ჩეჩნეთში ეროვნული გლოვის დღეს “სპეცრაზმის ტურებს” გეგმავენ
ჩეჩნურმა ტურისტულმა კომპანიამ მომხმარებლებს ”სპეცრაზმის ტურების” ორგანიზება ქალაქ გროზნოში და გუდერმესში შესთავაზა. ეს მოგზაურობა 23 თებერვალს უნდა შედგეს. რუსეთი ამ დღეს სამშობლოს დამცველის დღეს აღნიშნავს, მაგრამ ჩეჩნეთში ამ დღეს გლოვის დღეა – 1944 წელს ჩეჩნებისა და ინგუშების დეპორტაციის წლისთავია.
წლიდან წლამდე ამ თარიღის გამო ადგილობრივი მოსახლეობა ხელისუფლების წარმომადგენლებს ჩუმად უპირისპირდება, რადგან ისინი ცდილობენ ჩეჩნების იძულებას ეს დღესასწაული ისევე აღნიშნონ, როგორც რუსეთის სხვა რეგიონებში.
სამშობლოს დამცველის დღისთვის “იდეალური” საჩუქრის შეთავაზებით ერთდროულად ორი კომპანია გამოვიდა – “ელგასი” და “ჩეჩენ ტური“. პირველი მომხმარებელს სთავაზობს მოგზაურობებს ჩრდილოეთ კავკასიის ყველა რეგიონში, ხოლო მეორე მხოლოდ ჩეჩნეთზეა სპეციალიზირებული.
- ჩეჩნეთის ხელისუფლებამ ადამიანს კამერის წინ საკუთარი თავის წამება აიძულა
- ჩეჩნეთში ექიმი, რომელმაც კადიროვის ახლობელი ვერ გადაარჩინა, ცემით მოკლეს
- ცდა ბედის მონახევრეა. როგორ უტევენ ჩეჩნეთიდან დევნილები ბელარუსში პოლონეთის საზღვარს
”სამხედრო ტური ხანგრძლივობა ოთხი დღე [და] სამი ღამეა”, – წერს ელინა ბათაევა, კომპანია “ელგასის” დირექტორი, თავის ფეისბუქ გვერდზე. “ის მოიცავს ორი დღის აქტიურ ტრენინგებს რუსეთის სპეციალური ძალების უნივერსიტეტში! სროლაში ვარჯიში რამდენიმე ტიპის იარაღით, ექსტრემალური ტური ბაგის ტიპის მანქანით, საჰაერო მილში ფრენა და მრავალი სხვა”.
ბათაევა “ელგასის” ხელმძღვანელობას ჩეჩნეთის სავაჭრო–სამრეწველო პალატაში ტურიზმის სფეროში მეწარმეობის კომიტეტის თავმჯდომარეობას უთავსებს, აღნიშნავს ონლაინ გამოცემა “კავკაზსკი უზელი”.
მის პოსტს უამრავი ნეგატიური კომენტარი მოჰყვა, რომლის ავტორებმა გაიხსენეს, რომ 23 თებერვალი ჩეჩნების და ინგუშების დეპორტაციის წლისთავია. ზოგი მწარე ირონიით აღნშნავდა, რომ სპეცრაზმის ტური ტრაგედიის წლისთავის აღნიშვნის ორიგინალური გზაა.
ბათაევა სიტუაციიდან გამოსვლას შეეცადა: ”ჩვენ გვესმის, რომ ჩვენთვის ეს არის გლოვისა და მწუხარების დღე. <…> მაგრამ არ უნდა დაგვავიწყდეს, რომ არსებობს მრავალი სხვა ხალხი და ეროვნება, ვისთვისაც ამ დღეს სულ სხვა მნიშვნელობა აქვს “.
თუმცა, მის ამ არგუმენტს პროტესტი მოჰყვა. ”მაშინ სხვა ერებმა იზეიმონ. თქვენი არავინ გაუსახლებიათ?” – გააპროტესტა ბათაევას პოსტი მომხმარებელმა სახელად მოჰმად-ემინ მთიელმა. ”მთელი ჩეჩენი ხალხისთვის გლოვის დღეს დღესასწაულის მოწყობა ჩვენს მრავალტანჯულ მიწაზე. <…> ისე როგორ გავმათხოვრდით სულიერად, რომ პრიორიტეტი მივაკუთვნეთ სხვა ერების დღესასწაულებს და საკუთარი ეროვნულობა დავივიწყეთ “, – მიიჩნევს რუსლან აბდულაზიმოვი.
მოგვიანებით, ორგანიზატორებმა აღნიშნეს, რომ მიუხედავად იმისა, რომ ტური 23 თებერვლის საჩუქრად არის განკუთვნილი, ის სხვა დღეს ჩატარდება. თუმცა კომპანიის ვებგვერდზე განთავსებული გრაფიკის თანახმად, სპეცრაზმის ტური 20-დან 23 თებერვლის ჩათვლით გაიმართება. ტურის ღირებულება – 39 780 რუბლიდან (დაახლოებით 500 აშშ დოლარი). 2 თებერვლისთვის 16 ადგილი იყო დარჩენილი.
რა მოხდა 1944 წლის 23 თებერვალს
ჩეჩნეთში და ინგუშეთში 23 თებერვალს ოპერაცია “ჩეჩევიცა”-ს იხსენებენ, რომლის დროს ჩეჩნების და ინგუშების შუა აზიაში მასობრივი დეპორტაცია განხორციელდა. ამ ოპერაციის შედეგად, თავიანთი სახლებიდან დაახლოებით 500 ათასი ადამიანი გაასახლეს; დაახლოებით 1300 ადამიანი გზაში გარდაიცვალა, ხოლო 780 ოპერაციის დროს დაიღუპა. ოპერაცია 1944 წლის 23 თებერვალს დაიწყო და მას შემდეგ ჩეჩნები და ინგუშები ამ თარიღს ტრაგიკულად მიიჩნევენ.
მაგრამ 23 თებერვალი მთელ რუსეთში სახალხო დღესასწაულია, ჩეჩნეთისა და ინგუშეთის რესპუბლიკების ჩათვლით; ხოლო მათთვის, ვინც ამას არ ეთანხმება, 2011 წელს სამგლოვიარო ღონისძიებების აკრძალვა შემოიღეს.
ჩეჩნეთის რესპუბლიკის ადგილობრივმა ხელისუფლებამ გლოვის დღე 23 თებერვლიდან 10 მაისისთვის გადაიტანა – ფაქტობრივად გლოვა ისტორიული მოვლენის გამო ყოფილი პრეზიდენტის, ახმატ კადიროვის დაკრძალვის წლისთავით შეცვალა (ის 2004 წლის მაისში დაკრძალეს) .
