რუსეთმა უკრაინაში მებრძოლი ქართული ლეგიონი ტერორისტულ ორგანიზაციად გამოაცხადა
ქართული ლეგიონი უკრაინაში
რუსეთში უკრაინაში მებრძოლი “ქართული ეროვნული ლეგიონი” ტერორისტულ ორგანიზაციათა სიაში შეიყვანეს. ამის შესახებ ინფორმაცია რუსეთის ფედერალური უსაფრთხოების სამსახურმა (FSB) გაავრცელა.
“ФСБ-ს მიერ შეგროვებული მტკიცებულებებზე დაყრდნობით, სამხრეთის ოლქის სამხედრო სასამართლომ ნახევრად სამხედრო ფორმაცია “ქართული ეროვნული ლეგიონი” ტერორისტულ ორგანიზაციად გამოაცხადა.” – წერია ФСБ-ს განცხადებაში.
● 22 წლის ქართველ მებრძოლს რუსეთმა სამუდამო პატიმრობა მიუსაჯა. ოჯახი დახმარებას ითხოვს
● უკრაინის საგარეო უწყება უარყოფს საქართველოში აჯანყების მომზადებაში უკრაინული მხარის ჩართულობას
რუსეთის მტკიცებით, ლეგიონის წევრები უკრაინის შეიარაღებულ ძალებთან ერთად საომარ მოქმედებებში, რუსეთის ტერიტორიაზე საბოტაჟის და ტერორისტული აქტების ორგანიზებასა და რუსეთის სამხედრო პერსონალის წამებაში იღებენ მონაწილეობას.
აღსანიშნავია, რომ 2023 წლის ოქტომბერში უკრაინაში მებრძოლი ქართული ლეგიონის მეთაური მამუკა მამულაშვილი რუსეთმა ძებნილთა სიაში შეიყვანა, ხოლო მიმდინარე წლის 24 თებერვალს სასამართლომ მას ორთვიანი წინასწარი პატიმრობა შეუფარდა. მანამდე რუსეთის საგამოძიებო კომიტეტმა უკრაინის შეიარაღებულ ძალებში საომარ მოქმედებებში მონაწილეობისთვის ქართული ეროვნული ლეგიონის 70-ზე მეტ “დაქირავებულსაც” დაუსწრებლად მიუსაჯა პატიმრობა.
რამდენიმე დღის წინ გავრცელდა ინფორმაცია, რომ “ქართული ლეგიონის” მეთაური, მამუკა მამულაშვილი მოწამლეს. უკრაინაში მებრძოლი არჩილ ხოფერია ამბობს, რომ მამულაშვილი “ცოცხალია და ბრძოლას განაგრძობს”.
“ახლა შეიძლება ამის თქმა, როცა ჩაიარა მძიმე დრომ და მძიმე წუთებმა. ლეგიონის მეთაური, ჩვენი მეთაური მამუკა მამულაშვილი მოწამლული იქნა მტრების მიერ. მაგრამ, იგი ცოცხალია, იგი განაგრძობს ბრძოლას, ლეგიონი განაგრძობს ბრძოლას და მინდა ვუთხრა მტრებს, ჩვენ მტრებს, ჩვენი ქვეყნის, სამშობლოს მტრებს, რომ არავის სიკვდილი, მათ შორის, არც მეთაურის არ შეაჩერებს ჩვენს ბრძოლას, ლეგიონის ბრძოლას, ჩვენი ხალხის ბრძოლას ერთიანი, თავისუფალი საქართველოსთვის, ჩვენი ქვეყნის მომავლისთვის. ჩვენი ერის მარადიულ ბრძოლას ვერავის სიკვდილი ვერ შეაჩერებს.” – განაცხადა ხოფერიამ.
ქართული ლეგიონი არის უკრაინული სამხედრო ქვედანაყოფი, რომელიც ქართველი მოხალისეებისგან და პროფესიონალი სამხედროებისგან შედგება. ლეგიონი აღმოსავლეთ უკრაინაში რუსეთის შეჭრის შემდეგ შეიქმნა. მისი მეთაურია პოლკოვნიკი მამუკა მამულაშვილი.
2016 წლის თებერვალში ქართული ლეგიონი ოფიციალურად შეუერთდა უკრაინის 25-ე მოტოქვეითთა ბატალიონს და ამჟამად უკრაინის თავდაცვის სამინისტროს დაზვერვის სამმართველოს ექვემდებარება.
ქართული ლეგიონი, რომლის რიგებშიც ქართველი მოხალისეების გარდა სხვა ეროვნების წევრებიც იბრძვიან, დღეისთვის 2000-მდე სამხედროს აერთიანებს.
