დღეს საქართველოს პარლამენტში პრემიერმინისტრ ირაკლი ღარიბაშვილის ინტერპელაციის წესით მოსმენა გაიმართა. ღარიბაშვილმა კვლავ გაიმეორა ძველი გზავნილები და აღნიშნა, რომ “რეალური საფრთხე ჩვენი ქვეყნის წინაშე არის ე.წ “უკრაინიზაციის გეგმა”, ასევე, მისი თქმით, “სააკაშვილმა აღიარა”, რომ ის არის დასავლეთის აგენტი. პრემიერი კვლავ დაესხა თავს ევროპარლამენტარებს და ისინი “კრიმინალების”, გვარამიასა და კეზერაშვილის მფარველობაში დაადანაშაულა.
რა თქვა საქართველოს პრემიერმინისტრმა. მოკლედ:
● რეალური საფრთხე დღეს ჩვენი ქვეყნის წინაშე არის სწორედ ის გეგმა, რომელიც ჩვენი ქვეყნის წინააღმდეგ არსებობს, ეს არის ე.წ უკრაინიზაციის გეგმა. ე.წ მეორე პოლიგონის გახსნის გეგმა. მინდა ყველას შევახსენო, რომ დღეს ჩვენი ქვეყანა ჯერჯერობით არ არის არც ევროკავშირის და არც NATO-ს წევრი ქვეყანა, ჩვენ არ გვაქვს უსაფრთხოების გარანტიები და კიდევ ვიმეორებ : ჩვენი ქვეყნის 20% არის ოკუპირებული N1 ბირთვული ძალის მიერ.
● ასევე, მინდა შეგახსენოთ სხვა ფაქტებიც ძვირფასო დეპუტატებო – სამწუხაროდ, უკრაინის ხელისუფლების მიერ გაცხადებული მიზანი პირდაპირ კორელაციაში, კოორდინაციაში და თანხვედრაში მოდის, არ მოვერიდები ამის თქმას, მე-5 კოლონის მიზნებთან, მათ ზრახვებთან, მათ გეგმებთან და ქმედებასთან.
● უკრაინის ტერიტორიის მნიშვნელოვანი ნაწილი დღეს არის გადაქცეული პოლიგონად. ასევე, გეტყვით, რომ 15-დან 20 მილიონამდე უკრაინელმა მოქალაქემ დატოვა საკუთარი საცხოვრებელი, რაც არის ურთულესი გამოწვევა, ეს არის ტრაგედია, ამ სიტუაციას სჭირდება ყოველდღიური გაანალიზება”
● ჩვენ მოვისმინეთ სააკაშვილის ადვოკატის განცხადება, მან წაიკითხა სააკაშვილის აღიარება, რომ ის არის დასავლეთის აგენტი. ეს არის სააკაშვილის სიტყვები, რომელიც გახმოვანდა სააკაშვილის ადვოკატის მეშვეობით. ჩვენ კარგად ვიცით, რა უბედურება მოუტანეს უცხო ქვეყნის თუ ქვეყნების მსახურებმა ჩვენს ქვეყანას და ჩვენს ხალხს. კარგად ვნახეთ, რა მეთოდებით მართეს ჩვენი ქვეყანა, როგორ ჩაგრეს, დატანჯეს ჩვენი ხალხი.
● მას შემდეგ, რაც საქართველომ კანდიდატის სტატუსი ვერ მიიღო, პოლარიზაცია შემცირდა თუ არა? ალბათ, ვერავინ დაგვეთანხმება, რომ ეს ასე მოხდა. პირიქით, ჩვენ ამის შემდეგ ვნახეთ დესტაბილიზაციის მცდელობები – შარშან ივნისის აქციები, ახლა უკვე მარტის აქციები. პოლარიზაციამ მოიმატა, პარლამენტარები სამუშაო პროცესში მონაწილეობას არ იღებენ. შესაბამისად, ჩვენი პასუხი, რაც მე ჩვენს ევროპელ პარტნიორებს ღიად გავუზიარე, არის შემდეგი – თუ ევროპას, ევროპარლამენტარებსა და ჩვენს ევროპელ კოლეგებს პოლარიზაციის დასრულება რეალურად სურთ, მათ საქართველოს კანდიდატის სტატუსი უნდა მიანიჭონ.
● 7-8 მარტს ძალადობრივი აქციების ორგანიზებაში პირდაპირ იყო ჩართული ე.წ მეხუთე კოლონა და მათ მიერ მართული რადიკალური, ექსტრემისტული, ანარქისტული ძალები, მათი ახალგაზრდული ორგანიზაციები – ნაცმოძრაობის, გირჩი – მეტი თავისუფლების, ფრანკლინის კლუბის, ანარქისტული მოძრაობები.
