სააკაშვილის სიცოცხლის და ჯანმრთელობის მიმართ გამოუსწორებელი ზიანის დადგომის საფრთხე დაინახა.