საირმეში თანამშრომლები გაიფიცნენ. თელავში ძველი სახლების ეშინიათ. გორში მუშა გარდაიცვალა. რეგიონული ამბები
რეგიონული ამბები
ქუთაისში დააკავეს პირი, რომელიც ადამიანებს ამერიკაში უკანონოდ გამგზავრებაში ეხმარებოდა
საქართველოს შინაგან საქმეთა სამინისტროს ინფორმაციით, ამ პირმა შექმნა ტურისტული კომპანია, რომელიც ადამიანებს ამერიკაში უკანონოდ გამგზავრებასა და იქ დარჩენაში ეხმარებოდა. ამავე საქმეზე მასთან ერთად კიდევ ორი პირია დაკავებული. ისინი თბილისის მცხოვრებლები არიან.
ვრცლად: Kutaisipost.ge
ამ თემაზე შეგიძლიათ ნახოთ JAMnews-ის ვრცელი მასალა, რომელშიც ადამიანები ჰყვებიან როგორ წავიდნენ საქართველოდან, არალეგალურად, მექსიკის გავლით ამერიკაში
“საირმეში“ თანამშრომლები გაიფიცნენ
საირმეში კომპანია „საირმე მინერალ ვოთერსის” თანამშრომლები გაიფიცნენ. ისინი ხელფასის 30 პროცენტით მატებასა და უსაფრთხო შრომის პირობებს ითხოვენ. დასაქმებულების თქმით, გაფიცვა იქამდე გაგრძელდება, ვიდრე მათი მოთხოვნები არ დაკმაყოფილდება. ამ ეტაპზე, კომპანიის მუშაობა პარალიზებულია.
ვრცლად: kutaisipost.ge
მარნეულში 300 ათას ლარად ნაყიდი ნაგავმზიდის საქმეს აუდიტი შეამოწმებს
მარნეულში აუდიტი შეამოწმებს რამდენად მიზნობრივად დახარჯა მერიამ იაპონიის მთავრობის მიერ გადაცემული თანხა. საუბარია 300 ათას ლარზე, რომლითაც მარნეულში ახალი ნაგავმზიდი იყიდეს. როგორც რადიო „მარნეულთან“ საუბარში მერიის საფინანსო-საბიუჯეტო სამსახურის უფროსის მოვალეობის შემსრულებელი ამბობს, ფინანსური ოპერაციები, რაც ტექნიკის შესაძენად ჩაატარეს, უახლოეს დღეებში შემოწმდება.
ვრცლად: marneulifm.ge
გორელი მეეზოვეები ქუჩის ძაღლებს ვერ იგერიებენ
„ქალაქი სავსეა უპატრონო ძაღლებით, ხალხზე იწევენ, იქნებ მიეხედოს მაგ ამბავს. მესამე სკოლასთან ვერ გაივლი, ვერც კარფურთან. ყველგან ერთი და იგივე სიტუაციაა. ზოგადად ქალაქში ვერ გაივლი“, – გორის კეთილოწყობის სამსახურის თანამშრომლები აცხადებენ, რომ მიუსაფარი ცხოველები მათ მიმართ აგრესიულები არიან.
როგორც გამოცემა qartli.ge წერს, სავარაუდოდ ძაღლებს მეეზოვეები ცხოველთა მონიტორინგის სააგენტოს თანამშრომლებში ერევათ. ასე ხსნიან მათ განსაკუთრებულ აგრესიულობას.
ვრცლად: qartli.ge
ახალქალაქში 21 წლის ბიჭი 15 წლის გოგოს სექსუალურ კავშირს აიძულებდა
არასრულწლოვნის ინტიმური ფოტოების გავრცელების მუქარისა და და სექსუალური კავშირის იძულების ბრალდებით ახალქალაქში 21 წლის ბიჭი დააკავეს. ბრალდებულს აღკვეთის ღონისძიების სახით პატიმრობა შეუფარდეს. დაკავებული ბრალს აღიარებს.
