“მილიონებს ვერ დაიჭერთ” - რუს ოპოზიციონერ ნავალნის პატიმრობა მიუსაჯეს
”მე ბრძოლას გავაგრძელებ”, – განაცხადა რუსეთის ოპოზიციის ლიდერმა ალექსეი ნავალნიმ სასამართლო სხდომაზე, სადაც მას 2 წლითა და 8 თვით პატიმრობა მიუსაჯეს. მოსკოვში სასამართლო პროცესის დროს, ოპოზიციის ასობით მხარდამჭერი დააკავეს. ალექსეი ნავალნიმ თავის მომხრეებს მოუწოდა, არ დანებდნენ და იბრძოლონ რეჟიმის წინააღმდეგ.
სასამართლოს გადაწყვეტილებით, ალექსეი ნავალნის პირობითი მსჯავრი 3,5 წლიანი საერთო რეჟიმის კოლონიით შეეცვალა. ამავე დროს, სასამართლომ გაითვალისწინა ის დრო, რაც მან შინაპატიმრობაში გაატარა და ვადა 2 წლამდე და 8 თვემდე შეუმცირა.
ნავალნი, რომელიც მომწამვლელი ნივთიერება “ნოვიჩოკით” მოწამვლის შემდეგ სასწაულებრივად გადარჩა, გერმანიაში მკურნალობდა და რუსეთში დაბრუნებისთანავე დააპატიმრეს.
მას ადრე თაღლითობისა და გაფლანგვის ბრალდებით პირობითი მსჯავრი ჰქონდა მისჯილი, მოსკოვის სასამართლომ კი ჩათვალა, რომ მან პირობითი მსჯავრის წესი დაარღვია, როდესაც გერმანიაში ყოფნის დროს რუსეთის პრობაციის სამსახურში არ გამოცხადდა.
სასამართლო პროცესის დროს მოსკოვის მთელი ცენტრი გადაკეტილი იყო სპეცრაზმელების მიერ, პროცესს 18 სახელმწიფოს წარმომადგენელი ესწრებოდა.
ნავალნიმ და მისმა ადვოკატებმა ბრალდება უარყვეს და აღნიშნეს, რომ მას წესები არ დაურღვევია, ხოლო საქმეზე, რომელზეც მას ასამართლებენ, ადამიანის უფლებათა ევროპულმა სასამართლომ იგი უკვე გაამართლა.
ნავალნი: “ეს სისუსტის დემონსტრირებაა”
სასამართლოში გამოსვლისას ნავალნიმ რუსეთის მმართველი რეჟიმი და პირადად პრეზიდენტი ვლადიმირ პუტინი მის დევნასა და მკვლელობის მცდელობაში დაადანაშაულა.
”უკვე 2021 წელია, მაგრამ ისინი მანიაკის სიჯიუტით განაგრძობენ ჩემს დევნას ამ საქმეზე… ვიღაცას ნამდვილად სურს, რომ მე ვერცერთი ნაბიჯი ვერ გადავდგა, როგორც თავისუფალმა ადამიანმა. ამის მიზეზი ბუნკერში მყოფი ერთი ადამიანის სიძულვილი და შიშია. რადგან მისი ბრძანების შემდეგ გადავრჩი”, – განაცხადა ნავალნიმ.
”აღმოჩნდა, რომ პოლიტიკურ ოპონენტთან გამკლავების ერთადერთი გზა, რომელსაც არ აქვს ტელევიზია და არც პოლიტიკური პარტია ჰყავს, მისი მოკვლაა. ის (პუტინი) ისტორიაში შევა როგორც მომწამვლელი. იყო იაროსლავ ბრძენი, ეს კი ვლადიმერ ტრუსების მომწამვლელი იქნება”.
”ამ პროცესში მთავარი არ არის, ციხეს მომისჯიან თუ არა. მთავარია ხალხის უზარმაზარი რაოდენობის დაშინება. ერთი ადამიანი ციხეში იმისთვისაა, რომ მილიონები შეშინდნენ ”, – თქვა ნავალნიმ.
მისი თქმით, ”ეს სისუსტის დემონსტრირებაა. მილიონებს ვერ დაიჭერთ. მე ნამდვილად იმედი მაქვს, რომ ხალხი ამას გააცნობიერებს და ეს მომენტი დადგება“.
მან რუსეთის მოქალაქეებს მოუწოდა, არ დაემორჩილონ და არ შეუშინდნენ ხელისუფლებას.
სპეცრაზმი წითელ მოედანზე
სასამართლო პროცესის დროს, ძალოვნებმა 350-ზე მეტი ადამიანი დააკავეს, რომლებიც ნავალნის მხარდასაჭერად მოვიდნენ.
მოსკოვისა და პეტერბურგის ცენტრალური მოედნები პოლიციამ და ეროვნულმა გვარდიამ გადაკეტა. სასამართლო სხდომის შემდეგ აქტივისტების დაკავება გაგრძელდა.
საპროტესტო აქციების შიშით, ხელისუფლებამ მოსკოვში ბევრი ცენტრალური ქუჩა გადაკეტა.
ამის მიუხედავად, ოპოზიციის მომხრეები ქუჩაში გვიან საღამომდე გამოდიოდნენ.
ნავალნის გათავისუფლების მოთხოვნით მასობრივი აქციები მთელ რუსეთში 23 და 31 იანვარს ჩატარდა.
