პატიმრობაში მყოფი საქართველოს მესამე პრეზიდენტი მიხეილ სააკაშვილი სასამართლოს დისტანციურად ჩაერთო და განაცხადა, რომ პუტინმა, ნავალნის სახით, მოიშორა ნომერ პირველი მტერი – მეორე კი მის ხელშია და ეს თავად არის.
ეს უკვე მეორე განცხადებაა, რომელიც მიხეილ სააკაშვილმა რუსი ოპოზიციონერის მკვლელობის შემდეგ გააკეთა. პირველ ფეისბუქ პოსტში ის ამბობდა, რომ პუტინი ნავალნის და სააკაშვილს ერთმანეთს ხშირად ადარებდა და ორივე “ერთიანად” ეზიზღებოდა.
“პუტინმა, ნავალნის სახით, მოიშორა ნომერ პირველი მტერი – მეორე მის ხელშია, მე ვარ”
“მოკლეს ალექსეი ნავალნი. ნავალნისთან მე მქონდა მიმოწერა. მან, ჩემთან მიმოწერის შემდეგ, 2008 წელს საქართველოსთვის დაყენებული პოზიციების გამო, ბოდიში მოიხადა, რაც დასაფასებელი იყო, მე ძალიან დავუფასე.
მე მომწამლეს უკრაინაში შეჭრის დაწყებიდან რამდენიმე დღის შემდეგ, მომწამლეს მაშინ, რომ მსოფლიოს ვერც შეემჩნია, ისე გავმქრალიყავი. ღმერთმა გადამარჩინა სიკვდილს, ისევ ღმერთის იმედზე ვარ და თქვენს იმედზე ვარ – ქართველი ხალხის და საერთაშორისო თანამეგობრობის.
სწორედ ნავალნიმ გამოხატა სოლიდარობა მისი ციხის კამერიდან ჩემ მიმართ. მანამდე, მოკლეს [ანა] პოლიტკოვსკაია, რომელსაც ძალიან კარგად ვიცნობდი, [ბორის] ნემცოვი, რომელთანაც ბევრი უთანხმოება მქონდა, მაგრამ ძალიან ვმეგობრობდით და ახლა ნავალნი.
პუტინმა საჯაროდ გამოთქვა სურვილი, მე ჩამოვეკიდებინე ერთი ადგილით. პუტინი თავიდანვე დაიმუქრა, რომ მე მოვხვდებოდი ციხეში. პუტინი თავიდანვე დაიმუქრა, რომ მე აუცილებლად გამანადგურებდა ფიზიკურად. ამიტომ, როდესაც ნავალნიზე საუბრობდა პუტინი, ამბობდა, ეს არის რუსული სააკაშვილიო – ნავალნის გვარს არ ახსენებდა. […] ის ყველანაირად გამოხატავდა, რომ სწორედ მიხეილ სააკაშვილი და ნავალნი იყვნენ მისი ნომერ პირველი მტრები. ერთი ნომერ პირველი მტერი მან მოიშორა, მეორე მის ხელშია, რადგან ყველაფერი რაც ეხება საქართველოს პენიტენციურ სისტემას თავიდან ბოლომდე კონტროლდება, მათ შორის, რუსული სპეცსამსახურების მიერ და ეს ჩვენ ძალიან კარგად ვიცით.” – თქვა სააკაშვილმა.
ნავალნის ციხეში სიკვდილის შემდეგ, სააკაშვილის გათავისუფლებას ითხოვენ
რუსი ოპოზიციონერის, ალექსეი ნავალნის ციხეში სიკვდილის შემდეგ, კიდევ უფრო გააქტიურდა მიხეილ სააკაშვილის ციხიდან გათავისუფლების მოთხოვნა. მისი თანამოაზრეების თქმით, საქართველოს მესამე პრეზიდენტი ციხეში დაუცველია და ის შეიძლება ნებისმიერ დროს მოკლან ვლადიმირ პუტინის დავალებით. “ნაციონალურმა მოძრაობამ” რეგიონებში სააკაშვილის გათავისუფლების მოთხოვნით ხელმოწერების შეგროვება დაიწყო.
