სააკაშვილის თქმით, მას ადვოკატებისთვის არასდროს უთქვამს, რომ მოწამვლაზე ეჭვობს და სპეკულაციები უადგილოა
სააკაშვილის თქმით სპეკულაციები უადგილოა
საქართველოს მესამე პრეზიდენტის, მიხეილ სააკაშვილის თქმით, მას ადვოკატებისთვის არასდროს უთქვამს, რომ მოწამვლაზე ეჭვობს და სპეკულაციები უადგილოა. ამის შესახებ განცხადება დღეს ექსპრეზიდენტის ფეისბუქ გვერდზე გამოქვეყნდა. მანამდე, სააკაშვილის დედამ, გიული ალასანიამ თქვა, რომ ექსპრეზიდენტის ორგანიზმში ვერცხლისწყალი აღმოაჩინეს. იმავე დღეს სააკაშვილის ადვოკატმა, ვალერი გელბახიანმა გაავრცელა ინფორმაცია, რომ მიხეილ სააკაშვილი მოწამლულია. განცხადება გაავრცელა იუსტიციის მინისტრმაც. რატი ბრეგაძის თქმით, უწყება მიმართავს სამხარაულის სახელობის ექსპერტიზის ეროვნულ ბიუროს, რომ გაკეთდეს ტოქსიკოლოგიური ექსპერტიზა.
მიხეილ სააკაშვილის ჯანმრთელობის მდგომარეობის შესახებ დასკვნა ცენტრმა “ემპათიამ” უნდა გამოაქვეყნოს. სააკაშვილის მდგომარეობას, ქართველთან ერთად, უცხოეთიდან მოწვეული ექიმებიც იკვლევდნენ.
მიხეილ სააკაშვილის განცხადება
“მინდა განვაცხადო, რომ არასდროს არცერთი ჩემი ადვოკატისთვის არ მითქვამს, რომ ეჭვი მაქვს მოწამვლაზე. სპეკულაციები ამ თემაზე უადგილოა.
დიდი მადლობა მინდა ვუთხრა სამედიცინო საზოგადოებას მხარდაჭერისთვის. ძალიან ვაფასებ მათ პროფესიულ თანადგომას. ჩემი ჯანმრთელობის მდგომარეობა მართლაც უარესდება და განსაკუთრებით დამძიმდა ამ ბოლო ორ თვეში. ვივამედის ექიმები მცდელობას არ აკლებენ. მნიშვნელოვანია, მივენდოთ სპეციალისტებს და ამ საკითხის ზედმეტი პოლიტიზება არ არის საჭირო.
კიდევ ერთხელ დიდი მადლობა ყველას.” – წერს ექსპრეზიდენტი.
ადვოკატის განმარტება
ადვოკატი ვალერი გელბახიანი, რომელიც მანამდე ამბობდა, რომ სააკაშვილის მოწამლულია, დღეს აცხადებს რომ სააკაშვილთან ადვოკატები შეთანხმდნენ, რომ მოწამვლასთან დაკავშირებით კომენტარს აღარ გააკეთებენ.
“ექსპერტები პირდაპირ მიუთითებენ, რომ ის ნიშნები, რომლებიც მოწამლვას ახასიათებს, ის ელემენტები არის აღმოჩენილი ბიოფსიური კვლევის შედეგად მიხეილ სააკაშვილის ორგანიზმში. ის დინამიკა, რომელიც მის დაავადებებს მოჰყვა ჯანმრთელობის გაუარესების თვალსაზრისით, არის საფუძველი ითქვას, რომ არის მოწამლული, სხვაგვარად ასე არ განვითარდებოდა არცერთი დაავადება.
თუ ხანგრძლივობა დაემთხვევა ვივამედში ყოფნის პერიოდს, ბუნებრივია, მაშინ ვივამედი იქნება პასუხისმგებელი ამაზე, თუ არა, მაშინ ის, სადაც მანამდე იყო მოთავსებული”. – ამბობდა 19 ნოემბერს ვალერი გელბახიანი TV პირველთან.
თუმცა, როგორც ჩანს, სააკაშვილის დღევანდელი განცხადების შემდეგ, ამ თემაზე დისკუსია ადვოკატების მხრიდან საერთოდ შეწყდება.
ოფიციალური სტრუქტურის განცხადება
იუსტიციის მინისტრი რატი ბრეგაძე ამბობს, რომ მიხეილ სააკაშვილის ადვოკატმა გააკეთა განცხადება სააკაშვილის შესაძლო მოწამვლის შესახებ. მისი თქმით, უწყება მოუწოდებს “ნებისმიერ პირს”, რომელიც მსგავსი ტიპის ინფორმაციას ავრცელებს, პირველ რიგში, გადაამოწმონ ეს ინფორმაცია და წარმოადგინონ შესაბამისი მტკიცებულებები. ბრეგაძის განმარტებით, მსგავსი დასკვნა სპეციალური პენიტენციური სამსახურისთვის არავის წარმოუდგენია.
