პაატა ზაქარეიშვილის კომენტარი: სოხუმიდან დაიწყება სანქცირებული ტვირთების გადაზიდვა
პაატა ზაქარეიშვილის კომენტარი
სოხუმიდან დაიწყება სანქცირებული ტვირთების გადაზიდვა – ღრმად ვარ დარწმუნებული, რომ წინასწარ იყვნენ შეთანხმებული საქართველოს ხელისუფლებასთან – ამის შესახებ კონფლიქტოლოგმა პაატა ზაქარეიშვილმა გადაცემა “თავისუფალ სტუდიაში” განაცხადა. მისივე თქმით, საკითხზე საქართველოს ხელისუფლების დუმილი განპირობებულია მათი ინტერესით – საქართველოს ტერიტორიაზე იაროს რაც შეიძლება მეტმა ტვირთმა.
ზაქარეიშვილის ხაზს უსვამს, რომ საქართველო, რომლის ტერიტორიებიც ოკუპირებულია, რუსეთის თამაშის წესებით არ უნდა თამაშობდეს. ექსპერტმა ისაუბრა საქართველოს საგარეო პოლიტიკაზეც და აღნიშნა, რომ “ქართული ოცნება“ წინასაარჩევნო კამპანიას აგრძელებს და ყველა მესიჯი საკუთარი ამომრჩევლისთვის არის გამიზნული.
7 თებერვალს ოკუპირებული სოხუმის აეროპორტში მოსკოვიდან საცდელი რეისი ჩაფრინდა, რომელშიც 21 მგზავრი, მათ შორის აფხაზეთის ე.წ. პრეზიდენტობის კანდიდატი ბადრა გუნბა იმყოფებოდა.
მანამდე რუსეთის ტრანსპორტის მინისტრმა რომან სტაროვოიტმა განაცხადა, რომ სოხუმში ფრენებს ავიაკომპანია ЮВТ Аэро შეასრულებს.2023 წლის შემოდგომაზე ცნობილი გახდა, რომ სოხუმის აეროპორტის აღდგენას შპს „ინფრასტრუქტურის დეველოპმენტი“ განახორციელებდა.
ამასთან, სამოქალაქო ავიაციის საერთაშორისო ორგანიზაცია სოხუმის აეროპორტს საერთაშორისო აეროპორტად არ ცნობს, ვინაიდან აღიარებს საქართველოს ტერიტორიულ მთლიანობას. ორგანიზაციამ 2006 წლიდან გააუქმა აეროპორტის კოდი და მის შესახებ ინფორმაცია დოკუმენტებიდან ამოიღო.
პაატა ზაქარეიშვილი:
“სოხუმის აეროპორტის აღდგენაზე, დიდი ხანია, საუბარი მიდის. რუსეთს ჯერ კიდევ სოჭის ოლიმპიადის დროს უნდოდა, განეხორციელებინა გარკვეული ფრენები, მაგრამ მაშინაც კი ვერ გაბედეს და ახლა აეროპორტი გაარემონტა მხოლოდ და მხოლოდ შიდა ფრენებისათვის – ანუ სოხუმიდან თვითმფრინავი შეიძლება გაფრინდეს მხოლოდ და მხოლოდ რუსეთის ტერიტორიაზე არსებულ აეროპორტებში და პირიქით. ერთადერთი ლოგიკა აქ არის ის, რომ სოხუმიდან დაიწყება სანქცირებული ტვირთების გადაზიდვა.
ეს დღესაც ხორციელდება – თურქეთიდან შემოდის ტვირთები, საქართველოს გავლით შედის გალის რაიონში, სადაც არის ძალიან დიდი ტერმინალი. აეროპორტი იქნება დამატებითი ფაქტორი, რომლითაც მოხდება ტვირთების გადაზიდვა რუსეთის დანარჩენ ტერიტორიაზე.
ეს ის შემთხვევა, როცა საქართველოს ხელისუფლება აქედან იღებს გარკვეულ სიკეთეებს – ეს ტვირთები საქართველოს ტერიტორიაზე გაივლის, ამიტომ, ღრმად ვარ დარწმუნებული, რომ წინასწარ იყვნენ შეთანხმებული საქართველოს ხელისუფლებასთან
დღეს გამოქვეყნდა სტატისტიკური მონაცემები, სადაც ორჯერ და სამჯერ არის გაზრდილი ექსპორტი და იმპორტი საქართველოში – შემოდის ტვირთი და გადის ტვირთი, შესაბამისად, კარგად უნდა დავაფიქსიროთ, სად გადის ეს ტვირთი, როგორ ხდება მისი გატარება და ჩვენ ვნახავთ, რომ აფხაზეთზე მიდის საკმაოდ სერიოზული რაოდენობა ტვირთებისა ან თუ არ მიდის, მალე წავა, როგორც კი ამ აეროპორტის გამოყენებას რუსეთი დაიწყებს.
მე მგონია, რომ ამ საკითხზე საქართველოს ხელისუფლების დუმილი განპირობებულია იმით, რომ მათ ინტერესებშია, საქართველოს ტერიტორიაზე იაროს რაც შეიძლება მეტმა ტვირთმა. საქართველოს მთავრობა არც კი მალავს, რომ ისინი არ უერთდებიან საერთაშორისო სანქციებს რუსეთის წინააღმდეგ.
საქართველო, რომლის ტერიტორიებიც ოკუპირებულია, რატომ თამაშობს იმავე წესებით, რაც რუსეთს აწყობს?
“ქართული ოცნება” აგრძელებს წინასაარჩევნო კამპანიას, მას სჭირდება არჩევნებში გამარჯვება, რომელიც იქნება ოქტომბერში, ადგილობრივი არჩევნები. მთელი ეს მესიჯები არა ევროპისთვის, არამედ თავისი ამომრჩევლისთვისაა – მათ უქმნიან მტრის ხატის განცდას, რომ ევროპა ჩვენი მტერი გახდა, “დიპ სტეიტი” და მთელი მსოფლიო ჩვენს წინააღმდეგაა.
“გლობალური ომის პარტია” რატომღაც აღარ არის? ამოწურა, ეტყობა, თავისი რესურსი და ახლა უფრო გაუგებარი და უფრო ბუნდოვანი ტერმინით უნდათ თავიანთი ამომრჩევლის “დაბოლება”. იმედია, უფრო და უფრო მეტი ხალხი მიხვდება ”ქართული ოცნების” ამომრჩეველთა რიგებში იმიტომ, რომ სხვაზე არ მოქმედებს ეს ყველაფერი, ევროპაში სასაცილოდ არ ჰყოფნით.
ჰიტლერი არ იყო ასეთი პარანოიდალური, როგორიც არის მათი ეს განცხადებები. კიდევ კარგი, იარაღი არ აქვთ და არ შეუძლიათ, მსოფლიო ომი წამოიწყონ, თორემ სხვა მხრივ ყველანაირად გასული არიან ასტრალში.”
