ნავალნი “ნოვიჩოკით” მოწამლეს - გერმანიის მთავრობის ოფიციალური დასკვნა
რუსი პოლიტიკოსი ალექსეი ნავალნი, რომელიც ბერლინის კლინიკაში მკურნალობს, “ნოვიჩოკის” ჯგუფის საბრძოლო ქიმიური ნივთიერებით მოიწამლა. ამის შესახებ გერმანიის მთავრობამ გერმანელი სამხედროების მიერ ჩატარებული ანალიზის შედეგებზე დაყრდნობით განაცხადა.გერმანიის ხელისუფლება რუსეთისგან ოპოზიციის ლიდერის მკვლელობის მცდელობასთან დაკავშირებით “დაუყოვნებლივ განმარტებებს” ითხოვს.
”ბერლინის Charite University Hospital- ის დავალებით, ბუნდესვერის (გერმანიის შეიარაღებული ძალების) ლაბორატორიამ ალექსეი ნავალნის ანალიზების ტოქსიკოლოგიური კვლევები ჩაატარა. ექსპერტებმა ერთმნიშვნელოვნად აღმოაჩინეს “ნოვიჩოკის” ჯგუფის ნერვულ-პარალიტიკური ნივთიერების გამოყენების კვალი”, – ციტირებს რუსული “ნოვაია გაზეტა” გერმანიის მთავრობის ოფიციალურ განცხადებას.
კანცლერმა მერკელმა და გერმანიის მთავრობის წევრებმა დღეს უკვე გამართეს შეხვედრა ამ საკითხთან დაკავშირებით და შეთანხმდნენ შემდგომ ნაბიჯებზე, ნათქვამია განცხადებაში.
”ის ფაქტი, რომ ალექსეი ნავალნი რუსეთში ქიმიური იარაღით თავდასხმის მსხვერპლი გახდა, შოკისმომგვრელი მოვლენაა. გერმანიის ფედერალური მთავრობა მკაცრად გმობს ამ შეტევას. რუსეთის მთავრობამ დაუყოვნებლივ უნდა გააკეთოს განმარტებები მომხდართან დაკავშირებით, ”- აცხადებს გერმანიის მთავრობა.
ქვეყნის საგარეო საქმეთა სამინისტრომ ასევე შეატყობინა რუსეთის ელჩს და აცნობა პარტნიორებს ევროკავშირსა და ნატოში კვლევის შედეგების შესახებ. გერმანია აპირებს შეიმუშაოს შესაბამისი პასუხი პარტნიორებთან ერთად.
• ნავალნის მკვლელობის მცდელობა: საეჭვო დამთხვევები
• რას ფიქრობს რუსეთის პრეზიდენტობის პოტენციური კანდიდატი კავკასიაზე
• რას უნდა ველოდეთ რუსეთის პრეზიდენტ ნავალნისგან?
რა არის “ნოვიჩოკი”
2018 წლის მარტში ინგლისის ქალაქ სოლსბერიში ყოფილი მზვერავი, სერგეი სკრიპალი და მისი ქალიშვილი, იულია მოწამლეს. ექიმების ოპერატიული ჩარევის წყალობით, მათი გადარჩენა მოხერხდა.
ექსპერტების დასკვნით გამოყენებული იყო ნერვულ-პარალიტიკური ნივთიერება „ნოვიჩოკი“, რომელიც საბჭოთა კავშირში შეიქმნა და იწარმოებოდა.
სამი კვირის შემდეგ სოლსბერიში გარდაიცვალა ქალი, მისი თანამგზავრი კი დაზარალდა. ეს მას შემდეგ მოხდა, რაც წყვილმა ნაგვის კონტეინერში აღმოაჩინა სუნამოს ბოთლი „ნოვიჩოკის“ შემადგენლობით.
ინგლისის პოლიციის მტკიცებით, სკრიპალებზე თავდასხმაში რუსეთის მოქალაქეები რუსლან ბოშიროვი და ალექსანდრ პეტროვი მონაწილეობდნენ.
ბრიტანეთის პოლიცია ირწმუნება, რომ ისინი რუსეთის მთავარი სადავერვო სამსახურის თანამშრომლები არიან.
ნავალნის მოწამვლა
20 აგვისტოს დილით ალექსეი ნავალნიმ თვითმფრინავში ყოფნისას თავი შეუძლოდ იგრნო. ის მძიმე მოწამლვის სიმპტომებით ომსკის საავადმყოფოში მოათავსეს. პოლიტიკოსის პრესმდივნის თქმით, იმ დილას ნავალნიმ ტომსკის აეროპორტში ჩაი დალია. მას სხვა არაფერი უჭამია და დულევია.
გამოკვლევის შემდეგ, ომსკის საავადმყოფოს ექიმებმა განაცხადეს, რომ მათ პოლიტიკოსის სისხლში შხამები ვერ იპოვეს, მაგრამ ამავე დროს ზუსტი დიაგნოზი ვერ დაუსვეს.
პოლიტიკოსის ახლობლებმა და მეგობრებმა მისი გერმანიაში გადაყვანა მოახერხეს. 22 აგვისტოს იგი თვითმფრინავით ბერლინში, შარიტეს კლინიკაში გადაიყვანეს.
ის კვლავ ხელოვნურ კომაშია. ექიმების თქმით, მის სიცოცხლეს საფრთხე არ ემუქრება, მაგრამ შედეგებზე საუბარი ჯერჯერობით რთულია.
რეაქცია: “ყველამ იცის, რომ ეს პუტინის გაკეთებულია”
რუსი ოპოზიციონერი და ნავალნის თანამებრძოლი ვლადიმირ მილოვი მიიჩნევს, რომ პუტინის მოწინააღმდეგეების მოწამლვის წარსული შემთხვევებისგან განსხვავებით, ამჯერად არავის ეპარება ეჭვი იმაში, მკვლელობის მცდელობა ვინ დაუკვეთა.
”ნავალნის მოწამლვასთან დაკავშირებული ვითარების დამახასიათებელი განსხვავება ის არის, რომ ამჯერად პრაქტიკულად ყველა მსოფლიოში – პოლიტიკოსები, პრესა, კომენტატორები – ერთხმად ამბობს, რომ ის პუტინმა მოწამლა. ამაში ეჭვი არავის ეპარება. ამის შემდეგ ის აქედან მშრალი ვეღარ ამოვა”, – წერს პოლიტიკოსი ფეისბუქზე.
