ცრემლსადენი გაზი, წყლის ჭავლი, 48 დაკავებული - პროტესტის მეცხრე დღე
თბილისში უკვე მეცხრე დღეა პროევროპული საპროტესტო აქციები იმართება. გასულ ღამესაც რუსთაველის გამზირზე ათასობით ადამიანი შეიკრიბა. მიუხედავად იმისა, რომ აქცია იყო მშვიდობიანი, სპეცრაზმი და ძალოვანები საპროტესტო შეკრების დაშლას მაინც მთელი ღამის განმავლობაში ცდილობდნენ. იყენებდნენ ცრემლსადენ გაზს და წყლის ჭავლის მანქანებს, ასევე მასობრივად აკავებდნენ აქციის მონაწილეებს.
დემონსტრანტებმა რამდენჯერმე გამოიყენეს ფოიერვერკი და შუშხუნები.
გარდა სპეცრაზმისა, მშვიდობიან მომიტინგეებს გასულ ღამეს დაუპირისპირდნენ გაურკვეველი პირებიც, ერთერთ მათგანს ჰქონდა იარაღიც. მოგვიანებით გავრცელდა ინფორმაცია, რომ ეს პირი ბიზნესმენი ავთო მიქაძეა, რომელსაც მისი დაცვა ახლდა თან.
აქციის მონაწილეებმა საპროტესტო მსვლელობა თამარაშვილის გამზირზე გამთენიისას დაასრულეს.
წუხანდელი პროტესტის შემდეგ შინაგან საქმეთა სამინისტროს ინფორმაციით დაკავებულია 48 ადამიანი. სულ პროტესტის დაწყებიდან დღემდე ოფიციალურად 400-მდე პირია დაკავებული. დაკავებულთა შორისაა ტელეკომპანია “მთავარის” ტელეწამყვანი ბექა ყორშია. სპეცრაზმმა რუსთაველზე დააკავა 19 წლის სანდრო ბუკიაც. მისი დედა ამბობდა, რომ სანდროს ეპილეფსია აქვს. ძალოვანებმა ქალის სიტყვები არ გაითვალისწინეს.
შსს დაკავებულებს ადმინისტრაციულ სამართალდარღვევას, პოლიციის კანონიერი მოთხოვნისადმი დაუმორჩილებლობასა და წვრილმან ხულიგნობას ედავება. შსს 7 დეკემბერს გავრცელებულ განცხადებაში წერს, რომ “პროტესტის მონაწილეებს ჰქონდათ შესაძლებლობა, წინა ორი დღის მსგავსად მშვიდ ვითარებაში გამოეხატათ პროტესტი და გაეგრძელებინათ აქცია. თუმცა მიუხედავად აღნიშნულისა, საპროტესტო აქციაზე მყოფ პირთა ნაწილის ქმედებებმა მიიღო ძალადობრივი ხასიათი“.
შსს ამბობს, რომ აქციის წევრებმა პარლამენტის შენობის და მის წინა პერიმეტრზე მდგომი სამართალდამცველების მისამართით ისროლეს პიროტექნიკა. „პოლიციის თანამშრომლებს აყენებდნენ სიტყვიერ შეურაცხყოფას, მათი მიმართულებით ისროდნენ ქვებსა და სხვადასხვა მძიმე საგნებს“.
უწყების ცნობით, აქციის მონაწილეების მხრიდან ნასროლი პიროტექნიკის გამოყენების შედეგად, დაზიანება მიიღო შინაგან საქმეთა სამინისტროს ერთმა თანამშრომელმა.
„აქციის მონაწილეებმა, მოგვიანებით, რუსთაველის გამზირიდან გმირთა მოედნის მიმართულებით გადაინაცვლეს, რა დროსაც საავტომობილო გზაზე მოძრავ ავტომობილებს გადაადგილება შეუზღუდეს, ისინი კონფლიქტში შევიდნენ ავტომობილის მგზავრებთან, რომლებიც ერთ-ერთი დასაცავი პირის პირად დაცვას წარმოადგენდნენ“.
