პარლამენტთან არბევენ და აკავებენ რუსული კანონის მოწინააღმდეგეებს. ადგილზე უპრეცენდენტო რაოდენობით პოლიციაა მობილიზებული
აქციის დარბევა და დაკავებები
![აქციის დარბევა და დაკავებები. ფოტო: დავით ფიფია/JAMnews](https://jam-news.net/app/uploads/2024/05/14-May-6-1024x576.jpg)
თბილისში, საქართველოს პარლამენტის შენობასთან, სადაც მოქალაქეები აპროტესტებენ აგენტების შესახებ რუსული კანონის მიღებას, პოლიციამ აქციის დაშლა და დემონსტრანტების დაკავება დაიწყო.
14 მაისის, 18:00 საათის მონაცემებით, ჯერ დაუზუსტებელია რამდენი ადამიანი დააკავა პოლიციამ. მედიების მიერ გავრცელებულ კადრებში, ათზე მეტი ადამიანის დაკავება ჩანს.
ამ დროისთვის დასტურდება მხოლოდ ლაზარე გრიგორიადისის დაკავება. ამას ლაზარეს დედა ადასტურებს. ლაზარე გრიგორიადისი რუსული კანონის გაპროტესტებისთვის ერთხელ უკვე იყო დაკავებული. ის გასულ წელს, მარტის აქციების შემდეგ დააკავეს. გრიგორიადისმა ციხე მხოლოდ რამდენიმე კვირის წინ, პრეზიდენტის შეწყალების შემდეგ დატოვა.
რუსთაველის გამზირზე სიტუაცია მას შემდეგ დაიძაბა, რაც “ქართულმა ოცნებამ” მესამე მოსმენით, საბოლოოდ, სულ რამდენიმე წუთში, 84 ხმით მიიღო რუსული კანონი აგენტების შესახებ.
ამ ინფორმაციის გავრცელებას პარლამენტის გარეთ ხმაური მოჰყვა. დემონსტრანტებმა პარლამენტის კედელზე დატოვეს წარწერები: “ჩუქდება”, “კრემლის ფილიალი”, “ეს ქვეყანა ჩვენია”. ნაწილმა კი პარლამენტის შესასვლელთან აღმართული რკინის ჯებირის გარღვევა სცადა.
როგორც კი ხმაურმა იმატა, პარლამენტის შენობის ეზოდან სპეცრაზმი გამოვარდა. აქციის დაშლა პოლიციამ ყველანაირი წინასწარი გაფრთხილების გარეშე დაიწყო. უწყების ოფიციალური განცხადება მხოლოდ მას შემდეგ გავრცელდა, რაც პირდაპირ ეთერში არაერთი ადამიანის დაკავების კადრი გავრცელდა.
უწყების განცხადებაში ნათქვამია, რომ: “საკანონმდებლო ორგანოს მიმდებარე ტერიტორიაზე მიმდინარე აქცია გასცდა შეკრებისა და მანიფესტაციის კანონით დადგენილ ნორმებს და მიიღო ძალადობრივი ხასიათი.”
ამ დროისათვის (18:20 სთ), პარლამენტის მიმდებარე ტერიტორია მთლიანად სპეცრაზმს უკავია. ადგილზე მობილიზებულია უპრეცენდენტოდ დიდი რაოდენობით პოლიცია და განსაკუთრებულ დავალებათა დეპარტამენტის თანამშრომლები.
![აქციის დარბევა და დაკავებები. ფოტო: დავით ფიფია/JAMnews](https://jam-news.net/app/uploads/2024/05/14-May-8-1024x576.jpg)
![აქციის მონაწილეები სპეცრაზმის პირისპირ. 14 მაისი, 2024წ. ფოტო: დავით ფიფია/JAMnews](https://jam-news.net/app/uploads/2024/05/14-May-9-1024x576.jpg)
![აქციის მონაწილეები სპეცრაზმის პირისპირ. 14 მაისი, 2024წ. ფოტო: დავით ფიფია/JAMnews](https://jam-news.net/app/uploads/2024/05/14-May-3-1024x576.jpg)
![აქციის მონაწილეები სპეცრაზმის პირისპირ. 14 მაისი, 2024წ. ფოტო: დავით ფიფია/JAMnews](https://jam-news.net/app/uploads/2024/05/14-May-1-1024x576.jpg)
![აქციის მონაწილეები სპეცრაზმის პირისპირ. 14 მაისი, 2024წ. ფოტო: დავით ფიფია/JAMnews](https://jam-news.net/app/uploads/2024/05/14-May-17-1024x576.jpg)
![](https://jam-news.net/app/uploads/2024/05/14-May-19-1024x576.jpg)
![აქციის მონაწილეები სპეცრაზმის პირისპირ. 14 მაისი, 2024წ. ფოტო: დავით ფიფია/JAMnews](https://jam-news.net/app/uploads/2024/05/14-May-15-1024x576.jpg)
![სპეცრაზმი რუსთაველზე. აქციის მონაწილეები სპეცრაზმის პირისპირ. 14 მაისი, 2024წ. ფოტო: დავით ფიფია/JAMnews](https://jam-news.net/app/uploads/2024/05/14-May-5-1024x576.jpg)