ქალთა უფლებებზე და გენდერულ თანასწორობაზე მომუშავე არასამთავრობო ორგანიზაციები ერთობლივ განცხადებას ავრცელებენ და მოითხოვენ, დატოვოს გენდერული თანასწორობის მუდმივი საპარლამენტო საბჭოს თავმჯდომარის თანამდებობა დეპუტატმა ნინო წილოსანმა.
ერთობლივ განცხადებაში აღნიშნულია, რომ ნინო წილოსანი ვერ ასრულებს საკუთარ მოვალეობას და მათთვის მიუღებელია მისი პოლიტიკური ქმედებები და განცხადებები, რომლებიც ეწინააღმდეგება თანასწორობის პრინციპს, დისკრიმინაციულია და აღვივებს ძალადობას. არასამთავრობოების თქმით, საბჭოს ხელმძღვანელად უნდა დაინიშნოს ადამიანი, ვინც საქმით ემსახურება თანასწორობისა და თანასწორუფლებიანობის იდეებს.
ორგანიზაციების განმარტებით:
● ნინო წილოსანმა საჯაროდ მხარი დაუჭირა შალვა რამიშვილს, რომელიც რამდენიმე ქალმა მნიშვნელოვანი მტკიცებულებების წარმოდგენით სექსუალურ ძალადობაში ამხილა. შეგახსენებთ, რომ სასამართლომ ერთხელ უკვე დაამტკიცა რამიშვილის მიერ სექსუალურ შევიწროების ჩადენა.
● ნინო წილოსანი არის 78 დეპუტატთაგანერთ-ერთი, რომელმაც დაჩქარებული წესით ხმა მისცა რუსული კანონის ანალოგს უცხოელი აგენტების რეგისტრაციის შესახებ, რომლის მთავარი მიზანიც არასამთავრობო სექტორის მარგინალიზაცია და დევნა იყო.
● გასული წლის მიწურულს მან მხარი დაუჭირა და წარმატებულ ინიციატივად შეაფასა საქართველოს გენდერული თანასწორობის სახელმწიფო კონცეფცია, რომელიც გენდერულად არამგრძნობიარე და არაინკლუზიური დოკუმენტია, უკიდურესად ვიწროდ განიხილავს გენდერს და აიგივებს სქესთან.
● ამა წლის 27 ივნისს კი ნინო წილოსანმა პარლამენტის ტრიბუნიდან თანაპარტიელ კაცებს დეპუტატი ანა წითლიძის მიმართ ძალადობისკენ მოუწოდა, კერძოდ, მან განაცხადა: “ქალბატონმა ანა წითლიძემ მამუკა მდინარაძის და ბექა ოდიშარიას დაპირება გაიხსენა და მე დარწმუნებული ვარ, რომ მამუკაც და ბექაც თავის დაპირებას აუცილებლად შეასრულებენ მათ მიმართ, ვინც გაბედავს და პრორუსებს დაგვიძახებს”. აქვე შეგახსენებთ ოდიშარიას ციტატას: „ჩვენ ვინც პრორუსს დაგვიძახებს, მიიღებს ცხვირ-პირში”.
“ყოველივე ზემოთ თქმულიდან გამომდინარე ჩვენ მივიჩნევთ, რომ არსებული თავმჯდომარის პირობებში გენდერული თანასწორობის საბჭოსთან თანამშრომლობის შესაძლებლობა ამოწურულია. შესაბამისად, ნინო წილოსანს მოვუწოდებთ, დაუყოვნებლივ დატოვოს გენდერული თანასწორობის მუდმივმოქმედი საპარლამენტო საბჭოს თავმჯდომარის თანამდებობა.” – აღნიშნულია განცხადებაში.
როგორც „ოცნების“ დეპუტატი ნინო წილოსანი ამბობს, ამ ორგანიზაციებს არ გაუხარდათ, რომ ევროკომისიამ 12 რეკომენდაციიდან გენდერული თანასწორობის მიმართულება შესრულებულად ჩათვალა.
„მას შემდეგ, რაც ევროკომისიამ 12 რეკომენდაციიდან გენდერული თანასწორობის მიმართულება სრულად შესრულებულად შეაფასა, რიგი არასამთავრობოები მომიწოდებენ გენდერული თანასწორობის საბჭო დავტოვო. ვიცი, შეიძლება არ გაგიხარდათ რეკომედნაცია რომ სრულად შესრულდა, მაგრამ ცოტა რომ დაფაროთ, არა?“ – წერს ის.
