"ორსული ვიყავი, მცემა ძალიან". ცნობილი მსახიობი ბესო ზანგური ყოფილმა ცოლმა ძალადობაში დაადანაშაულა

ცნობილი ქართველი მსახიობის, ბესო ზანგურის ყოფილმა ცოლმა ნინუცა მაყაშვილმა მსახიობი ფიზიკურ ძალადობაში ამხილა.

რუსთავი 2-ზე, ერთ-ერთ სატელევიზიო შოუში ნინუცა მაყაშვილმა გაიხსენა 11 წლის წინანდელი ამბები და განაცხადა, რომ ბესო ზანგური მასზე სისტემატურად ძალადობდა, მათ შორის ორსულობის პერიოდში.

“არასდროს მიფიქრია, რომ მე გავხდებოდი ერთ-ერთი მათგანი, ვისაც ეს შეეხებოდა… არ მახსოვს პირველად რა მიზეზით მცემა, მაგრამ მახსოვს, რომ ეს ყველაფერი გააკეთა მისი ოჯახის წევრების წინ და მე ვიყავი ორსული. მცემა ძალიან. ამ ყველაფერს მერე მოსდევდა ხოლმე ბოდიშების და საჩუქრების კორიანტელი…” – ჰყვება მაყაშვილი.

მისი თქმით, ფიზიკური ძალადობის შემთხვევები ხშირი იყო:

“მიზეზი შეიძლებოდა ყოფილიყო თუნდაც ის, რომ თეფში და ჩანგალი დროზე არ გამერეცხა. მიზეზი შეიძლებოდა ყოფილიყო ის, რომ როცა მაგალითად, წითელ შუქნიშანზე ვიდექი მანქანით და უბრალოდ მოწყენილი ვიყავი, ეთქვა, რომ მე ვარ უჟმური. მიზეზი შეიძლებოდა ყოფილიყო ქუჩაში დანახული ვინმე ბიჭი“.

ნინუცა მაყაშვილის თქმით, მსახიობი მას აშინებდა და ემუქრებოდა:

“ვპატიობდი იმიტომ, რომ მეშინოდა. ძალიან მეშინოდა, რადგან იყო რიგი მუქარები ჩემი ოჯახის წევრების მისამართით. ვერავის ვუყვებოდი, რადგან ძალიან რთულია ასეთ რამეზე ილაპარაკო. ბოლოს იყო, როცა ვთქვი – მიშველეთ”.

მსახიობის თქმით, ერთხელ ყოფილი ქმარი მას რამდენიმე საათის განმავლობაში სცემდა და ეს იყო ბოლო წვეთი:

“გასტროლებზე იყო წასული. მე ბავშვთან ერთად ბებიასთან ვიყავი. ღამის 4 საათზე ჩამოვიდა. ვთხოვე, ბავშვთან ერთად ვარ, დავრჩები და დავიძინებ-მეთქი. მე და ბებია ვისხედით და ველოდებოდით. რომ ჩამოვიდა, ბავშვი გავაღვიძე, წავედით სახლში და დილის 4 საათზე რომ დაიწყო ცემა, დილის რვამდე არ გაჩერდა. ერთადერთი, რისი თქმაც მაშინ შემეძლო, ეს იყო ჩემი შვილის სახელი, რომელიც გვერდზე ოთახში იყო და ტიროდა. როცა მივხვდი, რომ ჩემი შვილი იქიდან უნდა წამომეყვანა,” – იხსენებს მაყაშვილი.

ის ამბობს, რომ არასოდეს ულაპარაკია ამ თემაზე ამ წლების განმავლობაში ფსიქოლოგიური პრობლემების გამო:

“ძალიან მარტივია სუსტი დაჩაგრო, ძალიან მარტივია ხელი დაარტყა იმას, ვინც ხელს არ შემოგიბრუნებს. ახლა ნერვები მეშლება, მაგრამ მაშინ სუსტი ვიყავი... ახლა ძალიან დიდი დრო გავიდა, მე გავიზარდე, გადავლახე ეს ყველაფერი და ახლა უფრო მარტივია ამ ყველაფერზე ლაპარაკი, ვიდრე მაშინ”.

______________________________

● “ვმუშაობთ იქ, სადაც ხალხი ადამიანის წინააღმდეგაა”. ანა არგანაშვილი და ანა აბაშიძე ბასილაშვილზე, ფემინიზმზე და ადამიანის უფლებებზე
● ნიკოლოზ ბასილაშვილის საქმე. რა არის ცნობილი ამ დროისთვის
● ქართველმა ჩოგბურთელმა როჯერ ფედერერი დაამარცხა. თუმცა, საქართველოში ეს ყველას არ გაუხარდა

________________________________

მსახიობი ქალის მიერ მოყოლილ ისტორიას უკვე მიაქციეს ყურადღება უფლებადამცველებმა. იურისტმა თამარ დეკანოსიძემ “რადიო თავისუფლებას” უთხრა, რომ ნინუცა მაყაშვილის ისტორია გამოძიების დაწყების საფუძველს იძლევა.

მსახიობი ბესო ზანგური, რომელზეც ნინუცა მაყაშვილი ჰყვება, საქართველოს ერთ-ერთი მთავარი თეატრის, რუსთაველის თეატრის წამყვანი მსახიობია და ამ თეატრის სამხატვრო ხელმძღვანელის, რობერტ სტურუას სპექტაკლში ხშირად მონაწილეობს. ზანგური პოლიტიკურად აქტიურია. ის მმართველი გუნდის, “ქართული ოცნების” აქტიური მხარდამჭერი იყო, 2011 წელს ამ პარტიის წინასაარჩევნო კამპანიაში მონაწილეობდა და შემდეგ თბილისის მერიაშიც იყო დასაქმებული, როგორც თეატრალური კოორდინატორი და მრჩეველი.

38 წლის მსახიობი, ბესო ზანგური “ნეტგაზეთთან”კომენტარში ამბობს, რომ მისი ყოფილი მეუღლე ტყუის და ძალადობის ფაქტებს ადგილი არ ჰქონია.

მსახიობის თქმით, ქალმა სატელევიზიო შოუში იმიტომ იცრუა, რომ აეღო თანხა – 5 ათასი ლარი (1450 დოლარი), რომელიც გადაცემის წესების თანახმად, შოუს მონაწილეს ექსკლუზიური ისტორიის მოყოლისთვის ერგება.

ფაქტს გამოეხმაურა რუსთაველის თეატრი.

თეატრმა ფეისბუკზე მოკლე და ზოგადი განცხადება გაავრცელა: რუსთაველის ეროვნული თეატრი გმობს ყოველგვარ ძალადობას, მათ შორის ოჯახურ ძალადობას!”

განცხადებაში არ არის ნახსენები ბესო ზანგური, ხოლო “რადიო თავისუფლების” კითხვაზე, აპირებს თუ არა რეაგირებას თეატრი, საზოგადოებასთან ურთიერთობის სამსახურის წარმომადგენელმა ია შერაზადიშვილმა უპასუხა, რომ ამ ეტაპზე თეატრს რეაგირების საფუძველი არ აქვს:

„თუკი მისი ყოფილი მეუღლე სარჩელს შეიტანს, რომ ძალადობის ფაქტები იყო და დაიწყება გამოძიება, მაშინ თეატრიც ვალდებული იქნება მიმართოს ზომებს. ახლა რის გამო უნდა მივიღოთ ზომები? იმის გამო, რომ ნინუცა ამბობს, რომ 11 წლის წინ ადგილი ჰქონდა ძალადობას? ცოტა გაუგებარი არ არის?“