პაპუაშვილმა რუსულ კანონს ხელი მოაწერა. ორგანიზაციებს ექნებათ 60 დღის ვადა, რათა დარეგისტრირდნენ ელექტრონულ პორტალზე
პაპუაშვილმა რუსულ კანონს ხელი მოაწერა
საქართველოს პარლამენტის თავმჯდომარემ, შალვა პაპუაშვილმა რუსულ კანონს ხელი მოაწერა. პაპუაშვილის თქმით, კანონი 4 ივნისიდან შევა ძალაში. მისივე განმარტებით, უცხოური დაფინანსების მქონე ორგანიზაციებს ექნებათ 60 დღის ვადა, რათა დარეგისტრირდნენ შესაბამის ელექტრონულ პორტალზე და დაადეკლარირონ 2023 წლის ფინანსები.
“[კანონს] დღეს მოვაწერე ხელი, ის გამოქვეყნდება საკანონმდებლო მაცნეში. ხვალიდან ჩაითვლება გამოქვეყნებულად და ხვალინდელი დღიდან 60 დღის განმავლობაში იუსტიციის სამინისტრო შეიმუშავებს ყველა კანონქვემდებარე ნორმატიულ აქტს, ასევე შექმნის ელექტრონულ პორტალს ორგანიზაციებისთვის და 60 დღის შემდეგ დადგება ვალდებულება იმ ორგანიზაციებისა, რომლებსაც აქვთ უცხოური დაფინანსება, დარეგისტრირდნენ პორტალში და დაადეკლარირონ 2023 წლის ფინანსები.
კანონი ამოქმედდება ხვალიდანვე, თუმცა რეგისტრაციის ვალდებულება წარმოიშობა 60 დღეში. დაახლოებით, 4-5 სექტემბერია, თუ არ ვცდები.” – თქვა შალვა პაპუაშვილმა.
რუსული კანონი, რომელსაც დღეს პარლამენტის თავმჯდომარემ მოაწერა ხელი, საკანონმდებლო მაცნეს ვებგვერდზე უკვე გამოქვეყნდა.
საქართველოს პრემიერმა, ირაკლი კობახიძემ მთავრობის სხდომაზე განაცხადა, რომ კანონის მიღებით გაიმარჯვა საქართველომ, მისმა სუვერენიტეტმა და უსაფრთხოებამ. ასევე, კობახიძის თქმით, ამ ორი თვის განმავლობაში, კანონის შესახებ გავრცელდა უამრავი დეზინფორმაცია. იყო ჭარბი ემოციები, რასაც ჰქონდა მხოლოდ და მხოლოდ ხელოვნური საფუძველი.
“ახლა კანონი უკვე ძალაშია და ყველამ უნდა ვიმოქმედოთ პრაგმატულად, გვერდზე გადავდოთ არასაჭირო ემოციები, ეს განსაკუთრებით ეხება იმ ადამიანებს, ვინც ლიბერალურ-ფაშისტური ქმედებებით ცდილობენ გადაფარონ პროტესტის წარუმატებლობით გამოწვეული იმედგაცრუება.
ლიბერალური ფაშიზმი არის კლასიკურ ფაშიზმზე და ბოლშევიზმზე არანაკლებ საშიში იდეოლოგია, რომელიც გაუმჭვირვალე ფინანსების მეშვეობით უკვე წლებია ხელოვნურად ინერგება ჩვენს ქვეყანაში და ეს არის აბსოლუტურად შეუთავსებელი ქართულ კულტურასთან.” – აღნიშნა კობახიძემ.
„ქართული ოცნების“ გენერალური მდივანი და თბილისის მერი კახა კალაძე აცხადებს, რომ თუ ორგანიზაციები არ დაემორჩილებიან რუსულ კანონს, პასუხისმგებლობის სახით გათვალისწინებული ჯარიმების გადაუხდელობა გამოიწვევს მათ დაყადაღებას და საბოლოოდ, ფუნქციონირების შეწყვეტას.
თუ არ დაემორჩილებიან, არის ფინანსური ჯარიმები, შემდეგ მოხდება მათი დაყადაღება, ა.შ. და ისინი ვერ შეძლებენ უბრალოდ ფუნქციონირებას და ვერ შეძლებენ იმ თანხების მიღებას, რასაც იღებენ. აქ თუ შენ კეთილ საქმეს აკეთებ და არ გაქვს ბოროტი ზრახვები, რა პრობლემაა დეკლარაციის შევსება და შენი ფინანსების ჩვენება, საიდან იღებ შემოსავლებს და რა კონკრეტულ პროექტებში ფინანსდება. თუმცა არსებობს ეჭვი იმისა, რომ ეს პოლარიზაცია, რევოლუციის სცენარის დაფინანსება, ყველაფერი ხდებოდა ამ გაუმჭვირვალობის გამო. – ამბობს კალაძე.
● ანალენა ბერბოკი: წარმოუდგენლად მტკივნეულია – მთავრობა ბლოკავს ქართველების ოცნებას ევროკავშირის წევრობაზე
● ჰელსინკის კომისიამ MEGOBARI აქტის ძირითადი დებულებები გამოაქვეყნა
საქართველოში მოქმედი სამოქალაქო ორგანიზაციები აცხადებენ, რომ აგრძელებენ სამართლებრივ ბრძოლას „აგენტების კანონის“ წინააღმდეგ. 30 მაისს გამართულ ერთობლივ ბრიფინგზე მათ განაცხადეს, რომ შიდა და საერთაშორისო მექანიზმებს გამოიყენებენ კანონის მოქმედების შესაფერხებლად. ორგანიზაციები საქართველოს საკონსტიტუციო სასამართლოში წარსადგენად სარჩელს ამზადებენ.
“ვამზადებთ სარჩელს საქართველოს საკონსტიტუციო სასამართლოში წარსადგენად და უახლოეს პერიოდში მივმართავთ მას. საკონსტიტუციო სასამართლოს შეუძლია იმოქმედოს კონსტიტუციით მინიჭებული უფლებამოსილებით და შეაჩეროს კანონის შესაბამისი მუხლების მოქმედება.
საკონსტიტუციო სასამართლოს არ მივიჩნევთ ერთადერთ გზად ჩვენი სამართლებრივი ბრძოლისათვის. იმ შემთხვევაში, თუ საკონსტიტუციო სასამართლო არ იმოქმედებს დროულად და კონსტიტუციურ ჩარჩოებში, ჩვენ გამოვიყენებთ ალტერნატიულ სამართლებრივ მექანიზმს. პარალელურად ვემზადებით ადამიანის უფლებათა ევროპულ სასამართლოში საჩივრის წარსადგენად, რომელსაც მივმართავთ შესაბამის დროს.“ – აცხადებენ არასამთავრობოები.
