პარლამენტი 14 მაისს აგენტების კანონს მიიღებს - ირაკლი კობახიძე
ირაკლი კობახიძე გლობალური ომის პარტიაზე
საპროტესტო აქციების ფონზე 14 მაისს საქართველოს პარლამენტის სესიაზე მესამე მოსმენით განიხილება უცხოური გავლენის გამჭვირვალობის შესახებ კანონპროექტი. მმართველი პარტია გადაწყვეტილების შეცვლას არ გეგმავს, ამის შესახებ პრემიერმინისტრმა ირაკლი კობახიძემ 13 მაისს პრესკონფერენციაზე ისაუბრა. მან განაცხადა, რომ საქართველოს პარლამენტი ხვალ მოსახლეობის უმრავლესობის რაციონალური ნების შესაბამისად იმოქმედებს და მესამე მოსმენით მიიღებს კანონს, რომელიც გარედან თავსმოხვეული ე.წ. პოლარიზაციის დასრულებაში უმნიშვნელოვანეს წვლილს შეიტანს.
კობახიძემ აღნიშნა, რომ აპრილში ჩატარებული სოციალური კვლევის თანახმად, მოსახლეობის 80%-ზე მეტი მხარს არასამთავრობო ორგანიზაციების გამჭვირვალობას უჭერს, ხოლო 60%-ზე მეტი კანონს “უცხოური გავლენის გამჭვირვალობის შესახებ“.
“საქართველოს გარედან ვერავინ აუკრძალავს საკუთარი ეროვნული ინტერესების დაცვას“, – განაცხადა კობახიძემ.
ირაკლი კობახიძის განცხადებით, მმართველი გუნდი მზადაა დისკუსიისთვის „უცხოური გავლენის გამჭვირვალობის შესახებ“ კანონპროექტზე ვეტოს ფარგლებში, რადგან 14-დან 28 მაისამდე, ორი კვირის განმავლობაში შესაძლებელია პოზიციების შეჯერება და შემდეგ ამ პოზიციების ასახვა ვეტოს კანონპროექტში.
- პრემიერმა ახალგაზრდებსა და ბერბიჭაშვილს შორის ტოლობის ნიშანი დასვა. პრეზიდენტის და მოქალაქეების კომენტარები
- საქართველოს ელჩი საფრანგეთსა და მონაკოში რუსული კანონის გამო გადადგა
- ჰერჩინსკი: კანონის მიღების შემთხვევაში, ევროკავშირის 27 სახელმწიფოს ლიდერს მოუწევს რეაგირება
„მართალია, გუშინ გააკეთა არაკონსტრუქციული განცხადება სალომე ზურაბიშვილმა, თუმცა მე კიდევ ერთხელ მინდა მას მოვუწოდო, რომ იმოქმედოს ისე, როგორც მოქმედებდა აქამდე. თქვენ ყველამ იცით, რომ სალომე ზურაბიშვილი თვითონ არასოდეს წერდა საკუთარ ვეტოს კანონპროექტებს, მას უწერდნენ ან NGO-ები, ან გარედან უწერდნენ. აქედან გამომდინარე შესაძლებელია, რომ ეს ბერკეტი, ინსტრუმენტი გამოყენებული იყოს ახლაც და თუ ამის შესაძლებლობას არ მისცემს არც ხელისუფლებას, არც საერთაშორისო პარტნიორებს სალომე ზურაბიშვილი, ეს, ბუნებრივია, იქნება მისი პასუხისმგებლობა. 14 მაისიდან 28 მაისამდე არის ორი კვირა, ამ ორი კვირის განმავლობაში შესაძლებელია პოზიციების შეჯერება და შემდეგ ამ პოზიციების ასახვა ვეტოს კანონპროექტში. თუმცა, თუ სალომე ზურაბიშვილს ექნება დესტრუქციული პოზიცია, რაც გუშინ უკვე დააფიქსირა, ამ შემთხვევაში გართულდება ეს პროცესი. ჩვენ კიდევ ერთხელ ვაფიქსირებთ მზაობას და ღიაობას დისკუსიისთვის“, – განაცხადა კობახიძემ.
მან მომიტინგეებს მოუწოდა, თავი შეიკავონ კანონის დარღვევისგან და ძალადობისგან, ხოლო სამართალდამცავებს მიმართა, მომიტინგეთა მხრიდან ძალადობის ნებისმიერ გამოვლინებას მაქსიმალური მოთმინებით უპასუხონ.
ივანიშვილის უარი ო’ბრაიანს შეხვედრაზე და გაყინული 2 მილიარდი
საქართველოს პრემიერმინისტრმა ბრიფინგზე ბიძინა ივანიშვილის სანქცირების საკითხს არასერიოზული უწოდა. მისი ინფორმაციით, ბიძინა ივანიშვილმა ჯეიმს ო’ბრაიანს, აშშ-ის სახელმწიფო მდივნის თანაშემწეს შეხვედრაზე უარი უთხრა. გავრცელებულ ინფორმაციაზე პასუხად, რომ ო’ბრაიანს საქართველოში სანქციების პაკეტი ჩამოაქვს, კობახიძემ განაცხადა, რომ ივანიშვილის პოზიცია ასეთია: შანტაჟის ქვეშ ვერავითარ შეხვედრას ვერ გამართავს.
ამასთან, როგორც პრემიერმა თქვა, ივანიშვილს სანქციების თემა არ აინტერესებს, რადგან მის მიმართ დე-ფაქტო სანქციები ისედაც მოქმედებს და ივანიშვილს გაყინული აქვს 2 მილიარდი დოლარი. კობახიძე ამტკიცებს, რომ ეს თანხა აღმოჩნდა „გლობალური ომის პარტიის“ ხელში.