გატაცებები, ცემა, უკანონო ჩხრეკა და დაპატიმრებები – პრეზიდენტ სალომე ზურაბიშვილის განცხადებები
“ტყუილები და ცინიზმი! თუ ქუჩებში “ძალადობა შეჩერდა”, მაშინ რა არის დღევანდელი სასტიკი დარბევის მიზანი? დედისგან შვილის გატაცება? შურისძიება ქალებზე?” – ასე გამოეხმაურა წუხანდელ დარბევას პრეზიდენტი სალომე ზურაბიშვილი X-ზე. მან ირაკლი კობახიძის განცხადება გააზიარა, სადაც კობახიძე ამბობდა, რომ ქუჩებში ძალადობა დასრულდა და თან იცინოდა.
Lies and cynicism!
— Salome Zourabichvili (@Zourabichvili_S) December 6, 2024
If “violence has stopped” in the streets, what is the purpose of tonight’s brutal raid? Abducting a child from their mother? Taking revenge on women? pic.twitter.com/UhL1yLpDyA
სალომე ზურაბიშვილმა აღნიშნა, რომ მეცხრე დღეა ქართველების ბრძოლას თავიანთი თავისუფლებისთვისა და ევროპული მომავლისთვის პასუხად დაუნდობელი ტერორი და რეპრესია ხვდება. მისი თქმით, შეუნელებლად გრძელდება ადამიანის ფუნდამენტური უფლებების უხეში დარღვევა – გატაცებები, ცემა, უკანონო ჩხრეკა და დაპატიმრებები. ზურაბიშვილმა თქვა, რომ არცერთ ქვეყანაში, რუსეთის გარდა არ აქცევენ მომიტინგეებს ალყაში და არ ხდება მათი დევნა.
#terrorinGeorgia : Day 9 of Georgians fighting for their freedom and European future is met with brutal terror and repression. Gross violations of basic human rights – kidnappings, beatings, unlawful searches, and arrests – persist unabated.
— Salome Zourabichvili (@Zourabichvili_S) December 6, 2024
“აქცია იყო მშვიდობიანი და არ არსებობდა მისი დაშლის საფუძველი” – სახალხო დამცველი
წუხელ აქციის დაშლას გამოეხმაურა სახალხო დამცველი ლევან იოსელიანიც. მისი თქმით, აქცია იყო მშვიდობიანი და არ არსებობდა მისი დაშლის საფუძველი.
“სახალხო დამცველი ეხმიანება რუსთაველის გამზირზე მიმდინარე აქციას და აღნიშნავს, რომ იმ დროისთვის (00:34), როცა სამართალდამცავმა ორგანოებმა აქციის დაშლა დაიწყეს, აქცია იყო მშვიდობიანი და არ არსებობდა მისი დაშლის და შეკრების თავისუფლებაში ჩარევის სამართლებრივი საფუძველი.
- პროევროპული პროტესტის 300-ზე მეტი მონაწილე ნაცემი და დაკავებულია. აქ მათ ისტორიებს ვაგროვებთ. განახლებადი
- როგორ მოვიქცეთ თუ სახლში ან ოფისში მოგვაკითხეს ჩხრეკაზე
სახალხო დამცველი მოუწოდებს შინაგან საქმეთა სამინისტროს შეწყვიტოს შეკრების დაშლა, მონაწილეთა დაკავებები და სპეციალური საშუალებების გამოყენება, ხოლო პროტესტის მონაწილეებს მიეცეს საშუალება განაგრძონ აქცია”, – ვკითხულობთ ომბუდსმენის განცხადებაში.
მშვიდობიანი აქციის ძალადობრივი დაშლა დაგმო “საერთაშორისო გამჭვირვალობა-საქართველომ“. ორგანიზაციის განცხადებაში აღნიშნულია, რომ ივანიშვილის რეჟიმის პოლიციის წარმომადგენლები და ძალადობრივი ჯგუფები არა მხოლოდ აქციის მონაწილეებს, არამედ მიმდებარე ქუჩებზე მყოფ ადამიანებსაც სცემდნენ და იტაცებდნენ.