“რაც შეეხება აღნიშნულ საკითხს, იმისთვის, რომ საზოგადოებას არ დარჩეს არცერთი კითხვის ნიშანი და, ამავდროულად, სახელმწიფომ გააკეთოს მაქსიმუმი, ჩვენ ხვალ დილით მივმართავთ სამხარაულის სახელობის ექსპერტიზის ეროვნულ ბიუროს, რომ გაკეთდეს ტოქსიკოლოგიური ექსპერტიზა და საზოგადოებას ჰქონდეს სრული და ამომწურავი ინფორმაცია მიხეილ სააკაშვილის ჯანმრთელობის მდგომარეობის შესახებ.” – აცხადებს იუსტიციის მინისტრი.
● მედია, პოლიტიკური დევნა, სააკაშვილი და სხვა – ევროპარლამენტმა საქართველოზე კომპრომისული რეზოლუცია მიიღო
● “სააკაშვილის პოლიტპატიმრად მოხსენიების გამო” – მმართველმა პარტიამ მხარი არ დაუჭირა PEACE-ს ისტორიულ რეზოლუციას
● “სააკაშვილი სიკვდილის პირასაა” – რას ამბობენ ექსპრეზიდენტის ჯანმრთელობაზე ადვოკატები, ექსპერტები და თანამებრძოლები
მიმდინარე წლის 6 ოქტომბერს, სახელმწიფო დაცვის სპეციალური სამსახურის უფროსმა თემურ ჯანაშიამ, რომელმაც ექსპრეზიდენტი კლინიკა “ვივამედში მოინახულა”, განაცხადა, რომ “მიხეილ სააკაშვილი ფაქტობრივად, ადამიანი აღარ არის, აქვს 38-მდე სიცხე, წნევა 170, საკვებს და წამლებს ვერ იღებს, არის ლოგინში.” ხოლო ამერიკელმა ექსპერტმა შაჰინ ლახანმა საქართველოს მესამე პრეზიდენტის მონახულების შემდეგ განმარტა, რომ ყველა კვლევა აჩვენებს მწვავე დეფიციტს, ყველა იმ “სასიცოცხლო მაჩვენებლისა, რაც ნორმალურ ადამიანს, ნორმალური ჯანდაცვის პირობებში არ უნდა ჰქონდეს.”
კლინიკაში სააკაშვილი მოინახულა მისმა უცხოელმა ადვოკატმა მასიმო დანჯელომაც. მისი თქმით, სააკაშვილის ჯანმრთელობის მდგომარეობა მნიშვნელოვნად არის დეგრადირებული. როგორც ადვოკატი განმარტავს, მიხეილ სააკაშვილს აქვს „სასიცოცხლო საფრთხე“, თუკი მისი სასიცოცხლო მაჩვენებლების გაუმჯობესება არ დაიწყება.
საქართველოს სახალხო დამცველთან არსებული კონსილიუმის შეფასებითაც, რომელიც მიმდინარე წლის აპრილში გამოქვეყნდა, საქართველოს პატიმარი ექსპრეზიდენტის, მიხეილ სააკაშვილის ჯანმრთელობის მდგომარეობა მნიშვნელოვნადაა დამძიმებული. ოჯახი, მის საზღვარგარეთ სამკურნალოდ გადაყვანას ითხოვს.
საქართველოში აშშ-ის ელჩმა კელი დეგნანმა საქართველოს მთავრობას მოუწოდა, საქართველოს მესამე პრეზიდენტის, მიხეილ სააკაშვილის ჯანმრთელობის საკითხზე სახალხო დამცველის რეკომენდაციებს სერიოზულად მიუდგეს.
● სააკაშვილის საქმეები. რისთვის ზის ციხეში ყოფილი პრეზიდენტი
● უკრაინული მიშა
უკვე 1 წელზე მეტია, მიხეილ სააკაშვილი, დაპატიმრებულია. ექსპრეზიდენტი დააპატიმრეს მას შემდეგ, რაც ის 2021 წლის 1 ოქტომბერს, ფარულად დაბრუნდა საქართველოში.
საქართველოს ყოფილი პრეზიდენტი რუსთავის მე-12 სასჯელაღსრულების დაწესებულებაში იმყოფებოდა. იგი თავს პოლიტიკურ პატიმრად მიიჩნევს, ამიტომ, ამ ხნის განმავლობაში, პროტესტის ნიშნად ორჯერ იშიმშილა. მათ შორის, პირველ შემთხვევაში შიმშილობა 51 დღე გაგრძელდა.
მაშინ მიხეილ სააკაშვილის ჯანმრთელობის მდგომარეობა ისე დამძიმდა, რომ მკურნალობა დასჭირდა. იგი სამკურნალოდ ჯერ გლდანის ციხის საავადმყოფოში, შემდეგ გორის სამხედრო ჰოსპიტალში, ხოლო ბოლოს კლინიკა “ვივამედში” გადაიყვანეს, სადაც ამ დრომდე მკურნალობს.
არსებობდა სტრასბურგის ადამიანის უფლებათა სასამართლოს 10 ნოემბრის გადაწყვეტილებაც. სასამართლომ მიხეილ სააკაშვილს შიმშილის შეწყვეტისკენ მოუწოდა, სახელმწიფოს კი დაავალა, უზრუნველეყო პატიმრის უსაფრთხოება და ადეკვატური მკურნალობა.