ვრცლად: sknews.ge
გორში მშენებარე შენობიდან მუშა გადმოვარდა და გარდაიცვალა
გორში მშენებარე კორპუსიდან მუშა გადმოვარდა და ადგილზე გარდაიცვალა. კომპანია, რომელიც ამ შენობას აშენებს, პასუხისმგებლობას იხსნის. კომპანიაში ამბობენ, რომ სამშენებლო სამუშაოებზე უსაფრთხოების ზომები დაცული იყო.
ვრცლად: mozaikanews.ge
საგარეჯოში სამი ადამიანი გარდაიცვალა და სამი დაშავდა ავარიის შედეგად
საგარეჯოში მომხდარ ავტოსაგზაო შემთხვევას სამი ადამიანი ემსხვერპლა, მათ შორის ერთი მცირეწლოვანი. სამი ადამიანი კი მძიმე დაზიანებებით საავადმყოფოში გადაიყვანეს. გამოცემა „სპექტრი“ თვითმხილველებზე დაყრდნობით წერს, რომ ერთმანეთს მსუბუქი ავტომობილი და სატვირთო მანქანა შეეჯახა.
ვრცლად: speqtri.ge
თელავში ავარიული კორპუსების ეშინიათ
თურქეთსა და სირიაში მომხდარი მიწისძვრის შემდეგ, თელავში მცხოვრებლები შეშინდნენ და საცხოვრებელი კორპუსების შემოწმებას ითხოვენ. გამოცემა “კახეთის ხმასთან” ბევრი ადგილობრივი ყვება, რომ კორპუსები ძველი და ავარიულია, საქმეს ართულებს უკანონო მიშენებებიც.
“ალაზნის გამზირზე, კორპუსები ავარიულია, აქვს დიდი უკანონო მიშენებები, ზოგი მიშენება თითქმის ერთი ოთახის ხელაა. ამისი მკაცრი კონტროლი უნდა მომხდარიყო თავის დროზე“, – ჩივიან ადგილობრივები.
ვრცლად: knews.ge
ბაკურიანში დაიწყო მსოფლიო ჩემპიონატი ზამთრის ყველაზე ექსტრემალურ სახეობებში
19 თებერვალს ბაკურიანში დაიწყო ფრისტაილის, სნოუბორდისა და ფრისკის 2023 წლის მსოფლიო ჩემპიონატი. ჩემპიონატი პარალელური გიგანტური სლალომის შეჯიბრებით გაიხსნა.
2023 წლის მსოფლიო ჩემპიონატში 42 ქვეყნის 700-მდე სპორტსმენი მონაწილოებს. ბაკურიანი უცხოელებითა და ტურისტებითაა სავსე.
ვრცლად: sknews.ge
ნინოწმინდაში იზეიმეს “ტერენდაზი”
სამხრეთ საქართველოში, ნინოწმინდაში, ტრადიციული რელიგიური დღესასწაული “ტერენდაზი” იზეიმეს. ეს დღე მთელი რიგი რიტუალებიტაა დატვირთული. სრულდება სადღესასწაულო ღვთისმსახურება, ახალგაზრდები მიდიან ეკლესიებში კურთხევის მისაღებად, მისი ყველაზე საინტერესო და სანახაობრივი რიტუალი კი ცეცხლის გარშემო ცეკვაა.
ვრცლად: nor.ge
მარნეულში “ნოვრუზ ბაირამისთვის” ემზადებიან
მარნეული ნოვრუზ ბაირამის აღსანიშნავად ემზადება. დღესასწაულთან დაკავშირებული ღონისძიების ორგანიზებისთვის მერიამ უკვე გამოაცხადა ტენდერი 85 ათას ლარზე. ეს თანხა შარშანდელთან შედარებით 20 ათასით მეტია.
ნოვრუზ ბაირამი 21 მარტს აღინიშნება. “ნოვრუზი” – სპარსული სიტყვაა. “ნოვ”- ახალს, “რუზ” კი დღეს ნიშნავს. ნოვრუზ ბაირამი გაზაფხულის შემოსვლის, ზოგიერთ ქვეყანაში კი ახალი წლის დღესასაწაულია.
ვრცლად: marneulifm.ge
რეგიონული ამბები