ორგანიზაცია ივანიშვილს საქართველოს მოქალაქეების დევნის შეწყვეტისკენ მოუწოდებს და აღნიშნავს, რომ ხელისუფლების ქმედებებს რეპრესიული ხასიათი აქვს და ადამიანის უფლებების უხეშ დარღვევას წარმოადგენს, რასაც მსოფლიოს დემოკრატიული საზოგადოება გმობს.
გერმანიის, პოლონეთის და საფრანგეთის საგარეო საქმეთა მინისტრების განცხადება
საქართველოს შესახებ ერთობლივი განცხადება გაავრცელეს ვაიმარის სამკუთხედის წევრი ქვეყნების, გერმანიის, საფრანგეთისა და პოლონეთის საგარეო საქმეთა მინისტრებმა. მათ დაგმეს “ქართული ოცნების” ანტიევროპული გადაწყვეტილება და მომიტინგეების წინააღმდეგ არაპროპორციული ძალის გამოყენება.
“ხელისუფლების მიერ გადადგმული ნაბიჯები საქართველოს შიდა და გარე არასტაბილურობისგან დაუცველს ხდის. ხაზს ვუსვამთ ჩვენს მტკიცე გადაწყვეტილებას, მხარი დავუჭიროთ ქართველი ხალხის დემოკრატიულ და ევროპულ მისწრაფებებს.
- სპეცრაზმმა აქცია დაარბია. დაკავებული და ნაცემი არიან ჟურნალისტები, პოლიტიკოსები, რიგითი მომიტინგეები. ფოტოები
- სპეცრაზმი ისევ სასტიკად არბევს აქციის მონაწილეებს. მასშტაბური პროტესტის მეორე ღამე. ფოტო/ვიდეო
- “არ აწიოთ ხელი მოქალაქეებზე” – პრეზიდენტის მიმართვა ძალოვან უწყებებს. მასშტაბური პროტესტის მეორე დღე
მკაცრად ვგმობთ მშვიდობიანი მომიტინგეების წინააღმდეგ ძალის არაპროპორციულ გამოყენებას და ასევე ოპოზიციისა და მედიის წარმომადგენლების მიზანში ამოღებას. ვგმობთ ოპოზიციური პარტიებისა და სამოქალაქო საზოგადოების ორგანიზაციების ოფისებზე რეიდებს, პოლიტიკური ოპოზიციის წევრების დაკავებებსა და მათი დაუყოვნებლივი გათავისუფლებისკენ მოვუწოდებთ. ფუნდამენტური უფლებები, მათ შორის მშვიდობიანი შეკრებისა და გამოხატვის თავისუფლებები, საქართველოს კონსტიტუციისა და საერთაშორისო ვალდებულებების შესაბამისად, მხარდაჭერილი და დაცული უნდა იყოს.
ქართულ ოცნებას დაძაბულობის დეესკალაციისკენ და ყველა პოლიტიკურ ძალასთან და სამოქალაქო საზოგადოების წარმომადგენელთან ინკლუზიური დიალოგის გახსნისკენ მოვუწოდებთ.
ვიხსენებთ, რომ 2024 წლის დასაწყისიდან სწორედ ქართული ოცნების სამოქმედო კურსს წარმოადგენდა ევროკავშირში გაწევრიანების პროცესის დე ფაქტო შეჩერება, რამაც, თავის მხრივ, საქართველოსთან ჩვენი ურთიერთობის გაუარესება გამოიწვია.
საგარეო საქმეთა საბჭოს შემდეგ შეხვედრაზე ამ საკითხზე ყურადღებას გავამახვილებთ, რათა ევროკავშირის დონეზე შესაბამისი ზომები მივიღოთ და, დამატებით, ჩვენს შესაბამის ორმხრივ ურთიერთობებზე ქართული ოცნების ქმედებების შედეგი გავითვალისწინოთ,” – აღნიშნულია განცხადებაში.
