რა არ თქვა ბადრა გუნბამ კრემლში შეხვედრისას? მოსაზრება

გუნბასა და პუტინის შეხვედრა

5 მარტს მოსკოვში, კრემლში, რუსეთის პრეზიდენტმა ვლადიმირ პუტინმა ახალადარჩეული ე.წ. პრეზიდენტი ბადრა გუნბა მიიღო.

შეხვედრისას გუნბამ პუტინს სთხოვა:

• აფხაზეთისთვის დამატებითი უფასო ელექტროენერგიის მიწოდება აპრილის შუა რიცხვებამდე;
• მექანიზმის განსაზღვრა, რომელიც აფხაზეთის მოქალაქეებს მეორე – რუსეთის პასპორტის მიღების საშუალებას მისცემს;
• აფხაზური მართვის მოწმობებით რუსეთში შესვლის შესაძლებლობის შენარჩუნება, რომლის გაუქმებაც 1 აპრილიდან იგეგმება.

ვლადიმირ პუტინი გუნბას ამ სამივე მოთხოვნის დაკმაყოფილებას დაჰპირდა.

თუმცა, აფხაზეთში ყველას არ მოეწონა შეხვედრის შედეგები. აფხაზი პუბლიცისტი და ბლოგერი დმიტრი მუშბა მიიჩნევს, რომ ბადრა გუნბას კრემლში საუბარი სხვა, უფრო მნიშვნელოვან საკითხებზე უნდა წაეყვანა.

სკანდალებისა და სროლის ფონზე, აფხაზეთის ახალ ე.წ. პრეზიდენტად კრემლის ფავორიტი ბადრა გუნბა აირჩიეს

გუნბას კონკურენტმა, ოპოზიციის ლიდერმა ადგურ არძინბამ ხმების 41,54% მიიღო

დმიტრი მუშბა:

სამი საკითხი, რომელთა გაჟღერებასაც კრემლში აფხაზეთის პრეზიდენტისგან ვისურვებდი:

1. აფხაზეთში არ არსებობდა, არ არსებობს და ვერ იარსებებს ანტირუსული განწყობები, თუ არ ჩავთვლით მათ, ვინც უნიათო პოლიტიკურმა ავანტიურისტებმა გააღვივეს, როცა ძალაუფლებას ეუფლებოდნენ.
2. აფხაზი ოპოზიციონერი პოლიტიკოსების, საზოგადო მოღვაწეებისა და კულტურის სფეროს წარმომადგენლებისთვის რუსეთის მოქალაქეობის ჩამორთმევა და მათი დეპორტაცია არ იქნება დადებითი ნაბიჯი არც ჩვენს ქვეყნებს შორის ურთიერთობებში და არც აფხაზური საზოგადოების შიგნით ერთობის შენარჩუნებისთვის – რაც ჩვენთვის ახლა კრიტიკულად მნიშვნელოვანია.
3. იმის გათვალისწინებით, რომ აფხაზეთსა და რუსეთს შორის მასშტაბური სხვაობაა, რაც ინტეგრაციის პროცესებში ასიმეტრიას იწვევს, ეს პროცესი წარმატებული იქნება მხოლოდ სწორად შერჩეული განვითარების ტემპის შემთხვევაში. აფხაზეთში მასშტაბური საინვესტიციო პროექტების სწრაფი განხორციელების მცდელობა, რაც ქვეყნის ეკონომიკის ზომასთან შედარებით კოლოსალურ ინვესტიციებს გულისხმობს, შეიძლება არაეფექტური აღმოჩნდეს და, რაც მთავარია, დააზიანოს მცირე და საშუალო ბიზნესი, რომელიც აფხაზეთის ეკონომიკის ძირითად ნაწილს წარმოადგენს. ეს კი, თავის მხრივ, შეიძლება სოციალური პროტესტისა და ახალი პოლიტიკური კრიზისების კატალიზატორი გახდეს.

აფხაზი პოლიტიკოსები, რომლებსაც რუსეთის მოქალაქეობა ჩამოართვეს, თვლიან, რომ ისინი პატრიოტიზმის გამო დაზარალდნენ

კან კვარჩია და ლევან მიქაა კრემლისთვის მომგებიანი კანონპროექტებისა და შეთანხმებების ყველაზე აქტიური მოწინააღმდეგეები არიან

სტატია მომზადებულია სოხუმის რედაქციის მიერ და პროექტის პირობების თანახმად, დაბეჭდილია უცვლელად. ტექსტში გამოყენებული ტერმინები და ტოპონიმები, ასევე მოსაზრებები და იდეები, გამოხატავს სტატიის ავტორის პირად პოზიციას და ყოველთვის არ ემთხვევა JAMnews-ის და მისი ცალკეული თანამშრომლების მოსაზრებებსა და პოზიციას. JAMnews-ი იტოვებს უფლებას წაშალოს პუბლიკაციის ქვეშ დატოვებული კომენტარები, რომლებიც შეფასდება, როგორც შეურაცხმყოფელი, მუქარის შემცველი, ძალადობის წამქეზებელი და ასევე ეთიკურად მიუღებელი სხვა მიზეზების გამო