● ჩვენთვის კანდიდატის სტატუსის არ მოცემა უსამართლო გადაწყვეტილება იყო. ვინაიდან, თუ მათი მიდგომა დამსახურებაზეა დაყრდნობილი, მაშინ სტატუსს პირველ რიგში საქართველო იმსახურებდა. ჩვენ არავის ვედრებით, მაგრამ ამის თაობაზე ინფორმაცია საჯაროა და ყველამ ძალიან კარგად იცის, რომ საქართველო ბევრად, 2-3 ჯერ და უფრო მეტადაც წინ უსწრებს უკრაინასა და მოლდოვას ყველა მიმართულებით. იქნება ეს რეფორმები, მიღწევები, გამჭვირვალობა, კანონმდებლობა და ა.შ.
● მინდა, კიდევ ერთხელ გავიმეორო ჩემი გამონათქვამები, რომლებიც უკავშირდებოდა ევროპარლამენტის ზოგიერთი წევრის განცხადებებს. ევროპარლამენტმა რამდენიმე კვირის წინ მიიღო მორიგი სამარცხვინო რეზოლუცია. მათ თქვეს პირდაპირ, თითქმის ტოლობის ნიშანი დასვეს სააკაშვილსა და ჩვენს ქვეყანას შორის. მათ პირდაპირ თქვეს, რომ თქვენი ხალხი არ გვაინტერესებს, არ გვაინტერესებს, რომ სააკაშვილის რეჟიმი კლავდა, აუპატიურებდა, ჩაგრავდა, რომ ის არის დეკლარირებული დადასტურებული კრიმინალი, რომელიც დღეს კერძო კლინიკაში იდის სასჯელს. ამის მიუხედავად ამბობენ, რომ ეს ყველაფერი არ გვაინტერესებს, ვიცით, რომ არის კრიმინალი, მაგრამ ის ჩვენი კრიმინალია.
● დავით კეზერაშვილზე გვეუბნებიან, რომ არ აინტერესებთ, რომ იყო ბიზნეს-რეკეტიორი, მძარცველი, ახლა ძარცვავს ევროპელ პენსიონერებს, იგი არის კრიმინალი, მაგრამ [ამბობენ], რომ არის მათი კრიმინალი.
● ისაუბრეს და მოგვიწოდეს მედიამენეჯერის ნიკა გვარამიას გათავისუფლებაზე… ბატონ გვარამიაზეც გვეუბნებიან, რომ მიუხედავად იმისა, რომ მან გაძარცვა ახლა თავისი კომპანია, კერძო კომპანია, მოიპარა ხუთ მილიონზე მეტი, არ გვაინტერესებს, ის არის ჩვენი კრიმინალი.
● ბევრს გაუკვირდა, როცა ეს ფაქტები მოვიყვანე ჩემს ერთ-ერთ გამოსვლაში და პირდაპირ დავუკავშირე მათი ეს ჩართულობა და განზრახვა ქვეყნის შიგნით მოქმედი მეხუთე კოლონის დესტრუქციულ ქმედებებს და ვთქვი, რომ სამწუხაროდ, ევროპარლამენტის გარკვეული, ზოგიერთი წევრი თანხვედრაში მოდის ჩვენი დესტრუქციული ძალის მიზნებსა და ამოცანებთან.
● 2021 წლის 1-ელ ოქტომბერს დაკავებული იქნა უკანონოდ შემოსული, შემოპარებული ყოფილი პრეზიდენტი სააკაშვილი. მისი ერთადერთი მიზანი იყო საქართველოში მეორე რევოლუციის მოხდენა. მისი მეამიტური გათვლებით, აქ უნდა მომხდარიყო რევოლუცია, სისხლისღვრა, ხელისუფლების დამხობა ძალადობრივი გზით, არჩევნების ჩაშლა. ეს პერიოდი ემთხვევა ზუსტად იმ პერიოდს, როცა ჩვენ ძალიან კარგად გვახსოვს, რომ საუბრები უკვე დაწყებული იყო და ჩვენ სხვა ინფორმაციას გაგვაჩნდა ჩვენი პარტნიორებისგან, რომ მოსალოდნელი იყო უკრაინაში ომის დაწყება ნოემბერში ან დეკემბერში, რომელიც რამდენიმე თვით გადაიწია, ე.წ. რუსეთ დასავლეთს შორის მიმდინარე კომუნიკაციის გამო.
● ეს პირდაპირ ემთხვევა სააკაშვილის შემოსვლას და მის განზრახვას, რომ მოეხდინა ხელისუფლების დამხობა, გადატრიალება და რევოლუცია. ამას თუ დავუკავშირებთ რამდენიმე თვის შემდეგ უკრაინის ხელისუფლების გაცხადებულ მიზანს, მათ ქმედებებს, რომ მათი ამოცანა იყო სწორედაც საქართველოში მე-2 ფრონტის გახსნა, მე ვფიქრობ, არცერთ გონიერ ადამიანს ეჭვი აღარ დარჩება, კითხვა აღარ დარჩება, რომ დიახაც, სააკაშვილის შემოსვლის მიზანი იყო ნიადაგის მომზადება, რომ საქართველოში დაწყებულიყო ომი. რა თქმა უნდა, ეს გეგმა ჩაუვარდათ, ჩვენი ქვეყნის შიდა და გარე მტრებმა წააგეს.
