საქართველოს პრეზიდენტმა პარლამენტში უკრაინის ომის ფოტოები მიიტანა

პრეზიდენტმა პარლამენტში უკრაინის ომის ფოტოები მიიტანა

საქართველოს პრეზიდენტმა, სალომე ზურაბიშვილმა პარლამენტში უკრაინის ომის ამსახველი ფოტოები მიიტანა და დეპუტატებს ფეხზე ადგომა და მათი ყურება მოსთხოვა.

პრეზიდენტი პარლამენტში წლიური მოხსენებით წარსდგა და მიმართვის დასაწყისში განაცხადა:

“დღეს ჩვენ თვალწინ შემზარავი კადრები იშლება. რუსეთის მიერ დაბომბილი საავადმყოფოები, საბავშვო ონკოლოგიური საავადმყოფო, ბაგა-ბაღები და სკოლები, თუნდაც ერთმორწმუნე ერის ეკლესიები. მოხუცების და ორსულების ევაკუაცია.

უკრაინელი მეომრების, თუ რიგითი მოქალაქეების შეუპოვარი ბრძოლა საკუთარი მიწის, სამშობლოს დასაცავად და დამოუკიდებლობის გადასარჩენად. რუსულ აგრესიასთან ასეთი თავგანწირული ბრძოლა ჩვენში მხოლოდ პატივისცემას, სოლიდარობასა და გვერდში დგომას იწვევს. საქართველო იდგა და დგას უკრაინის და უკრაინელების გვერდით! მინდა გთხოვოთ ფეხზე ადგომით დავუდასტუროთ ჩვენი სოლიდარობა!

გთხოვთ, წუთიერი დუმილით პატივი მივაგოთ თავდადებულ გმირებს!“

ზურაბიშვილმა მადლობა გადაუხადა უკრაინის ელჩის მოვალეობის შემსრულებელს, ანდრიი კასიანოვს და ყველას, ვინც დღეს კიევში, “ოდესაში თუ მარიუპოლში ჩვენს თავისუფლებას და ჩვენს ევროპულ მომავალს იცავს.” 

უკრაინამ და საქართველომ ერთი გზა გავიარეთ: რუსული იმპერიისგან გათავისუფლება, დამოუკიდებლობის მოპოვება, საბჭოთა რუსეთის მიერ დაპყრობა – თავისი აჯანყებებით, რეპრესიებითა და ჰოლოდომორით, დამოუკიდებლობის აღდგენა, რუსეთის მიერ პროვოცირებული სეპარატისტული კონფლიქტები, კიდევ ომი და კიდევ ოკუპაცია. მიუხედავად ამისა, ხელი ვერავინ და ვერაფერმა აგვაღებინა თავისუფლებასა და დამოუკიდებლობაზე.

ზურგი ვერავინ და ვერაფერმა შეგვაქცევინა ჩვენ მიერ არჩეული ისტორიული ევროპული გზისათვის. საქართველოს ისტორია, ისევე როგორც უკრაინის, სიამაყისა და თავდადების ისტორიაა. ისტორიაა განსაცდელისა და ტრაგედიების, დამპყრობლებთან შეუპოვარი, გმირული, თავგანწირული ბრძოლის მაგალითების. ასე იქმნება ერი! – თქვა სალომე ზურაბიშვილმა

● ტატიანა, მისი ალისა და ნიკიტა – ერთი საშინელი ფოტოს ისტორია
● ხანგრძლივი ომი, დიპლომატია, გადატრიალება. ომის ხუთი სცენარი BBC-ის ანალიტიკოსისგან
● ელიან თუ არა საკუთარი ქვეყნიდან გამოქცეულ რუსეთის მოქალაქეებს საქართველოში?

24 თებერვალს საქართველოს საპარლამენტო ოპოზიციამ უკრაინაში მიმდინარე მოვლენებთან დაკავშირებით პარლამენტის რიგგარეშე სხდომის მოწვევა მოითხოვა. პრეზიდენტმა სალომე ზურაბიშვილმა განაცხადა, რომ სხდომის ჩატარების მოთხოვნას ხელს მოაწერს.

რიგგარეშე სხდომის დანიშვნის შესახებ ფრაქცია “ნაციონალური მოძრაობის” წევრებმა და დამოუკიდებელმა დეპუტატმა თამარ კორძაიამ განაცხადეს.

“ევროპელი ლიდერები დღევანდელ მოცემულობას აფასებენ, როგორც ყველაზე მძიმე დღეებს ევროპისთვის მეორე მსოფლიო ომის შემდეგ. ამის ფონზე ჩვენ ვხედავთ დუმილს და უმოქმედობას ხელისუფლების მხრიდან. ამგვარი დუმილი და უმოქმედობა საქართველოს ძალიან სერიოზული ფასი დაუჯდება.

ამიტომ, ვთავაზობთ კონკრეტულ ინიციატივებს საქართველოს ხელისუფლებას და ამ შემთხვევაში პარლამენტს. ჩვენ მივმართავთ საქართველოს პრეზიდენტს, რომ მოწვეულ იქნას პარლამენტის რიგგარეშე სხდომა, განსაზღვრული დღის წესრიგით და ეს დღის წესრიგი უნდა იყოს რუსეთის სამხედრო აგრესია უკრაინის წინააღმდეგ”, – განაცხადა ოპოზიციონერმა თინა ბოკუჩავამ.