„ასევე იყო გასული თვეების განმავლობაში შემთხვევები, როდესაც სხვა უცხოელ დიპლომატებს და პოლიტიკოსებსაც უთხრა უარი ბიძინა ივანიშვილმა შეხვედრაზე. ამაზე ინფორმაცია მაქვს იქიდან გამომდინარე, რომ მე მთხოვდნენ ხოლმე ამ საკითხების შეთანხმებას. ყველა შემთხვევაში უარის მიზეზი იყო ერთი და იგივე. ბიძინა ივანიშვილი აცხადებდა, რომ ისედაც არის დე-ფაქტო სანქციების ქვეშ. გაყინული აქვს 2 მილიარდი დოლარი, რომელიც დასავლეთს მიანდო, მაგრამ აღმოჩნდა „გლობალური ომის პარტიის“ ხელში.
აქედან გამომდინარე ასეთი შანტაჟი და მუქარა როგორც არ ჭრიდა 2022 წლის მარტიდან, როდესაც თანხები გაუყინეს უკრაინაში ომის დაწყების შემდეგ, ასევე ვერ გაჭრის მასზე ასეთი შანტაჟი და მუქარა. ვერავინ გადაადგმევინებს ბიძინა ივანიშვილს სახელმწიფოს საწინააღმდეგო ნაბიჯებს, ვერავითარი შანტაჟისა და მუქარის პირობებში. სანქცია ხომ თავისთავად შეიცავს შანტაჟსა და მუქარას. ეს არის არასერიოზული თემა ამ ყველა ამ გარემოების გათვალისწინებით“, – აღნიშნა საქართველოს პრემიერმინისტრმა.
ქართულ პროპაგანდისტულ ტელემედიაში დღეს გავრცელდა ინფორმაცია, რომ ევროპისა და ევრაზიის საკითხებში აშშ-ის სახელმწიფო მდივნის თანაშემწეს, ჯეიმს ო’ბრაიანს, რომელიც საქართველოში ჩამოდის, ბიძინა ივანიშვილის სანქცირების პაკეტი ჩამოაქვს და ბიძინა ივანიშვილსაც შეხვდება.
კობახიძეს იმედი აქვს, რომ აშშ და ევროკავშირი გათავისუფლდებიან “გლობალური ომის პარტიის” გავლენებისგან
კობახიძემ პრესკომფერენციაზე ე.წ. “გლობალური ომის პარტიაზეც” ისაუბრა. მან იმედი გამოთქვა, რომ სამომავლოდ ვითარება თვისებრივად შეიცვლება და მაქსიმალურად გათავისუფლდება, როგორც ამერიკის შეერთებული შტატები, ისე ევროკავშირი “გლობალური ომის პარტიის” გავლენებისგან, – ამის შესახებ საქართველოს პრემიერ-მინისტრმა 13 მაისს გამართულ პრესკონფერენციაზე განაცხადა.
როგორც კობახიძემ აღნიშნა, “გლობალური ომის პარტიას” აქვს გადამწყვეტი, კრიტიკული გავლენა ოფიციალურ სტრუქტურებზე, როგორც ამერიკის შეერთებულ შტატებში, ასევე ევროკავშირში.
„რამდენიმე დღის წინ მე ვთქვი, რომ გამიჭირდება ამ სუბიექტების დაკონკრეტება, რა თქმა უნდა, დღესაც ვერ შევცვლი პოზიციას, გამომდინარე იქიდან, რომ ამ სუბიექტების დაკონკრეტებამ შეიძლება, უარყოფითი გავლენა იქონიოს ჩვენი ეროვნული უსაფრთხოების ინტერესებზე. მე დავაკონკრეტე ასევე რომ აქ არ ვგულისხმობ ევროკავშირსა და აშშ-ს, პირიქით, ევროკავშირი არის სწორედ მთავარი მსხვერპლი, თუმცა აქვე ვიტყვით იმასაც, რომ გლობალური ომის პარტიას აქვს გადამწყვეტი, ასე ვთქვათ, კრიტიკული გავლენა ოფიციალურ სტრუქტურებზე, როგორც აშშ-ში, ასევე ევროკავშირში, რაც არის სამწუხარო მოვლენა.
განსაკუთრებით ადვილია ევროკავშირის ოფიციალურ სტრუქტურებზე გავლენის მოპოვება, გამომდინარე იქიდან, რომ ევროკავშირში გადაწყვეტილებები არსებითად მიიღება სრული კონსენსუსით 27 ქვეყნის მიერ, შესაბამისად, იქ საკმარისია “გლობალურმა ომის პარტიამ” გავლენა მოახდინოს თუნდაც ერთ ქვეყანაზე და უკვე ის განაპირობებს ისეთ გადაწყვეტილებას, რომელიც შედის მის ინტერესებში.
კიდევ ერთხელ გავიმეორებ, რომ დაკონკრეტება გამიჭირდება, თუმცა გავლენების მასშტაბი არის ძალიან დიდი და ვიტყვი, რომ ოფიციალურ სტრუქტურებზე აქვთ სერიოზული გავლენა როგორც ერთი, ისე მეორე მიმართულებით, ანუ საუბარია აშშ-სა და ევროკავშირზე, რაც არის სამწუხარო მოვლენა. მე მაქვს დიდი იმედი, რომ სამომავლოდ ეს ვითარება თვისებრივად შეიცვლება და მაქსიმალურად გათავისუფლდება, როგორც აშშ, ისე ევროკავშირი გლობალური ომის პარტიის გავლენებისგან“, – განაცხადა პრემიერ-მინისტრმა.
ირაკლი კობახიძე გლობალური ომის პარტიაზე