აღსანიშნავია, რომ მიუნხენის კონფერენციაზე საერთო დისკუსიის დროს პოლონეთის საგარეო საქმეთა მინისტრმა, რადოსლავ სიკორსკიმ სალომე ზურაბიშვილს მიხეილ სააკაშვილის შესახებ მიმართა:
“მე ვიყავი პოლონეთის პირველი თავდაცვის მინისტრი, რომელიც საქართველოში ჩავიდა და როგორც საქართველოს მეგობარი, თქვენ, ქალბატონო პრეზიდენტო, მინდა იცოდეთ, რომ ჩვენ გვახსოვს, რომ ამ კონფერენციას ესწრებოდა თქვენი წინამორბედი, პრეზიდენტი სააკაშვილი და მრავალი ჩვენგანისთვის ის საქართველოს მოდერნიზაციის სიმბოლო გახლავთ.
ჩვენ კანონის უზენაესობას თქვენს ქვეყანაში პატივს ვცემთ, მაგრამ ვთლით, რომ მოპყრობა მის მიმართ გახლავთ ძალიან მნიშვნელოვანი საკითხი. მნიშვნელოვანია, რომ მას მოეპყრონ სამართლიანად და თქვენ, რა თქმა უნდა, შეგიძლიათ, შეიტანოთ წვლილი მის განთავისუფლებაში და საქართველოს ყველა მხარდამჭერი მიესალმება ამ ფაქტს.”
სალომე ზურაბიშვილმა სიკორსკის მიმართვა უპასუხოდ დატოვა.
20 თებერვალს ცნობილი გახდა, რომ საფრანგეთის პრეზიდენტის ემანუელ მაკრონის გუნდის წევრი, ნატალი ლუაზო ევროპული საბჭოს პრეზიდენტ შარლ მიშელს, ევროკომისიის პრეზიდენტ ურსულა ფონ დერ ლაიენსა და ევროკავშირის უმაღლეს წარმომადგენელს ჯოზეფ ბორელს მიხეილ სააკაშვილთან დაკავშირებით წერილით მიმართავს. ლუაზო ევროპელ ლიდერებს სთხოვს, რომ ალექსეი ნავალნის სიკვდილის ფონზე, მეტი ყურადღება მიაქციონ ციხეში მყოფი პოლიტიკური ოპონენტების ბედს მსოფლიოში და ყურადღებას პატიმრობაში მყოფ მიხეილ სააკაშვილზე ამახვილებს.
“მას შემდეგ საქართველომ მოიპოვა ევროკავშირში გაწევრიანების კანდიდატის სტატუსი, რაც უდაოდ შეესაბამება ქართველი ხალხის მისწრაფებებს. ამ კონტექსტში კიდევ უფრო შოკისმომგვრელია, რომ ქვეყანას, რომელიც ევროკავშირში გაწევრიანებისკენ მიისწრაფვის, ციხეში ჰყავს ადამიანი, რომელიც მათი პრეზიდენტი იყო, ადამიანი, რომელმაც წაიყვანა საქართველო დემოკრატიისკენ ვარდების რევოლუციის სათავეში დგომისას, ის ვინც იბრძოდა ადამიანის უფლებებისთვის, სასამართლო სისტემის დამოუკიდებლობისთვის კორუფციასთან ბრძოლისა და რუსეთის ჩარევის წინააღმდეგ.
დღეს ჩვენ გთხოვთ, გაუგზავნოთ მკაფიო გზავნილი საქართველოს ხელისუფლებას, რომ მათ აქვთ არჩევანი და რომ ამ არჩევანს ექნება შედეგები: ან გააგრძელონ საერთო ფუნდამენტური ევროპული ღირებულებების გზა, გაათავისუფლონ მიხეილ სააკაშვილი და მისცენ საქართველოდან წასვლის საშუალება საზღვარგარეთ შესაბამისი მკურნალობის მისაღებად, ან დატოვებენ მანს ტყვეობაში მიუხედავად მისი ჯანმრთელობის მდგომარეობისა და ისინი სერიოზული ეჭვის ქვეშ დააყენებენ ევროკავშირთან დაახლოების რეალურობას.
თუ ევროკავშირს შეუძლია მკაფიოდ ისაუბროს ყოფილ საბჭოთა კავშირში დაპატიმრებული პოლიტიკური ოპონენტების საქმეებზე, ეს აჩვენებს, რომ ალექსეი ნავალნის ბრძოლა ადარდებთ და ის ტყუილად არ მომკვდარა.” – აღნიშნულია ნატალი ლუაზოს წერილში.
