პრემიერის განცხადების შემდეგ ჰომოფობიურმა ჯგუფებმა ოპოზიციის კარვები დაარბიეს

ჰომოფობიურმა ჯგუფებმა, რომლებიც თბილისში “ღირსების მარშის” გასაპროტესტებლად იკრიბებიან, პარლამენტის შენობის წინ ოპოზიციური კარვები აშალეს.

ამ ინციდენტს წინ უძღოდა პრემიერ ღარიბაშვილის განცხადება, სადაც მან თქვა, რომ თბილისი პრაიდის უკან ოპოზიცია და მიხეილ სააკაშვილი დგას.

_____________________________________________________________________________

პარლამენტთან დაძაბულობა მას შემდეგ დაიწყო, რაც იქ სიძულვილის ჯგუფების წარმომადგენლები მივიდნენ და ძალადობრივად კარვების დაშლა დაიწყეს.

ამის შემდეგ ისინი თავს დაესხნენ ჟურნალისტებს, რომლებიც ამ ინციდენტის გასაშუქებლად მივიდნენ. “ფორმულას”, “რუსთავი 2”-ის “ტაბულას”, “ნეტგაზეთის”, პალიტრას ჟურნალისტებს ფიზიკური და სიტყვიერი შეურაცხყოფა მიაყენეს, დააზიანეს აპარატურა. მუშაობაში ხელს უშლიდნენ სხვა ჟურნალისტებს.

სიძულვილის ჯგუფების წარმომადგენელთა აზრით, მედია “გაუკუღმართებული ცხოვრების წესის” პროპაგანდას ეწევა.

საპროტესტო კარვები პარლამენტის წინ ოპოზიციის მხარდამჭერებმა 2020 წლის საპარლამენტო არჩევნების შემდეგ გაშალეს, რადგან არ აღიარებდნენ არჩევნების ლეგიტიმურობას. ერთ-ერთ კარავზე, რომელიც მოძალადეებმა დაშალეს, ექს-პრეზიდენტ მიხეილ სააკაშვილის დიდი ფოტო იყო გამოსახული და მისი სიტყვები, რომ იგი მალე დაბრუნდება საქართველოში.

მოძალადეებს ხელში ხელკეტები ეჭირათ. მოძალადეთა შორის არიან მართლმადიდებელ მშობელთა კავშირი, “ქართული მარშის” წარმომადგენლები, ულტრამემარჯვენე ჰომოფობი ბიზნესმენის, ლევან ვასაძის პოპულსიტური ძალის წარმომადგენლები.

“გვაფურთხებდნენ, გვაგინებდნენ, შემოგვახიეს ტანსაცმელი. ფიზიკურად გვისწორდებოდნენ. მათ იცია, დანაშაულს თუ ჩაიდენენ, ეპატიებათ. როდესაც არბევდნენ კარვებს, მივედით, რომ გაგვეშუქებინა. ამის შემდეგ ჟურნალისტები გავხდით თავდასხმის ობიექტი. ისინი იყვნენ თამამები თავიანთ მოქმედებებში. შსს რეაგირება იყო საკმაოდ დაგვიანებული. როდესაც პარლამენტთან მივედით, იქ პოლიციელები არ იყვნენ. უკვე არბევდნენ კარვებს და პოლიციელებს ჩვენ დავასწარით იქ მისვლა,”– ჰყვება დეა მამისეიშვილი, მთავარი არხის ჟურნალისტი, რომელიც პირადად დაზარალდა ინციდენტის დროს.

პარლამენტთან მობილიზებულია პოლიცია. როგორც მედია გადმოსცემს, დღის პირველ ნახევარში პოლიციური ძალები არასაკმარისად არიან წარმოდგენილი. ჯერჯერობით იქ არ დგანან სპეცდანიშნულების რაზმის წარმომადგენლები.

პირდაპირ ეთერში მუშაობს თითქმის ყველა ქართული არხი. პირდაპირ ეთერშივე მაყურებელი თვალს ადევნებს იმ აგრესიას, რომელსაც სიძულვილის ჯგუფები იჩენენ ჟურნალისტების მიმართ – ისინი პირდაპირი ეთერის კადრში უვარდებიან ტელევიზიებს და იგინებიან.

ვითარება რუსთაველზე დაძაბულია, რაც მოსალოდნელი იყო: დღეს თბილისში ლგბტქ აქტივისტების მიერ ორგანიზებული “ღირსების მარში” უნდა გაიმართოს.

“თბილისი პრაიდის” ორგანიზატორებს დაგეგმილი აქვთ მსვლელობა თბილისის ცენტრში ქვიარ ადამიანების სოლიდარობის მიზნით და ჰომოფობიის წინააღმდეგ.

ეს მარში დაასრულებს პრაიდის კვირეულს, რომელიც თბილისში 1 ივლისს დაიწყო და დიდი დაძაბულობის ფონზე წარიმართა, რადგან ულტრამემარჯვენე, ჰომოფობიური ჯგუფები, ასევე სასულიერო პირები, პრაიდის ყველა ღონისძიების ჩაშლას ცდილობენ აგრესიული აქციებით.

რადიკალების მიზანია არ დაუშვას თბილისში “ღირსების მარშის” გამართვა. ისინი დილიდან მივიდნენ “თბილისი პრაიდის” ოფისთან, ასევე სამოქალაქო მოძრაობა “სირცხვილიას” ოფისთან. ეს ოპოზიციური ორგანიზაციაა, რომელიც თანაუგრძნობს პრაიდის იდეებს.

„თბილისი პრაიდის“ მოწინააღმდეგეები ბოთლებს და სამშენებლო ფილებს ისვრიან.

აგრესიული ჯგუფების პოზიციას მხარს უჭერს და იზიარებს ეკლესია. სწორედ ეკლესიამ მოუწოდა თავის მრევლს ქუჩაში გამოსვლისკენ, რათა არ დაუშვან პრაიდი.

პარლამენტთან აგრესიული ჯგუფების მივარდნას წინ უძღოდა საქართველოს პრემიერ-მინისტრის განცხადება მთავრობის სხდომაზე. ღარიბაშვილმა “ღირსების მარშის” წინააღმდეგ გააკეთა განცხადება და თქვა, რომ არ მიაჩნია მიზანშეწონილად მარშის გამართვა. ღარიბაშვილის თქმით, მარშის “თბილისი პრაიდის” ორგანიზატორთა მიზანია ვითარების დესტაბილიზაცია და მათ უკან ოპოზიცია, კონკრეტულად კი მიხეილ სააკაშვილი დგას.

“სამწუხაროდ, დღევანდელია აქციის ორგანიზატორების უკან დგანან ისევ რევანშისტული, რადიკალური ჯგუფები. კერძოდ, რადიკალური ოპოზიცია სააკაშვილის მეთაურობით. ისინი არიან ჩართული, სრული პასუხისმგებლობით ვაცხადებთ ამას, რომ ისინი უკეთებენ ორგანიზებას აღნიშნულ მარშს და ამ აქციებს და რა თქმა უნდა, სწორედ მათი მიზანია დღეს ჩვენ ქვეყანაში სამოქალაქო არეულობისა და ქაოსის შემოტანა, რაც, რა თქმა უნდა, არ განხორციელდება და ამას ჩვენ არ დავუშვებთ”,– თქვა ღარიბაშვილმა.